 |
ການຈັດງານຄັ້ງນີ້, ເພື່ອເປັນການເພີ່ມທະວີສາຍພົວພັນມິດຕະພາບອັນດີງາມທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ຄວາມໝັ້ນຄົງລະຫວ່າງຫວຽດນາມ-ກຳປູເຈຍ-ລາວ ແມ່ນຊັບສົມບັດອັນ ລໍ້າຄ່າທີ່ບັນດາທ່ານຜູ້ນຳ, ປະຊາຊົນ ແລະ ຊາວໜຸ່ມຂອງສາມປະເທດໄດ້ຮ່ວມກັນສ້າງສາ, ຖະນຸຖະໜອມ ແລະ ຮັກສາໄວ້ຕະຫຼອດມາ, ສືບທອດມູນເຊື້ອອັນດີງາມ, ໃນໄລຍະໃໝ່ແຫ່ງການພັດທະນາ, ການເພີ່ມທະວີການແລກປ່ຽນ, ຄວາມເຂົ້າໃຈຊຶ່ງກັນ ແລະ ກັນ, ການຮ່ວມມືລະຫວ່າງຊາວໜຸ່ມທັງ 3 ປະເທດ ຊຶ່ງເປັນການປະກອບສ່ວນ ເຮັດໃຫ້ບັນດາຂໍ້ຕົກລົງຂັ້ນສູງລະຫວ່າງຜູ້ນຳພັກ ແລະ ລັດຖະບານຂອງສາມປະເທດກາຍເປັນຮູບປະທຳ. ງານພົບປະມິດຕະພາບໃນຄັ້ງນີ້, ເປັນໂອກາດທີ່ດີໃຫ້ຊາວໜຸ່ມຂອງສາມປະ ເທດໄດ້ພົບປະ, ແລກປ່ຽນ, ແບ່ງປັນ ແລະ ເສີມສ້າງຄວາມສາມັກຄີໃຫ້ແໜ້ນແຟ້ນຍິ່ງໆຂຶ້ນ. ພ້ອມກັນນັ້ນ, ຍັງເປັນການຢັ້ງຢືນເຖິງຄວາມຮັບຜິດຊອບ ແລະ ຄວາມມຸ່ງໜັ້ນຂອງຊາວໜຸ່ມຮຸ່ນໃໝ່ໃນການສືບທອດ, ຖະນຸຖະໜອມ ແລະ ພັດທະນາສາຍພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ ສາມຊາດໃຫ້ນັບມື້ນັບເຂັ້ມແຂງ.
 |
ຜູ້ແທນທີ່ເຂົ້າຮ່ວມງານບຸນມະໂຫລານຊາວໜຸ່ມຫວຽດນາມ-ກຳປູເຈຍ-ລາວ ປີ 2026 ແມ່ນໄດ້ເຂົ້າຮ່ວມຫຼາກຫຼາຍກິດຈະກຳ ແລະ ມີຄວາມໝາຍຄວາມສຳຄັນເປັນຕົ້ນແມ່ນກອງປະຊຸມສຳມະນາແລກປ່ຽນພາຍໃຕ້ຫົວຂໍ້: "ຊາວໜຸ່ມຫວຽດນາມ-ກຳປູເຈຍ-ລາວ ຮ່ວມກັນສ້າງເຂດຊາຍແດນແຫ່ງມິດຕະພາບ, ການຮ່ວມມື ແລະ ການພັດທະນາທີ່ຍືນຍົງ", ການຢ້ຽມຊົມສະຖານທີ່ທາງປະຫວັດສາດ, ອຸດສາຫະກຳ, ກະສິ ກຳ, ການຮຽນຮູ້ວັດທະນະທຳປະເພນີ, ການແລກປ່ຽນລາຍການສະແດງສິລະປະ, ການເຂົ້າຮ່ວມແລກປ່ຽນກິດຈະກຳຮ່ວມກັນ. ກິດຈະກຳເຫຼົ່ານີ້ ເປັນໂອກາດໃນການສ້າງໄມຕີຈິດມິດຕະພາບອັນໃໝ່ໃຫ້ເກີດຂຶ້ນ, ຄວາມຮັກແພງໄດ້ຮັບການຖະນຸຖະໜອມ ແລະ ຄວາມປາຖະໜາຮ່ວມກັນ ໄດ້ຮັບການເຜີຍແຜ່ຢ່າງກວ້າງ ຂວາງ, ປະສົບການອັນມີຄ່າ ແລະ ສາຍພົວພັນທີ່ໄດ້ສ້າງຂຶ້ນໃນງາມພົບປະຄັ້ງນີ້ ຈະກາຍເປັນພື້ນຖານສຳຄັນສຳລັບບັນດາຂໍ້ລິເລີ່ມ ແລະ ກິດຈະກຳຮ່ວມມືກັນຢ່າງເປັນຮູບປະທຳ ປະກອບສ່ວນສ້າງຊາວໜຸ່ມຮຸ່ນໃໝ່ທັງສາມປະເທດໃຫ້ມີຄວາມສາມັກຄີ, ຄວາມຜູກພັນອັນແໜ້ນແຟ້ນ ແລະ ຮ່ວມແຮງຮ່ວມໃຈກັນສ້າງສາມຊາດອິນດູຈີນ ທີ່ມີສັນຕິພາບ, ມິດຕະພາບ ແລະ ການພັດທະນາທີ່ຍືນຍົງ. ຈາກນັ້ນ, ຜູ້ຕາງໜ້າຜູ້ແທນຊາວໜຸ່ມທັງສາມເທດ ຍັງໄດ້ເຂົ້າພົບປະລາຍງານການນຳແຂວງກວາງຫງາຍ ສສ ຫວຽດນາມ ເປັນກຽດຕ້ອນຮັບໂດຍ ທ່ານ ອູ່ ຮວັນ ພ້ອມດ້ວຍຄະນະ ເພື່ອລາຍງານການເຂົ້າຮ່ວມໃນການຈັດຕັ້ງປະຕິບັດກິດຈະກຳ, ບົດຮຽນທີ່ຖອດຖອນໄດ້ ກໍຄືສະພາບການເຂົ້າຮ່ວມງານບຸນມະໂຫລານຊາວໜຸ່ມໃນຄັ້ງນີ້.
ຂ່າວ: ສຊປລ
ຄໍາເຫັນ