 |
ທ່ານ ນາງ ແກ້ວວິວອນ ອຸດທະຈັກ ໄດ້ສະແດງຄວາມຊົມເຊີຍຜົນສຳເລັດຂອງກອງປະຊຸມຄົບຄະນະ ຄັ້ງທີ 5 ຂອງຄະນະບໍລິຫານງານສູນກາງພັກກອມມູນິດຈີນ ສະໄໝທີ XX ແລະ ຕີລາຄາສູງ ຕໍ່ຜົນງານການນຳພາຂອງສະຫາຍ ສີຈິ້ນຜິງ ໃນການຄຸ້ມຄອງພັກຢ່າງເຂັ້ມງວດ ທ່ານກ່າວວ່າ: ກອງປະຊຸມຄັ້ງນີ້, ແມ່ນ "ການຄຸ້ມຄອງພັກ ເພື່ອສ້າງຊາດໃຫ້ຈະເລີນ" ໄດ້ສະທ້ອນໃຫ້ພວກເຮົາເຫັນຢ່າງເລິກເຊິ່ງ ເຖິງບົດຮຽນອັນລໍ້າຄ່າ ທີ່ທັງສອງພັກໄດ້ສະສົມມາຈາກການຕໍ່ສູ້ ແລະ ການສ້າງສາປະເທດຊາດ. ພັກປະຊາຊົນປະຕິວັດລາວ ແລະ ພັກກອມມູນິດຈີນ ລ້ວນແຕ່ເລີ່ມຕົ້ນຈາກການເປັນພັກນ້ອຍໆ ທີ່ຕໍ່ສູ້ເພື່ອປົດປ່ອຍຊາດ ຈົນກາຍເປັນພັກທີ່ນໍາພາການສ້າງສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ. ບົດຮຽນ ທີ່ສໍາຄັນລ້ຳຄ່າທີ່ສຸດ ກໍຄື: ການຄຸ້ມຄອງພັກທີ່ເຂັ້ມແຂງ ແລະ ໂປ່ງໃສ ແມ່ນປັດໄຈຕັດສິນຕໍ່ຄວາມສໍາເລັດຂອງການສ້າງຊາດໃຫ້ຈະເລີນ. ຊຶ່ງສະຫາຍ ສີຈິ້ນຜິງ ໄດ້ເນັ້ນໜັກວ່າ: “ການຄຸ້ມຄອງ ແລະ ກໍ່ສ້າງພັກຍິ່ງມີປະສິດທິຜົນເທົ່າໃດ ການຄ້ຳປະກັນໃຫ້ການພັດທະນາເສດຖະກິດ-ສັງຄົມ ກໍຍິ່ງມີຄວາມເຂັ້ມແຂງເທົ່ານັ້ນ” ຖືເປັນບົດຮຽນທີ່ມີຄຸນຄ່າຢ່າງຍິ່ງ ສໍາລັບການກໍ່ສ້າງພັກ ແລະ ສ້າງສາພັດທະນາປະເທດຊາດ.
