 |
ກອງປະຊຸມປີນີ້ ຈັດຂຶ້ນເນື່ອງໃນໂອກາດວັນເຄຫາສະຖານໂລກ ປີ 2026 (World Habitat Day 2026) ພາຍໃຕ້ຫົວຂໍ້ “ການເຊື່ອມສານເປົ້າໝາຍການພັດທະນາແບບຍືນຍົງເຂົ້າສູ່ຂັ້ນທ້ອງຖິ່ນ: ເພື່ອສ້າງຕົວເມືອງສີຂຽວ, ທົນທານ ແລະ ນະວັດຕະກຳ”. ເວທີດັ່ງກ່າວມີ 3 ຈຸດປະສົງຫຼັກ ຄື: ແລກປ່ຽນບົດຮຽນ ແລະ ຕົວແບບທີ່ດີໃນການນຳເອົາເປົ້າໝາຍການພັດທະນາແບບຍືນຍົງ (SDGs) ໂດຍສະເພາະເປົ້າໝາຍທີ 11 ວ່າດ້ວຍຕົວເມືອງ ແລະ ຊຸມຊົນທີ່ຍືນຍົງ ໄປປະຕິບັດຢູ່ທ້ອງຖິ່ນ; ກຳນົດບັນຫາບຸລິມະສິດ ແລະ ຄວາມຕ້ອງການດ້ານວິຊາການ, ທຶນຮອນ ແລະ ການຍົກລະດັບຂີດຄວາມສາມາດ; ພ້ອມທັງສ້າງຄວາມເປັນເອກະພາບໃນການເຊື່ອມສານ SDGs ເຂົ້າກັບແຜນພັດທະນາຂອງຂະແໜງການ ແລະ ທ້ອງຖິ່ນ.
ທ່ານ ເຫຼັກໄຫຼ ສີວິໄລ ກ່າວວ່າ: ເວທີຕົວເມືອງແຫ່ງຊາດເປັນກົນໄກສຳຄັນໃນການກຳນົດທິດທາງ ແລະ ຊອກຫາແນວທາງແກ້ໄຂບັນຫາການພັດທະນາຕົວເມືອງ. ປັດຈຸບັນ ອັດຕາການຫັນເປັນຕົວເມືອງຂອງ ສປປ ລາວ ເພີ່ມຂຶ້ນຢູ່ລະດັບ 38-40% ເຮັດໃຫ້ຕົວເມືອງກາຍເປັນກຳລັງສຳຄັນໃນການຂັບເຄື່ອນເສດຖະກິດຂອງຊາດ. ແຕ່ຂະນະດຽວກັນ, ກໍຍັງມີສິ່ງທ້າທາຍຫຼາຍດ້ານ ເຊັ່ນ: ການຂະຫຍາຍຕົວຂອງເມືອງຢ່າງບໍ່ເປັນລະບົບ, ມົນລະພິດສິ່ງແວດລ້ອມ, ການຈັດການສິ່ງເສດເຫຼືອ ແລະ ຄວາມສ່ຽງຈາກໄພພິບັດ.
ທ່ານລັດຖະມົນຕີ ໄດ້ສະເໜີ 5 ບັນຫາບຸລິມະສິດໃຫ້ກອງປະຊຸມສຸມໃສ່ປຶກສາຫາລື ປະກອບມີ: ການຮັບປະກັນທີ່ຢູ່ອາໄສ ໂດຍຜັນຂະຫຍາຍກົດໝາຍວ່າດ້ວຍທີ່ຢູ່ອາໄສ ເລກທີ 71/ສພຊ, ລົງວັນທີ 11 ທັນວາ 2024 ເພື່ອໃຫ້ປະຊາຊົນເຂົ້າເຖິງທີ່ຢູ່ອາໄສທີ່ປອດໄພ, ຖືກສຸຂະອະນາໄມ, ມີລາຄາເໝາະສົມ ແລະ ເປັນມິດຕໍ່ສິ່ງແວດລ້ອມ.
 |
ການພັດທະນາໂຄງລ່າງພື້ນຖານທີ່ທົນທານ ໂດຍເນັ້ນລະບົບລະບາຍນ້ຳ, ການປ້ອງກັນຕາຝັ່ງເຈື່ອນ ແລະ ການອະນຸລັກເຂດຊຸ່ມຊື່ນໃນຕົວເມືອງ. ການຄຸ້ມຄອງສິ່ງເສດເຫຼືອແບບປະສົມປະສານ ແລະ ສົ່ງເສີມເສດຖະກິດໝູນວຽນ ເພື່ອຫຼຸດຜ່ອນມົນລະພິດ ແລະ ຍົກລະດັບການຈັດການຂີ້ເຫຍື້ອຕາມທິດສີຂຽວ.ການພັດທະນາຕົວເມືອງອັດສະລິຍະ (Smart City) ໂດຍນຳໃຊ້ຂໍ້ມູນຜັງເມືອງດີຈີຕອນ ແລະ ຕົວເມືອງຈຳລອງ 3 ມິຕິ ເພື່ອຍົກລະດັບການບໍລິຫານລັດໃຫ້ທັນສະໄໝ, ວ່ອງໄວ ແລະ ໂປ່ງໃສ. ການເສີມສ້າງຄວາມເປັນເຈົ້າການ ແລະ ການຮ່ວມມື ລະຫວ່າງພາກລັດ, ເອກະຊົນ, ຊຸມຊົນ ແລະ ຄູ່ຮ່ວມພັດທະນາສາກົນ.
