 |
ທ່ານ ລີປາວ ໄຊຍະຊ່າງ ຮອງຫົວໜ້າພະແນກ ສກຂ ແຂວງ ໄດ້ຜ່ານບົດສະຫຼຸບການຮຽນ-ການສອນ ວ່າ: ຕະຫຼອດໄລຍະການຮຽນ-ການສອນ ບັນດາຄູ-ອາຈານ ແລະ ພະນັກງານໄດ້ພ້ອມກັນສຸມສະຕິປັນຍາຂອງຕົນເຂົ້າໃນການຮຽນ-ການສອນດ້ວຍຄວາມຮັບຜິດຊອບສູງ, ມີຄວາມຫ້າວຫັນ ຕັ້ງໃຈຄົ້ນຄວ້າຮໍ່າຮຽນ ແລະ ປະ ຕິບັດຕາມໂມງເວລາໄດ້ດີ ເຮັດໃຫ້ຊຸດຝຶກອົບຮົມໃນຄັ້ງນີ້ສຳເລັດຕາມຄາດໝາຍທີ່ວາງໄວ້.
ໂອກາດນີ້, ທ່ານ ອາຈານ ນາງ ຈຸຖິຫຽບ ຄູອາສາສະໝັກ ຈາກນະຄອນບັກນິງ ສສ ຫວຽດນາມ ກ່າວວ່າ: ເພື່ອຈັດຕັ້ງປະຕິບັດສົນທິສັນຍາການຮ່ວມມື ລະຫວ່າງ ນະຄອນບັກນິງ ແລະ ແຂວງໄຊສົມບູນ ເພື່ອເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດລາວ-ຫວຽດນາມ ກໍຄືນະຄອນບັກນິງ ກັບແຂວງໄຊສົມບູນ ໃຫ້ນັບມື້ແໜ້ນແຟ້ນ ຈະເລີນງອກງາມ ໝັ້ນຄົງທະນົງແກ່ນຊົ່ວກາລະນານ ແລະ ເກີດດອກອອກຜົນຢ່າງບໍ່ຢຸດຢັ້ງ.
ການຝຶກອົບຮົມໃນຄັ້ງນີ້, ໄດ້ຮຽນຮູ້ກ່ຽວກັບການຟັງ, ການເວົ້າ-ການອ່ານ ແລະ ການຂຽນ ຊຶ່ງສະແດງອອກດັ່ງນີ້: ນັກຮຽນເກັ່ງຫຼາຍມີ 7 ຄົນ ຍິງ 3 ຄົນ, ນັກຮຽນເກັ່ງມີ 7 ຄົນ ຍິງ 2 ຄົນ, ນັກຮຽນກາງມີ 10 ຄົນ ຍິງ 2 ຄົນ, ນັກຮຽນອ່ອນມີ 3 ຄົນ ຍິງ 0 ຄົນ. ໃນພິທີໄດ້ມອບໃບຍ້ອງຍໍໃຫ້ຄູ-ອາຈານສອນ ພ້ອມທັງມອບໃບ ຢັ້ງຢືນໃຫ້ພະນັກງານທີ່ສຳເລັດການຝຶກອົບຮົມ ຊຶ່ງມີທັງໝົດ 28 ຄົນ ຍິງ 7 ຄົນ ໃຫ້ກຽດມອບຂອງທ່ານ ພຸດລຳໄພ ທຽມພຣະສອນ.
 |
ໂອກາດນີ້, ທ່ານ ພົຈວ ບົວພັນ ອິນທະປັນຍາ ໄດ້ສະແດງຄວາມຍ້ອງຍໍຊົມເຊີຍຕໍ່ອາຈານສອນ ແລະ ນັກຮຽນທີ່ໄດ້ເອົາໃຈໃສ່ຢ່າງຕັ້ງໜ້າໃນການຮຽນ-ການສອນ ຈົນສຳເລັດຕາມຄາດໝາຍ. ພ້ອມທັງຍົກໃຫ້ເຫັນເຖິງຄວາມໝາຍ ຄວາມສຳຄັນຂອງການຮຽນວິຊາພາສາຫວຽດນາມ ເນື່ອງຈາກວ່າ ແຂວງໄຊສົມບູນ ໄດ້ມີການຮ່ວມມືກັບ ສສ ຫວຽດນາມ ຈຶ່ງມີຄວາມຈຳເປັນທີ່ນັກຮຽນຈະຕ້ອງໄດ້ຮຽນຮູ້ພາສາຫວຽດນາມ ເພື່ອສື່ສານກັນໃຫ້ເຂົ້າ ໃຈ ສະແດງໃຫ້ເຫັນເຖິງສາຍພົວພັນໄມຕີຈິດມິດຕະພາບອັນອົບອຸ່ນ ແລະ ຄວາມສາມັກຄີແບບພິເສດ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມໃຫ້ໝັ້ນຄົງຕະຫຼອດໄປ. ພ້ອມທັງຮຽກຮ້ອງໃຫ້ບັນດານັກຮຽນທີ່ຮຽນຮູ້ພາສາຫວຽດນາມ ຈົ່ງນຳເອົາຄວາມຮູ້ທີ່ໄດ້ຈາກການຮຽນ-ການສອນ ໄປໝູນໃຊ້ເຂົ້າໃນວຽກງານຂອງຕົນໃຫ້ເກີດປະໂຫຍດສູງສຸດ. ພາບ-ຂ່າວ: ແກ່ນຈັນ ທຳມະນີ
ຄໍາເຫັນ