ສະຫາຍ ນາງ ຟ່າງ ຫົງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປ ຈີນ ປະຈຳ ສປປ ລາວ ໄດ້ໃຫ້ສຳພາດຕໍ່ສື່ມວນຊົນ ເມື່ອບໍ່ດົນມານີ້, ກ່ຽວກັບການແລກປ່ຽນບົດຮຽນການບໍລິຫານປະເທດ ຈີນ-ລາວ ແມ່ນເນື້ອໃນສໍາຄັນຂອງການສ້າງຄູ່ຮ່ວມຊາຕາກຳ ຈີນ-ລາວ; ຈີນ-ລາວ ລ້ວນແມ່ນປະເທດສັງຄົມນິຍົມທີ່ນໍາພາໂດຍພັກກອມມູນິດ, ແມ່ນສາຍພົວພັນພິເສດແບບສະຫາຍ, ອ້າຍນ້ອງ ພາຍໃຕ້ການນໍາພາທາງຍຸດທະສາດຂອງ ສະຫາຍ ເລຂາທິການໃຫຍ່ ປະທານປະເທດ ສີ ຈິ້ນຜິງ ແລະ ສະຫາຍ ເລຂາທິການໃຫຍ່,ປະທານປະເທດ ທອງລຸນ ສີສຸລິດ, ສອງຝ່າຍໄດ້ສຸມໃສ່ການສ້າງສາຄູ່ຮ່ວມຊາຕາກຳ ຈີນ-ລາວ ແບບຄົບຊຸດໃນຍຸກໃໝ່, ການເພີ່ມທະວີການແລກປ່ຽນບົດຮຽນການບໍລິຫານປະເທດແມ່ນສ່ວນປະກອບສໍາຄັນ, ໂດຍຜ່ານການພົບປະລະດັບສູງ, ການສໍາມະນາທິດສະດີ, ການປາຖະກາຖາຂອງຜູ້ຊ່ຽວຊານ, ການຝຶກອົບຮົມພະນັກງານ ແລະ ຮູບແບບອື່ນໆ, ຈີນ ແລະ ລາວ ໄດ້ເພີ່ມທະວີການແລກປ່ຽນບົດຮຽນ, ຮຽນຮູ້ບົດຮຽນອັນທີ່ມີປະໂຫຍດຂອງກັນ ແລະ ກັນ ຊຶ່ງໄດ້ຂະຫຍາຍບົດບາດຢ່າງຕັ້ງໜ້າໃນການຍົກລະດັບຄວາມສາມາດດ້ານການບໍລິຫານ ແລະ ການຮັດແໜ້ນຖານະການກໍາອໍານາດຂອງພັກຕົນ.
ທ່ານທູດກ່າວຕື່ມວ່າ: ໃນການໂຄສະນາເຜີຍແຜ່ນັບຕັ້ງແຕ່ກອງປະຊຸມໃຫຍ່ຄັ້ງທີ XII ຂອງພັກປະຊາຊົນ ປະຕິວັດລາວ ເປັນຕົ້ນມາ, ຄະນະບໍລິຫານງານສູນກາງພັກ ປປ ລາວ ຊຸດໃໝ່ ໄດ້ໃຫ້ຄວາມສໍາຄັນຢ່າງສູງຕໍ່ການເພີ່ມທະວີການກໍ່ສ້າງພັກ, ໄດ້ຈັດກອງປະຊຸມສໍາຄັນຫຼາຍຄັ້ງ, ວາງທິດທາງຫຼາຍຢ່າງກ່ຽວກັບການເພີ່ມທະວີການສ້າງແບບແຜນຂອງພັກ, ການສ້າງການຈັດຕັ້ງ, ວຽກງານໂຄສະນາ ແລະ ອື່ນໆ ຊຶ່ງໄດ້ຮັບຜົນສໍາເລັດຢ່າງຕັ້ງໜ້າ, ຝ່າຍຈີນຕີລາຄາຢ່າງສູງຕໍ່ສະພາບການເມືອງ ແລະ ເສດຖະກິດໃນທົ່ວໂລກໃນປັດຈຸບັນໄດ້ພິສູດໃຫ້ເຫັນວ່າ ເສັ້ນທາງສັງຄົມນິຍົມ ແລະ ການເລືອກລະບອບລະບຽບທີ່ຈີນ ແລະ ລາວ ຢຶດໝັ້ນນັ້ນ ແມ່ນຖືກຕ້ອງທີ່ສຸດ. ໃນຂັ້ນຕອນຕໍ່ໄປ, ພວກເຮົາ ຍິນດີຮ່ວມກັບຝ່າຍລາວຖືເອົາຄວາມເຫັນດີເຫັນພ້ອມທາງຍຸດທະສາດທີ່ຜູ້ນໍາສູງສຸດ ຂອງສອງພັກ, ສອງປະເທດ ໄດ້ ບັນລຸນໍາກັນນັ້ນເປັນທິດທາງນໍາພາ, ເພີ່ມທະວີການແລກປ່ຽນ ແລະ ຮຽນຮູ້ບົດຮຽນໃນການຄຸ້ມຄອງພັກ ແລະ ບໍລິຫານປະເທດໃນທຸກດ້ານ, ສືບຕໍ່ເພີ່ມເນື້ອໃນຍຸກໃໝ່ໃຫ້ແກ່ຄູ່ຮ່ວມຊາຕາກຳ ຈີນ-ລາວ, ຊຸກຍູ້ຂະບວນການຫັນເປັນທັນສະໄໝຂອງປະເທດຕົນ, ພ້ອມທັງເພີ່ມກຳລັງແຮງໃໝ່ໃຫ້ແກ່ການຟື້ນຟູພາລະກິດສັງຄົມນິຍົມຂອງໂລກ, ເຮັດໃຫ້ລັດທິມາກ ມີຊີວິດຊີວາໃນສະຕະວັດທີ 21, ເວົ້າສະເພາະ ໃນທ້າຍປີນີ້ຫາຕົ້ນປີໜ້າ ສອງຝ່າຍຍັງຈະມີກິດຈະກຳການພົບປະລະດັບສູງຫຼາຍຢ່າງ, ລວມທັງການຈັດກອງປະຊຸມສຳມະນາທິດສະດີຂອງສອງພັກ, ຜູ້ຊ່ຽວຊານຝ່າຍຈີນຈະມາລາວເພື່ອໂຄສະນາເຜີຍແຜ່ຈິດໃຈກອງປະຊຸມຄົບຄະນະຄັ້ງທີ 5 ຂອງຄະນະກຳມະການສູນກາງພັກ ສະໄໝທີ XX, ພ້ອມທັງສືບຕໍ່ຈັດຕັ້ງປະຕິບັດການຝຶກອົບຮົມ, ການສໍາມະນາ ແລະ ການແລກປ່ຽນພະນັກງານໃນຂົງເຂດຕ່າງໆໃຫ້ດີ, ເຊື່ອໝັ້ນວ່າກິດຈະກຳເຫຼົ່ານີ້ຈະສະ ໜອງການສະໜັບສະໜູນອັນແຂງແກ່ນໃຫ້ແກ່ພາລະກິດສັງຄົມນິຍົມຂອງສອງຝ່າຍ.
(ຂ່າວ-ພາບ: ສຳນານ)
ຄໍາເຫັນ