 |
ໃນວາລະ, ທ່ານ ອາດສະພັງທອງ ສີພັນດອນ ກ່າວວ່າ: ຜ່ານໄລຍະ 10 ເດືອນ ສົກປີ 2026 ດ້ວຍຄວາມຮັບຜີດຊອບ ໃນການປະຕິບັດໜ້າທີ່ພາຍໃຕ້ການນຳພາ-ຊີ້ນຳຢ່າງໃກ້ຊິດຂອງອົງຄະນະພັກ ນະຄອນຫຼວງວຽງຈັນ-ສູນກາງພັກ, ການຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ຂອງຄະນະກຳມະການປົກຄອງ ແລະ ການຕິດຕາມກວດກາ ຂອງສະພາປະຊາຊົນໄດ້ເອົາໃຈໃສ່ເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ ທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ, ກໍຄືການຈັດຕັ້ງປະຕິບັດຜັນຂະຫຍາຍແນວທາງນະໂຍບາຍຂອງພັກໄດ້ເຂົ້າສູ່ລວງເລິກ ແລະ ເປັນຂະບວນທີ່ກ້ວາງຂວາງ ໄດ້ເຮັດໃຫ້ ນວ ສືບຕໍ່ມີສະຖຽນລະພາບດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍໂດຍພື້ນຖານ, ເສດຖະກິດສືບຕໍ່ມີການຂະຫຍາຍຕົວໃນທາງບວກ. ບັນດາຄາດໝາຍທາງດ້ານເສດຖະກິດ-ສັງຄົມ ສາມາດບັນລຸໄດ້ຕາມແຜນເປັນສ່ວນໃຫຍ່ ແລະ ຈຳ ນວນໜຶ່ງປະຕິບັດໄດ້ລື່ນແຜນການ, ການສ້າງ ແລະ ປັບປຸງນິຕິກຳລຸ່ມກົດໝາຍ ໄດ້ປະຕິບັດຕາມຂັ້ນຕອນຂອງການສ້າງນິຕິກໍາ ແລະ ສອດຄ່ອງກັບສະພາບຕົວຈິງດີຂຶ້ນເປັນກ້າວໆ, ທັງໝົດນີ້ເປັນການປະກອບສ່ວນສໍາຄັນ ໃນການພັດທະນານະຄອນຫຼວງວຽງຈັນ ໃຫ້ມີຄວາມໜັກແໜ້ນ ຕາມທິດປະຊາຊົນຮັ່ງມີ, ສັງຄົມມີປະຊາທິປະໄຕ, ສາ ມັກຄີປອງດອງ, ຍຸຕິທຳ ແລະ ສີວິໄລ, ອັນໄດ້ເຮັດໃຫ້ຖານະບົດບາດຂອງ ນວ ໄດ້ຮັບການຍົກສູງພົ້ນເດັ່ນຂຶ້ນຢ່າງຕໍ່ເນື່ອງ.
 |
ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນ ນວ ຊຸດທີ V ຄັ້ງນີ້ ຈະໄດ້ດຳເນີນໄປເປັນເວລາ 4 ວັນ (10-13/11/2026) ຊຶ່ງຈະໄດ້ພິຈາລະນາ ແລະ ຮັບຮອງເອົາບັນຫາສຳຄັນພື້ນຖານ ຂອງນະຄອນຫຼວງວຽງຈັນ ຄື: 1) ພິຈາລະນາ, ຮັບຮອງເອົາບົດລາຍງານຂອງຄະນະກຳມະການປົກຄອງ ນວ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 9 ເດືອນ, ຄາດຄະເນໝົດປີ 2026 ແລະ ທິດທາງແຜນການ ປະຈຳປີ 2027 ຂອງ ນວ , 2) ຮັບຟັງການລາຍງານ ການຈັດຕັ້ງປະຕິບັດວາລະແຫ່ງຊາດ ການພັດທະນາຊົນນະບົດ ແລະ ແກ້ໄຂຄວາມທຸກຍາກ ໂດຍສະເພາະແມ່ນການສ້າງແຜນປະຕິບັດງານ ແລະ ໂຄງການ ຢູ່ ນວ, 3) ພິຈາລະນາ, ຮັບຮອງເອົາ ໂຄງການສຳຫຼວດອອກແບບວາງແຜນຜັງເທດສະບານ ເມືອງນາຊາຍທອງ, ເມືອງຫາດຊາຍຟອງ ແລະ ເມືອງປາກງື່ມ, 4) ຮັບຟັງການລາຍງານຊີ້ແຈງບັນຫາສໍາຄັນຕ່າງໆ ຂອງ ນວ ຈໍານວນ 3 ບັນຫາຄື:
1. ຊີ້ແຈງກ່ຽວກັບການຈັດຕັ້ງປະຕິບັດແຜນຍຸດທະສາດການບໍລິຫານຈັດການຂີ້ເຫຍື້ອ ແລະ ຂໍ້ຕົກລົງວ່າດ້ວຍການຄຸ້ມຄອງ ແລະ ກໍາຈັດຂີ້ເຫຍື້ອ ໃນ ນວ;
2. ຊີ້ແຈງກ່ຽວກັບການຈັດຕັ້ງປະຕິບັດຄຳສັ່ງເລກທີ 11/ຄລສພ,ລົງວັນທີ 7 ພຶດສະພາ 2026 ວ່າດ້ວຍການເພິ່ມທະວີຊີ້ນໍາຂອງພັກ ຕໍ່ວຽກງານແຮ່ທາດ, ການຄຸ້ມຄອງ ແລະ ແກ້ໄຂບັນຫາຫຍໍ້ທໍ້ຂົງເຂດຊັບພະ ຍາກອນທໍາມະຊາດ;
3. ລາຍງານກ່ຽວກັບສະພາບການສຶກສາ ຕິດພັນກັບ ບັນຫາການປະລະການຮຽນຂອງນັກຮຽນໃນຊັ້ນປະຖົມ ແລະ ຊັ້ນມັດທະຍົມ ແລະ ບັນຫາການຂາດແຄນຄູສອນ ໂດຍສະເພາະຢູ່ເຂດຊານເມືອງຄື: ເມືອງສັງທອງ ແລະ ເມືອງປາກງື່ມ;
4. ພິຈາລະນາ, ຮັບຮອງເອົາ ການສ້າງນິຕິກຳ ຂອງນວ ຈໍານວນ 3 ສະບັບຄື: ຮ່າງຂໍ້ຕົກລົງ ວ່າດ້ວຍພັນທະ ແລະ ຄວາມຮັບຜິດຊອບຂອງເຈົ້າຂອງກິດຈະການໂຮງແຮມ, ຣີສອດ, ເຮືອນພັກ, ຄອນໂດມີນຽມ, ອາພັດເມັ້ນ, ເຮືອນໃຫ້ເຊົ່າ, ເຮືອນຫ້ອງແຖວ ແລະຜູ້ມາພັກເຊົາ ຢູ່ ນວ;
5. ຮ່າງຂໍ້ຕົກລົງ ວ່າດ້ວຍການຄຸ້ມຄອງ ແລະ ການພັດທະນາສະຖານທີ່ຈອດລົດ ໃນຕົວເມືອງນວ;
6. ຮ່າງຂໍ້ຕົກລົງ ວ່າດ້ວຍກອງທຶນຊ່ວຍເຫຼືອສຸກເສີນ;
2) ພິຈາລະນາ, ຮັບຮອງເອົາ ການສະເໜີປັບປຸງນິຕິກໍາ ຈໍານວນ 2 ສະບັບຄື:
1. ຂໍ້ຕົກລົງ ວ່າດ້ວຍການປະເມີນລາຄາທີ່ດິນ ທົ່ວ ນວ (ສະບັບປັບປຸງ);
2. ຂໍ້ຕົກລົງ ວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ນວ (ສະບັບປັບປຸງ);
3) ພິຈາລະນາ, ຮັບຮອງເອົາບົດລາຍງານການເຄື່ອນໄຫວວຽກງານ ປະຈຳປີ 2026 ແລະ ທິດທາງແຜນການ ປີ 2027 ຂອງສະພາປະຊາຊົນ ນວ, ອົງການກວດສອບປະຈຳພາກກາງ 1, ອົງການກວດກາລັດ ນວ, ອົງການໄອຍະການປະຊາຊົນ (ພາກກາງ ແລະ ນວ) ແລະ ສານປະຊາຊົນ (ພາກກາງ ແລະ ນວ);
4) ຮັບຟັງການລາຍງານ ການຈັດຕັ້ງປະຕິບັດຄໍາຕັດສິນຂອງສານປະຈໍາປີ 2026 ແລະ ທິດທາງແຜນການປະຈໍາປີ 2027 ຂອງກອງປະຕິບັດຄຳຕັດສິນຂອງສານ ປະຈໍານວ;
5) ຮັບຟັງການປະກອບຄຳເຫັນຂອງອົງການແນວລາວສ້າງຊາດ ກ່ຽວກັບການປະຕິບັດໜ້າທີ່ ຂອງສະພາປະຊາຊົນ ນວ ຊຸດທີ V.
ນອກນັ້ນ, ກອງປະຊຸມຄັ້ງນີ້ຍັງຈະໄດ້ຮັບຟັງການຊີ້ແຈງຂອງຄະນະກໍາມະການປົກຄອງ ນວ ແລະ ພາກສ່ວນກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນ ນວ.
 |
ເພື່ອຮັບປະກັນການປະຕິບັດລະບອບແບບແຜນວິທີເຮັດວຽກ ຕາມ 5 ຫຼັກການ ກໍຄື 3 ສິດ ແລະ ໜ້າທີ່ຂອງສະພາປະຊາຊົນ ແລະ ເພື່ອຍົກສູງບົດບາດຄວາມສຳຄັນ ຂອງກອງປະຊຸມໃນການພິຈາລະນາຕົກລົງບັນຫາສຳຄັນພື້ນຖານຂອງ ນວ, ໃນນາມຕາງໜ້າຄະນະປະຈຳສະພາປະຊາຊົນ ນວ ກໍຄືໃນນາມປະທານກອງປະຊຸມ ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງຈົ່ງໃຫ້ຄວາມຮ່ວມມືສະໜອງຂໍ້ມູນລາຍງານ ທີ່ຮັດກຸມ, ຖືກຕ້ອງ, ຊັດເຈນ ຈະແຈ້ງ ຕໍ່ກອງປະຊຸມ ແລະ ຂໍຮຽກຮ້ອງມາຍັງ ບັນດາທ່ານ ສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນ ນວ ຈົ່ງພ້ອມກັນຍົກສູງຄວາມຮັບຜິດຊອບການເມືອງຂອງຕົນ, ສຸມທຸກສະຕິປັນຍາເຂົ້າໃນການຄົ້ນຄວ້າ, ພິຈາລະນາ ແລະ ປະກອບຄຳເຫັນຢ່າງມີປະຊາທິປະໄຕເພື່ອຮັບປະກັນຄວາມຖືກຕ້ອງ ກ້າວໄປເຖິງ ການຕົກລົງຮັບຮອງ ໃຫ້ບັນລຸຕາມຄາດໝາຍທີ່ວາງໄວ້.
(ຂ່າວ: ແສງຈັນ)
ຄໍາເຫັນ