ແຂວງວຽງຈັນ ສະຫຼອງວັນຊົນລະປະທານພ້ອມເປີດການນຳໃຊ້ນ້ຳສຳລັບການຜະລິດລະດູແລ້ງ

ທ່ານ ບຸນພະຈັນ ບຸນທະລາ ຮອງຫົວໜ້າພະແນກກະສິກຳ ແລະ ສິ່ງແວດລ້ອມແຂວງ ໄດ້ກ່າວວ່າ: ວຽກງານຊົນລະປະທານເປັນວຽກງານທີ່ມີບົດບາດສຳຄັນຕໍ່ການພັດທະນາການຜະລິດກະສິກຳ, ການຮັບປະກັນສະບຽງອາຫານ, ການເພີ່ມຜົນຜະລິດ ແລະ ສ້າງລາຍຮັບໃຫ້ແກ່ປະຊາຊົນ. ຜ່ານມາ ແຂວງວຽງຈັນ ມີລະບົບຊົນລະປະທານ ທັງໝົດ 1,263 ແຫ່ງ, ໃນນັ້ນ ເປັນໂຄງການທີ່ລົງທຶນໂດຍລັດ 439 ແຫ່ງ ແລະ ປະຊາຊົນລົງທຶນເອງ 824 ແຫ່ງ. ນອກຈາກນັ້ນ ຍັງມີໂຄງການກໍ່ສ້າງໃໝ່, ຟື້ນຟູ ແລະ ສ້ອມແປງຈາກງົບປະມານລັດ ແລະ ທຶນຮ່ວມມືຈາກຄູ່ຮ່ວມພັດທະນາ.

ສຳລັບແຜນການຜະລິດ, ແຂວງມີເປົ້າໝາຍຂະຫຍາຍເນື້ອທີ່ການຜະລິດໃຫ້ໄດ້ 14,500 ເຮັກຕາ ໃນລະດູແລ້ງ ສົກປີ 2026-2027 ແລະ 43,500 ເຮັກຕາ ໃນລະດູຝົນປີ 2027, ເຖິງວ່າວຽກງານຊົນລະປະທານຈະມີຜົນງານດ້ານການພັດທະນາໂຄງລ່າງຢ່າງຕໍ່ເນື່ອງ, ແຕ່ກໍຍັງມີຂໍ້ຫຍຸ້ງຍາກຫຼາຍດ້ານ ເຊັ່ນ: ງົບປະມານຈຳກັດ, ລະບົບຊົນລະປະທານບາງແຫ່ງຊຸດໂຊມ, ຄອງເໝືອງຕື້ນເຂີນ, ອຸປະກອນ ແລະ ຈັກສູບນ້ຳບາງສ່ວນນຳໃຊ້ໄດ້ບໍ່ເຕັມປະສິດທິພາບ, ຂາດແຄນພະນັກງານວິຊາການ, ການຈັດສັນນ້ຳຍັງບໍ່ທົ່ວເຖິງ ແລະ ການປະສານງານຍັງບໍ່ທັນດີເທົ່າທີ່ຄວນ. ພ້ອມນີ້ ຍັງມີບັນຫາໜີ້ຄ່າໄຟຟ້າຄ້າງຈ່າຍໃນຂະແໜງກະສິກຳ-ຊົນລະປະທານເປັນຈຳນວນຫຼາຍ.

ຕໍ່ກັບບັນຫາດັ່ງກ່າວ, ພະແນກກະສິກຳແລະສິ່ງແວດລ້ອມແຂວງຈະສຸມໃສ່ປັບປຸງການວາງແຜນ, ລະດົມທຶນຈາກພາກສ່ວນຕ່າງໆ, ເລັ່ງສ້ອມແປງ ແລະ ບຳລຸງຮັກສາລະບົບຊົນລະປະທານເກົ່າ, ຊອກຫາວິທີແກ້ໄຂໜີ້ຄ່າໄຟຟ້າ, ພັດທະນາຄວາມຮູ້ຄວາມສາມາດຂອງພະນັກງານ, ສົ່ງເສີມການຈັດຕັ້ງກຸ່ມຜູ້ນຳໃຊ້ນ້ຳ ແລະ ນຳໃຊ້ເຕັກໂນໂລຊີດິຈິຕອນເຂົ້າໃນການຄຸ້ມຄອງຂໍ້ມູນ ແລະ ການຈັດສັນນ້ຳໃຫ້ມີປະສິດທິພາບ. ສ່

ວນການກະກຽມຜະລິດລະດູແລ້ງ ສົກປີ 2026-2027, ຈະເລັ່ງຟື້ນຟູ ແລະ ປັບປຸງໂຄງການຊົນລະປະທານ, ກວດກາແຫຼ່ງນ້ຳ, ຈັດສັນງົບປະມານໃຫ້ຖືກຈຸດ, ສຶກສາກຳນົດອັດຕາຄ່າໄຟຟ້າທີ່ເໝາະສົມ, ສ້າງຕັ້ງກຸ່ມຜູ້ນຳໃຊ້ນ້ຳ, ວາງແຜນການຜະລິດໃຫ້ສອດຄ່ອງກັບປະລິມານນ້ຳທີ່ມີ ພ້ອມທັງກະກຽມແຜນຮັບມືຕໍ່ສະພາບອາກາດຮ້ອນ ແລະ ຄວາມສ່ຽງຈາກໄພແຫ້ງແລ້ງ.

ທ່ານ ສົມປະສົງ ສຸວົງຄຳຈັນ ໄດ້ເນັ້ນໃຫ້ທຸກພາກສ່ວນສືບຕໍ່ເອົາໃຈໃສ່ພັດທະນາ ແລະ ຟື້ນຟູລະບົບຊົນລະປະທານໃຫ້ມີຄວາມພ້ອມຮັບໃຊ້ການຜະລິດ, ບໍລິຫານຈັດການນ້ຳຢ່າງປະຢັດ ແລະ ເປັນທຳ, ສ້າງຄວາມພ້ອມໃນການຮັບມືຕໍ່ໄພແຫ້ງແລ້ງ ພ້ອມທັງສົ່ງເສີມໃຫ້ທຸກພາກສ່ວນ ແລະ ປະຊາຊົນມີສ່ວນຮ່ວມໃນການບຳລຸງຮັກສາ ແລະ ນຳໃຊ້ນ້ຳໃຫ້ເກີດປະໂຫຍດສູງສຸດ.

ໃນພິທີ, ທ່ານຮອງປະທານຄະນະກຳມະການປົກຄອງແຂວງໄດ້ໃຫ້ກຽດລັ່ນຄອງ 9 ບາດ ເພື່ອເປັນສິລິມຸງຄຸນ ພ້ອມທັງເປີດປະຕູນ້ຳ ເພື່ອນຳໃຊ້ໃນການຜະລິດລະດູແລ້ງ ສົກປີ 2026–2027 ຢ່າງເປັນທາງການ ແລະ ການນຳແຂວງ, ເມືອງ, ພະແນກການ ຍັງໄດ້ຫວ່ານກ້າໃນນາສາທິດ ເພື່ອເປັນຕົວແທນໃຫ້ແກ່ຊາວນາ.

ຂ່າວ: ແຂວງວຽງຈັນ