ຕະຫຼອດໄລຍະການຝຶກອົບຮົມ, ບັນດາສຳມະນາກອນ ໄດ້ເຊື່ອມຊືມເນື້ອໃນເອກະສານທີ່ສໍາຄັນ, ເອົາໃຈໃສ່ຄົ້ນຄວ້າ, ຮ່ຳຮຽນ ໂດຍສະເພາະແມ່ນການຜັນຂະຫຍາຍມະຕິ ສະບັບເລກທີ 62/ຄບສພ, ລົງວັນທີ 09 ກໍລະກົດ 2026 ວ່າດ້ວຍ ການເພີ່ມທະວີການນໍາພາຂອງພັກຕໍ່ວຽກງານກໍ່ສ້າງຮາກຖານການເມືອງ ຕິດພັນກັບວຽກງານຊົນນະບົດ-ແກ້ໄຂຄວາມທຸກຍາກ ແລະ ວຽກສາມສ້າງໄລຍະໃໝ່ແລະມະຕິ, ຂໍ້ກຳນົດ ແລະ ຄຳແນະນຳຕ່າງໆທີ່ກ່ຽວຂ້ອງ. ນອກນັ້ນ ໄດ້ຄົ້ນຄວ້າການແບ່ງຂັ້ນຄຸ້ມຄອງ ລະຫວ່າງເມືອງ, ບັນດາຫ້ອງການ ແລະ ຕາແສງ, ບ້ານ ໃຫ້ລະອຽດຈະແຈ້ງ, ຊ່ວຍປັບປຸງການຈັດຕັ້ງຢູ່ຂັ້ນຕາແສງໃນ 5 ໜ່ວຍງານ ເປັນຕົ້ນ ວຽກງານແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ, ຊ່ວຍເກັບກຳຂໍ້ມູນກ່ຽວກັບຮາກຖານພັກ ທີ່ມີຢູ່ຕາແສງ, ຄົ້ນຄວ້າສ້າງແຜນດໍາເນີນງານແຕ່ນີ້ຈົນຮອດໄລຍະຂອງກອງປະຊຸມໃຫຍ່ ຂັ້ນຕົນໃນປີ 2029 ພ້ອມທັງເນື້ອໃນຈຸດສຸມ ໃຫ້ສອດຄ່ອງກັບແຜນດໍາເນີນງານຂອງເມືອງ, ຄະນະພັກຕາແສງ; ສ້າງ ແລະ ປັບປຸງແຜນດໍາເນີນງານຂອງໜ່ວຍພັກ ຈົນຮອດສະໄໝກອງປະຊຸມໃຫຍ່ຂັ້ນຕົນ ລະຫວ່າງ ເດືອນມັງກອນ ຫາ ເດືອນສິງຫາ 2029. ການຝຶກອົບຮົມຄັ້ງນີ້ ມີຜູ້ເຂົ້າຮ່ວມທັງໝົດ 53 ສະຫາຍ, ຍິງ 10 ສະຫາຍ; ໃນນັ້ນມີຄູຝຶກ 11 ສະຫາຍ, ຍິງ 1 ສະຫາຍ ແລະ ສຳມະນາກອນ 42 ສະຫາຍ, ຍິງ 9 ສະຫາຍ ທີ່ຄັດເລືອກຈາກ ພະແນກການ, ອົງການທຽບເທົ່າ ແລະ ກຳລັງ ປກຊ-ປກສ ຂັ້ນແຂວງ ຕາມມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 344/ຄຈພຂ ສາລະວັນ ລົງວັນທີ 29 ຕຸລາ 2026.
ນອກຈາກນີ້, ຍັງໄດ້ເຊື່ອມຊຶມເນື້ອໃນເອກະສານກ່ຽວກັບ ການຈັດຕັ້ງ ແລະ ການເຄື່ອນໄຫວຂອງອົງຄະນະພັກຮາກຖານຕາແສງ; ວາລະແຫ່ງຊາດ ວ່າດ້ວຍ ການພັດທະນາຊົນນະບົດ ແລະ ແກ້ໄຂຄວາມທຸກຍາກ; ມະຕິ 04ຂອງກົມການເມືອງສູນກາງພັກ ວ່າດ້ວຍ ການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ແລະ ບັນດາມະຕິທີ່ສຳຄັນຕ່າງໆ.
ພິທີປິດຊຸດຝຶກອົບຮົມວຽກງານກໍ່ສ້າງຮາກຖານການເມືອງ ຕິດພັນກັບການມອບພະນັກງານນຳພາ-ຄຸ້ມຄອງ ຂັ້ນແຂວງ ລົງຊ່ວຍວຽກອົງການປົກຄອງເມືອງ ແລະ ຕາແສງ ໃນທົ່ວແຂວງສາລະວັນ, ໄດ້ມີຂຶ້ນໃນວັນທີ 10 ພະຈິກຜ່ານມາ, ທີ່ສະໂມສອນແຂວງ ໂດຍການເປັນປະທານຂອງ ສະຫາຍ ດາວວົງ ພອນແກ້ວ ກຳມະການສູນກາງພັກເລຂາພັກແຂວງປະທານສະພາປະຊາຊົນແຂວງ; ມີບັນດາສະຫາຍຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງແລະພາກສ່ວນກ່ຽວຂ້ອງເຂົ້າຮ່ວມ.
ພາບ-ຂ່າວ: ສ.ພະຈັນ
ຄໍາເຫັນ