 |
ສປປ ລາວ ເປັນທັງປະເທດຕົ້ນທາງ, ທາງຜ່ານ ແລະ ປາຍທາງສຳລັບການເຄື່ອນຍ້າຍຖິ່ນຖານສາກົນໃນໄລຍະຜ່ານມາໄດ້ມີການເຄື່ອນຍ້າຍເຂົ້າມາສູ່ ສປປ ລາວ ແລະ ເຄື່ອນຍ້າຍໄປອອກແຮງງານ ແລະ ອາໄສ ຢູ່ຕ່າງປະເທດ ເພື່ອຊອກຫາໂອກາດໃໝ່ສຳລັບຊອກວຽກເຮັດງານທຳ ເປັນຈຳນວນຫຼວງຫຼາຍ. ສະນັ້ນ, ເພື່ອຮັບປະກັນໃຫ້ການຍົກຍ້າຍຖິ່ນຖານດຳເນີນໄປຜ່ານຊ່ອງທາງທີ່ປອດໄພ, ເປັນລະບຽບ ແລະ ຖືກຕ້ອງຕາມກົດໝາຍ, ພ້ອມທັງປົກປ້ອງ ແລະ ສົ່ງເສີມສິດທິຂອງແຮງງານເຄື່ອນຍ້າຍ, ລັດຖະບານ ແຫ່ງ ສປປ ລາວ ພາຍໃຕ້ການສະໜັບສະໜູນຈາກ ອົງການສາກົນເພື່ອການເຄື່ອນຍ້າຍຖິ່ນຖານ ຈຶ່ງໄດ້ຮັບຮອງເອົາແຜນປະຕິບັດງານແຫ່ງຊາດ ໃນການຈັດຕັ້ງປະຕິບັດຂໍ້ຕົກລົງສາກົນ ວ່າດ້ວຍການເຄື່ອນຍ້າຍຖິ່ນຖານທີ່ປອດໄພ, ເປັນລະບຽບ ແລະ ປົກກະຕິ (2026-2030) ນີ້ ຊຶ່ງແຜນດັ່ງກ່າວກວມເອົາ 9 ຂົງເຂດວຽກງານ (ແບ່ງເປັນຂົງເຂດວຽກງານລວມສູນ ແລະ ຂົງເຂດວຽກງານສະເພາະ) ພາຍໃຕ້ວິໄສທັດ “ການເຄື່ອນຍ້າຍຖິ່ນຖານຄວນເປັນທາງເລືອກໜຶ່ງ ແລະ ແຮງງານທຸກຄົນສາມາດເຂົ້າເຖິງວຽກເຮັດງານທຳທີ່ມີກຽດ ແລະ ສະຫວັດດີການສັງຄົມ”.
 |
ພິທີຄັ້ງນີ້, ຖືເປັນບາດກ້າວອັນສໍາຄັນ ຊຶ່ງຍົກໃຫ້ເຫັນຄວາມພະຍາຍາມຂອງ ສປປ ລາວ ໃນການຈັດຕັ້ງປະຕິບັດຂໍ້ຕົກລົງສາກົນ ວ່າດ້ວຍການຍົກຍ້າຍຖິ່ນຖານ ໃຫ້ສອດຄ່ອງກັບບຸລິມະສິດແຫ່ງຊາດ. ໃນພິທີທາງການ, ທ່ານຮອງລັດຖະມົນຕີໄດ້ກ່າວມີຄຳເຫັນ ໂດຍໄດ້ເນັ້ນໜັກວ່າການເຄື່ອນຍ້າຍຖິ່ນຖານແມ່ນວຽກງານໜຶ່ງທີ່ສໍາຄັນ ແລະ ໄດ້ປະກອບສ່ວນເຂົ້າໃນວຽກງານການພັດທະນາເສດຖະກິດ-ສັງຄົມຂອງ ສປປ ລາວ ຕະຫຼອດມາ, ການຄຸ້ມຄອງແຮງງານເຄື່ອນຍ້າຍທີ່ມີປະສິດທິພາບຈະສາມາດປະກອບສ່ວນຢ່າງຕັ້ງໜ້າເຂົ້າໃນການພັດທະນາຊັບພະຍາກອນມະນຸດ ແລະ ການພັດທະນາແບບຍືນຍົງຂອງຊາດ ໂດຍສະເພາະໃນໄລຍະທີ່ ສປປ ລາວ ພວມຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 10 (2026-2030) ແລະ ກຽມພ້ອມໃຫ້ແກ່ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນເດືອນພະຈິກ 2026 ນີ້ ແລະ ເຂົ້າສູ່ໄລຍະຂ້າມຜ່ານເພື່ອການຫຼຸດພົ້ນ ຢ່າງໂລ່ງລ່ຽນ, ມີຄຸນນະພາບ ແລະ ຍືນຍົງ.
 |
(ຂ່າວ: ກຕທ)
ຄໍາເຫັນ