ນອກຈາກນີ້, ທ່ານລັດຖະມົນຕີຍັງໄດ້ກ່າວເນັ້ນເຖິງ 3 ເສົາຄໍ້າຍຸດທະສາດຂອງການພັດທະນາຕົວເມືອງໃນປີນີ້ ຄື: ການສ້າງຕົວເມືອງສີຂຽວ ດ້ວຍການເພີ່ມພື້ນທີ່ສີຂຽວ ແລະ ສົ່ງເສີມເສດຖະກິດໝູນວຽນ; ການສ້າງຕົວເມືອງທົນທານ ໂດຍນຳໃຊ້ແນວທາງແກ້ໄຂທີ່ອີງໃສ່ທຳມະຊາດແລະ ການສ້າງຕົວເມືອງອັດສະລິຍະ ຜ່ານການປະຍຸກໃຊ້ເຕັກໂນໂລຊີ, ລະບົບຂໍ້ມູນພູມສາດ (GIS) ແລະ ລະບົບດີຈີຕອນ.ພ້ອມນີ້, ທ່ານຍັງໄດ້ຮຽກຮ້ອງໃຫ້ທຸກພາກສ່ວນປະກອບຄຳຄິດຄຳເຫັນຢ່າງກົງໄປກົງມາ, ສ້າງສັນ ແລະ ເປັນຮູບປະທຳ ໂດຍມຸ່ງເນັ້ນວ່າ ແຕ່ລະພາກສ່ວນຈະສາມາດມີສ່ວນຮ່ວມພັດທະນາຕົວເມືອງໃຫ້ສະອາດ, ປອດໄພ, ທົນທານ ແລະ ໜ້າຢູ່ສຳລັບທຸກຄົນໄດ້ແນວໃດ.
ພາຍໃນກອງປະຊຸມ ມີການນຳສະເໜີຫົວຂໍ້ຫຼັກຈາກກົມເຄຫາ ແລະ ຜັງເມືອງ ແລະ UN-Habitat, ພ້ອມຈັດເວທີສົນທະນາ 3 ຫົວຂໍ້ ຄື: ຕົວເມືອງສີຂຽວ, ຕົວເມືອງທົນທານ ແລະ ຕົວເມືອງນະວັດຕະກຳ ໂດຍມີຜູ້ຕາງໜ້າຈາກທ້ອງຖິ່ນ, ຄູ່ຮ່ວມພັດທະນາ ແລະ ພາກເອກະຊົນ ຮ່ວມແລກປ່ຽນປະສົບການ. ພ້ອມນັ້ນ, ຍັງມີການວາງສະແດງຜົນງານ ແລະ ນະວັດຕະກຳດ້ານການພັດທະນາຕົວເມືອງ, ການສຳຫຼວດ ແລະ ອອກແບບ, ການກໍ່ສ້າງໂຄງລ່າງພື້ນຖານ ແລະ ການປັບປຸງສິ່ງແວດລ້ອມຕົວເມືອງ.
 |
ຜົນສຳເລັດສຳຄັນຂອງກອງປະຊຸມ ແມ່ນການເຫັນດີຕໍ່ຖະແຫຼງການຮຽກຮ້ອງ LNUF 2026 ວ່າດ້ວຍການເຊື່ອມສານ SDGs ເຂົ້າສູ່ທ້ອງຖິ່ນ, ພ້ອມທັງບັນດາຂໍ້ສະເໜີທີ່ໄດ້ຈາກການປຶກສາຫາລື.ໃນພິທີໄດ້ມີການລົງນາມເຊັນບົດບັນທຶກຄວາມເຂົ້າໃຈ (MOU) ລະຫວ່າງກົມເຄຫາ ແລະ ຜັງເມືອງ ກັບບໍລິສັດ ຢູນິກເທັກ ຈຳກັດ ເພື່ອເປີດກວ້າງການຮ່ວມມືກັບພາກເອກະຊົນໃນວຽກງານພັດທະນາຕົວເມືອງ.
ກອງປະຊຸມເວທີຕົວເມືອງແຫ່ງຊາດລາວ ຄັ້ງທີ 5 ຖືເປັນອີກບາດກ້າວສຳຄັນໃນການຜັນຂະຫຍາຍວາລະການພັດທະນາຕົວເມືອງໃໝ່ (New Urban Agenda) ແລະ ເປົ້າໝາຍການພັດທະນາແບບຍືນຍົງ ເປົ້າໝາຍທີ 11 (SDG 11) ໃຫ້ເກີດຜົນເປັນຮູບປະທຳຢູ່ທ້ອງຖິ່ນ ເພື່ອສ້າງຕົວເມືອງລາວໃຫ້ໜ້າຢູ່, ປອດໄພ, ທົນທານ ແລະ ຍືນຍົງ.
ແຫຼ່ງຂ່າວ: ກະຊວງ ຍທຂ
ຄໍາເຫັນ