ທ່ານ ນາງ ຟາງ ຫົງ ກ່າວວ່າ: ກອງປະຊຸມຄົບຄະນະຄັ້ງທີ 5 ຂອງຄະນະກໍາມະການສູນກາງພັກກອມມູນິດຈີນ ສະໄໝທີ XX ໄດ້ຈັດຂຶ້ນຢ່າງສົມກຽດ ທີ່ນະຄອນຫຼວງປັກກິ່ງ, ກອງປະຊຸມໄດ້ຄົ້ນຄວ້າ ແລະ ຮັບຮອງເອົາ "ມະຕິຂອງສູນກາງພັກກອມມູນິດຈີນ ກ່ຽວກັບບັນຫາສໍາຄັນຈໍານວນໜຶ່ງ ໃນການຊຸກຍູ້ການຄຸ້ມຄອງພັກຢ່າງເຂັ້ມງວດ ຮອບດ້ານຢ່າງສະເໝີຕົ້ນສະເໝີປາຍ" ຊຶ່ງໄດ້ວາງທິດທາງຢ່າງເປັນລະບົບ ເພື່ອເພີ່ມທະວີການກໍ່ສ້າງພັກ ແລະ ລົງເລິກຊຸກຍູ້ການຄຸ້ມຄອງພັກຢ່າງເຂັ້ມງວດ ຮອບດ້ານໃນສະພາບການໃໝ່, ຈີນ-ລາວ ລ້ວນແຕ່ແມ່ນປະ ເທດສັງຄົມນິຍົມທີ່ນໍາພາໂດຍພັກກອມມູນິດ, ທັງສອງພັກ ຕ່າງກໍປະເຊີນກັບຫົວຂໍ້ທີ່ມີຄວາມສົນໃຈນໍາກັນຈຳນວນຫຼາຍ, ທັງໄດ້ແລກປ່ຽນບົດຮຽນ ແລະ ຮຽນຮູ້ຊຶ່ງກັນ ແລະ ກັນຢ່າງເປັນປະຈຳ, ເຊື່ອວ່າບັນດາທ່ານລ້ວນແຕ່ໃຫ້ຄວາມສົນໃຈຕໍ່ກອງປະຊຸມສໍາຄັນຄັ້ງນີ້ ແລະ ໄດ້ຮັບຮູ້ຂໍ້ມູນພື້ນຖານຂອງກອງປະຊຸມ ຜ່ານການລາຍງານຂອງສື່ມວນຊົນມາແລ້ວ.
ໂອກາດນີ້, ຂໍແບ່ງປັນຄວາມຮູ້ສຶກ ແລະ ບົດຮຽນ ການຮຽນຮູ້ຂອງຕົນເອງໂດຍສະເໜີເນື້ອໃນຕົ້ນຕໍຂອງກອງປະຊຸມຄົບຄະນະຄັ້ງທີ 5 ສະໄໝທີ XX ຂອງພັກກອມມູນິດຈີນ ໃນ 4 ດ້ານດັ່ງນີ້: ໜຶ່ງ, ເປັນຫຍັງກອງປະ ຊຸມຄົບຄະນະ ຈຶ່ງຄົ້ນຄວ້າກ່ຽວກັບການຊຸກຍູ້ ການຄຸ້ມຄອງພັກຢ່າງເຂັ້ມງວດ ຮອບດ້ານຢ່າງສະເໝີຕົ້ນສະເໝີ ປາຍ; ສອງ "ມະຕິ" ທີ່ກອງປະຊຸມຄົບຄະນະ ໄດ້ຮັບຮອງເອົານັ້ນໄດ້ສ້າງຂຶ້ນຄືແນວໃດ; ສາມ ຈະເຂົ້າໃຈ ແລະ ກຳທິດທາງລວມຂອງ "ມະຕິ" ແນວໃດ; ສີ່ ສົມກັບເປັນທິດທາງສໍາຄັນໃນການເພີ່ມທະວີ ການກໍ່ສ້າງພັກຂອງຝ່າຍລາວ, ສະເໜີບັນດາແຜນການທີ່ສໍາຄັນຂອງ "ມະຕິ" ໃນການຊຸກຍູ້ ການຄຸ້ມຄອງພັກຢ່າງເຂັ້ມງວດ ຮອບດ້ານຢ່າງສະເໝີຕົ້ນສະເໝີປາຍ. ຫວັງວ່າ ຜ່ານການລົງເລິກການແລກປ່ຽນຄັ້ງນີ້ ຈະສາມາດຖອດຖອນບົດຮຽນ ແລະ ສ້າງແຮງບັນດານໃຈໃຫ້ກັນ ແລະ ກັນ.
ຂ່າວ-ພາບ: ບຸນຕອມ
ຄໍາເຫັນ