ໂຄງລ່າງພື້ນຖານສິ່ງອຳນວຍຄວາມສະດວກດ້ານການທ່ອງທ່ຽວທີ່ໄດ້ຮັບການປັບປຸງຜ່ານມາໄດ້ມອບໃຫ້ບໍລິສັດເຂົ້າມາບໍລິການແລະບໍລິຫານຄຸ້ມຄອງຮ່ວມປະກອບມີ:ເສັ້ນທາງຄອນກຣີດຍາວ 6 ກິໂລແມັດຈາກເສັ້ນທາງຫຼວງເລກ 13ເໜືອຫານໍ້າຕົກຕາດແກ້ງຍຸຍ, ພ້ອມຂົວເຫຼັກ 2 ແຫ່ງ, ລະບົບລະບາຍນໍ້າແລະປ້າຍຊີ້ບອກຕາມເສັ້ນທາງ; ສິ່ງອຳນວຍຄວາມສະດວກບ່ອນຈອດລົດ 2 ແຫ່ງ, ຫ້ອງນໍ້າສາທາລະນະແລະຫ້ອງປ່ຽນເຄື່ອງ 2 ຫຼັງ,ຂົວອູ່, ຂົວຊີມັງ, ທາງຍ່າງພາຍໃນ, ຕັ່ງນັ່ງຜັກຜ່ອນແລະເສົາໄຟເຍືອງທາງ, ປູກຕົ້ນໄມ້ໃຫ້ຮົ່ມ, ເດີ່ນຫຍ້າແລະຈຸດຊົມວິວນໍ້າຕົກ, ຍານພາຫະນະແລະອຸປະກອນເກັບມ້ຽນຂີ້ເຫຍື້ອ; ລະບົບຂາຍປີ້ດີຈີຕອນທີ່ມີລະບົບຂາຍແລະກວດປີ້ແບບທັນສະໄໝຊຶ່ງພາກສ່ວນກ່ຽວຂ້ອງສາມາດຕິດຕາມສະຖິຕິນັກທ່ອງທ່ຽວແລະລາຍຮັບໄດ້ທາງອອນລາຍ.
ໃນໄລຍະປີ 2021-2026 ທີ່ຜ່ານມາ, ADB ໄດ້ໃຫ້ການສະໜັບສະໜູນການປັບປຸງໂຄງລ່າງພື້ນຖານສິ່ງອໍານວຍຄວາມສະດວກດ້ານການທ່ອງທ່ຽວຢູ່ເມືອງວັງວຽງມີມູນຄ່າທັງໝົດ 14,5 ລ້ານໂດລາຊຶ່ງມີ 3 ໂຄງການຍ່ອຍຄື: 1) ປັບປຸງສະໜາມຂີ້ເຫຍື້ອເມືອງວັງວຽງມູນຄ່າ 3.2 ລ້ານໂດລາ; 2) ປັບປຸງເສັ້ນທາງພາຍໃນເທສະບານເມືອງວັງວຽງມູນຄ່າ 2.7 ລ້ານໂດລາ; 3) ປັບປຸງເສັ້ນທາງວົງແຫວນເບື້ອງຕາເວັນຕົກຂອງສາຍນໍ້າຊອງ, ສ້າງຂົວຂ້າມນໍ້າຊອງແລະປັບປຸງເສັ້ນທາງເຂົ້າຕາດແກ້ງຍຸຍລວມມູນຄ່າ 8.6 ລ້ານໂດລາ. ການສະໜັບສະໜູນດັ່ງກ່າວເພື່ອຍົກລະດັບຄຸນນະພາບຂອງການທ່ອງທ່ຽວເມືອງວັງວຽງໃຫ້ເປັນຈຸດໝາຍປາຍທາງການທ່ອງທ່ຽວທີ່ສາມາດເຊື່ອມໂຍງກັບບັນດາປະເທດໃກ້ຄຽງ. ຂ່າວ: ແຂວງວຽງຈັນ
ຄໍາເຫັນ