ການຈັດງານບຸນນະມັດສະການພະທາດຫຼວງວຽງຈັນແຕ່ລະປີ, ລ້ວນແຕ່ເປັນການສືບສານ ອະນຸລັກ, ຮັກສາ, ມໍຣະດົກທາງດ້ານວັດທະນາທໍາອັນລໍ້າຄ່າ, ຮີດຄອງປະເພນີ ທີ່ສືບທອດກັນມາແຕ່ບູຮານນະການ ທັງເປັນການເສີມຂະຫຍາຍຄຸນຄ່າທາງດ້ານຈິດໃຈໃຫ້ຄົງຢູ່ຄູ່ຄົນລາວ, ຊາດລາວຕະຫຼອດໄປ. ຊຶ່ງງານບຸນນະມັດສະການພະທາດຫຼວງປີນີ້, ນະຄອນຫຼວງວຽງຈັນໄດ້ນຳເອົາສິນຄ້າ ທີ່ເປັນຜະລິດຕະພັນຂອງຄົນລາວເຮັດເອງ ມີຜະລິດຕະພັນຫຼາຍຊະນິດ ເປັນຕົ້ນ ສິນຄ້າໜຶ່ງເມືອງໜຶ່ງຜະລິດຕະພັນ, ສິນຄ້າຄອບຄົວຕົວແບບ ທີ່ຈະກ້າວເປັນສິນຄ້າໂອດັອບ ແລະ ສິນຄ້າຂອງບັນດາວິສາຫະກິດຂະໜາດນ້ອຍ ແລະ ຂະໜາດກາງ ທີ່ໄດ້ມາຮ່ວມວາງສະແດງຈຳໜ່າຍສິນຄ້າພາຍໃນ ແລະ ຕ່າງປະເທດ ໃຫ້ປະຊາຊົນບັນດາເຜົ່າຊາວນະຄອນຫຼວງວຽງຈັນ, ຕ່າງແຂວງ ແລະ ແຂກຕ່າງປະເທດ ໄດ້ເຫັນ ແລະ ຊ່ວຍຊົມໃຊ້ຜະລິດຕະພັນສິນຄ້າລາວ, ພ້ອມທັງເປັນການແລກປ່ຽນບົດຮຽນ ແລະ ປະສົບການຕ່າງໆ ຂອງບັນດາຫົວໜ່ວຍທຸລະກິດດ້ວຍກັນອີກດ້ວຍ.
ທ່ານກ່າວຕື່ມວ່າ: ຈຸດປະສົງລະດັບຄາດໜາຍຂອງການຈັດງານເພື່ອເປັນການຊົມເຊີຍຜົນສຳເລັດກອງປະຊຸມໃຫຍ່ຄັ້ງທີ XII ຂອງພັກ, ກອງປະຊຸມໃຫຍ່ຄັ້ງທີ VIII ຂອງອົງຄະນະພັກນະຄອນຫຼວງວຽງຈັນ, ກອງປະຊຸມ ສະໄໝສາມັນເທື່ອທີ 2ຂອງສະພາແຫ່ງຊາດຊຸດທີ X, ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນນະຄອນຫຼວງວຽງຈັນ ຊຸດທີ V ທັງເປັນການສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດ ໃນປີ 2026 ໃຫ້ເປັນຂະບວນຟົດຟື້ນ, ເພື່ອເປັນການອະນຸລັກ, ປົກປັກຮັກສາ, ສືບສານ ແລະ ສົ່ງເສີມມູນເຊື້ອຮີດຄອງປະເພນີອັນດີງາມໃຫ້ຄົງຢູ່ຄູ່ຄົນລາວ, ຊາດລາວ ແລະ ສ້າງເງື່ອນໄຂໃຫ້ປະຊາຊົນລາວບັນດາເຜົ່າ, ພີ່ນ້ອງຊາວລາວ ທັງພາຍໃນ ແລະ ຕ່າງປະເທດ ໄດ້ມາຮ່ວມກັນນ້ອມນະມັດສະການພະທາດຫຼວງ ເພື່ອເສີມສ້າງຄວາມສາມັກຄີຮັກແພງ ໃຫ້ມີບັນຍາກາດມ່ວນຊື່ນ, ສ້າງໂອກາດຊຸກຍູ້, ສົ່ງເສີມການຜະລິດ, ການຄ້າ ແລະ ການບໍລິການ, ສ້າງຄວາມເຂັ້ມແຂງໃຫ້ສິນຄ້າພາຍໃນ, ເປັນການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ຂອງຊາດ, ຂອງນະຄອນຫຼວງວຽງຈັນ ແລະ ໂຄສະນາເຜີຍແຜ່ວຽກງານທ່ອງທ່ຽວ ເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດມາທ່ຽວຊົມໃຫ້ມີຕົວເລກສະຖິຕິເພີ່ມຂຶ້ນ ແລະ ມີການຈັບຈ່າຍຊື້-ຂາຍຫຼາຍຂຶ້ນ.
ງານດັ່ງກ່າວຈະໄດ້ເລີ່ມຂຶ້ນໃນລະຫວ່າງວັນທີ 20-24 ພະຈິກ 2026 (5ວັນ) ແລະ ມີກິດຈະກໍາດັ່ງນີ້: ວັນທີ 20 ພະຈິກພິທີເປີດງານບຸນນະມັດສະການພະທາດຫຼວງ ປີ 2026, ວັນທີ 23 ພະຈິກ ພິທີແຫ່ຜາສາດ ເຜິ້ງ, ວັນທີ 24 ພະຈິກພິທີໃສ່ບາດຖວາຍສັງຂະທານ, ແຂ່ງຂັນກິລາພື້ນບ້ານຕີຄີ ແລະ ຕອນຄໍ່າມີພິທີວຽນທຽນ, ຈູດທູບທຽນ, ຈູດບັ້ງໄຟສັກກະລະບູຊາອົງພະທາດ ແລະ ຄົບງັນຕາມຮີດຄອງປະເພນີ ທີ່ເຄີຍປະຕິບັດກັນມາເປັນມື້ປິດງານ, ພາຍໃນງານຈະມີການສະແດງສິລະປະ-ວັນນະຄະດີ, ການສະແດງຟ້ອນ, ຂັບລຳຈາກກອງສິລະປະກອນສູນກາງ, ສິລະປະກອນກອງທັບ, ສິລະປະຈາກບັນດາເມືອງ 9 ຕົວເມືອງພາຍໃນນະຄອນຫຼວງວຽງຈັນ, ສູນວັດທະນະທຳເດັກ ແລະ ສະໂມສອນດ່ານຊ້າງ ເພື່ອເຂົ້າຮ່ວມການສະແດງໃນແຕ່ລະວັນ.
(ຂ່າວ-ພາບ: ຍຸພິນທອງ)
ຄໍາເຫັນ