 |
ໂອກາດນີ້, ທ່ານ ພັນເອກ ເພັດດາວົງ ແກ້ວກັນຍາ ໄດ້ຍົກໃຫ້ເຫັນຜົນສໍາເລັດການຮ່ວມມືຂອງສອງຝ່າຍໃນໄລຍະ 2 ປີຜ່ານມາ ແລະ ທິດທາງແຜນການຮ່ວມມືກັນໃນຕໍ່ໜ້າ. ໄລຍະຜ່ານມາ, ທັງສອງຝ່າຍໄດ້ອໍານວຍຄວາມສະດວກໃຫ້ພົນລະເມືອງຂອງສອງປະເທດ ລາວ-ກຳປູເຈຍ, ກຳປູເຈຍ-ລາວ, ຄົນຕ່າງ ປະເທດ, ຄົນບໍ່ມີສັນຊາດເດີນທາງເຂົ້າ-ອອກ ຜ່ານດ່ານຊາຍແດນດ້ວຍຈຸດປະສົງທ່ອງທ່ຽວ, ຢ້ຽມຢາມ, ຊື້-ຂາຍ-ແລກປ່ຽນສິນຄ້າ, ເຮັດທຸລະກິດ ແລະ ອື່ນໆ ມີຄວາມສະດວກຄ່ອງຕົວ, ປອດໄພ, ມີຄວາມສະຫງົບ, ເປັນລະບຽບຮຽບຮ້ອຍ, ປະຕິບັດຖືກຕ້ອງຕາມກົດໝາຍ-ລະບຽບການ ໃນການເດີນທາງເຂົ້າ-ອອກ ບົນພື້ນ ຖານການປະຕິບັດສັນຍາຂ້າມແດນສອງຝ່າຍ, ກໍລະນີມີເຫດການສຸກເສີນຮີບດ່ວນເກີດຂຶ້ນຢູ່ບໍລິເວນຊາຍແດນ, ການເຂົ້າ-ອອກບໍ່ຖືກຕ້ອງ ແມ່ນໄດ້ມີການປະສານສົມທົບກັນແກ້ໄຂຕາມກົດໝາຍ-ລະບຽບການຂອງແຕ່ລະປະເທດຢ່າງທັນການ, ເອົາໃຈໃສ່ເພີ່ມທະວີການສຶກສາອົບຮົມພົນລະເມືອງຂອງສອງຝ່າຍ ໂດຍສະ ເພາະພົນລະເມືອງທີ່ອາໄສຢູ່ລຽບຕາມຊາຍແດນ ໃຫ້ມີຄວາມເຂົ້າໃຈເຖິງລະບຽບການ, ຂໍ້ກຳນົດຕ່າງໆ ກ່ຽວກັບຊາຍແດນທີ່ລັດຖະບານຂອງ ສປປ ລາວ ແລະ ຣາຊະອານາຈັກກຳປູເຈຍ ໄດ້ລົງນາມຮ່ວມກັນ ໂດຍສະ ເພາະແມ່ນສັນຍາ ວ່າດ້ວຍການຜ່ານແດນ ສະບັບລົງວັນທີ 28 ມີນາ 2008, ບົນພື້ນຖານຫຼັກການເຄົາລົບອຳນາດອະທິປະໄຕຜືນແຜ່ນດິນອັນຄົບຖ້ວນ ຊຶ່ງກັນ ແລະ ກັນ, ບໍ່ເຂົ້າ-ອອກ ຫຼື ຍົກຍ້າຍຕັ້ງຖິ່ນຖານພູມລໍາເນົາແບບເສລີ. ພ້ອມກັນນັ້ນ, ຍັງໄດ້ສຸມໃສ່ໂຄສະນາມູນເຊື້ອຄວາມສາມັກຄີໃຫ້ພະນັກງານ ກໍຄືປະຊາຊົນລຽບຕາມຊາຍແດນ ຮູ້ໄດ້ເຖິງມູນເຊື້ອຄວາມສາມັກຄີ, ຄວາມຮັກແພງ, ຊ່ວຍເຫຼືອຊຶ່ງກັນ ແລະ ກັນ ຂອງສອງຊາດ ລາວ-ກຳປູເຈຍ, ກຳປູເຈຍ-ລາວ, ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງປະຈຳຢູ່ດ່ານເຂົ້າ-ອອກ ລາວ-ກຳປູເຈຍ ໄດ້ມີການພົວພັນ, ຮ່ວມມື, ປະສານສົມທົບກັນເພື່ອແລກປ່ຽນຂໍ້ມູນ-ຂ່າວສານ, ສະ ພາບການຕ່າງໆ ທີ່ກ່ຽວພັນເຖິງຄວາມສະຫງົບ ແລະ ຄວາມບໍ່ເປັນລະບຽບຮຽບຮ້ອຍຕາມບໍລິເວນຊາຍແດນ, ໄດ້ຈັດຕັ້ງປະຕິບັດຢ່າງເຂັ້ມງວດໃນການກວດກາ ແລະ ຫ້າມນໍາເອົາອາວຸດ, ທາດລະເບີດທີ່ບໍ່ໄດ້ຮັບອະນຸ ຍາດເຂົ້າມາໃນດິນແດນຂອງອີກຝ່າຍ, ແຕ່ລະຝ່າຍບໍ່ໄດ້ນໍາເອົາກໍາລັງຂອງຕົນມາເຄື່ອນໄຫວລາດຕະເວນເລິກເຂົ້າໃນດິນແດນຂອງອີກຝ່າຍ, ໄດ້ມີການຮ່ວມມື ແລະ ອໍານວຍຄວາມສະດວກຊຶ່ງກັນ ແລະ ກັນໃນການຜັກດັນພົນລະເມືອງຂອງແຕ່ລະຝ່າຍ ບໍ່ໃຫ້ເຂົ້າມາເຄື່ອນໄຫວຜິດກົດໝາຍໃນດິນແດນຂອງອີກຝ່າຍ ພ້ອມທັງຮ່ວມມືກັນ ໃນການສົ່ງຜູ້ຮ້າຍຂ້າມແດນ ລະຫວ່າງສອງຝ່າຍຕາມສົນທິສັນຍາ ວ່າດ້ວຍການສົ່ງຜູ້ຮ້າຍຂ້າມແດນ ລະຫວ່າງສອງລັດຖະບານ. ຈາກນັ້ນ, ທັງສອງຝ່າຍ ກໍໄດ້ມີຄໍາເຫັນແລກປ່ຽນບົດຮຽນວຽກງານວິຊາສະເພາະ ກໍຄືວຽກງານກວດຄົນເຂົ້າ-ອອກເມືອງຮ່ວມກັນຢ່າງກົງໄປ-ກົງມາ ແລະ ເຫັນດີເປັນເອກະພາບຮ່ວມມືກັນ ເພື່ອສືບຕໍ່ຊ່ວຍເຫຼືອຊຶ່ງກັນ ແລະ ກັນ ແລະ ພ້ອມກັນແກ້ໄຂບັນຫາຂໍ້ຄົງຄ້າງໃນຂົງເຂດວຽກງານກວດຄົນເຂົ້າ-ອອກເມືອງຂອງສອງປະເທດໃຫ້ນັບມື້ໄດ້ຮັບປະສິດທິຜົນສູງ ແລະ ຖືກຕ້ອງສອດຄ່ອງ ຕາມຫຼັກການລະບຽບກົດໝາຍ.
 |
ກອງປະຊຸມ, ທັງສອງຝ່າຍ ຍັງໄດ້ຮ່ວມກັນລົງນາມເຊັນບົດບັນທຶກວ່າດ້ວຍການຮ່ວມມືກັນ ປະຈໍາປີ 2026, ຝ່າຍລາວລົງນາມໂດຍທ່ານ ພັນເອກ ເພັດດາວົງ ແກ້ວກັນຍາ, ຝ່າຍກຳປູເຈຍ ລົງນາມໂດຍທ່ານ ພົນໂທ ສົກເວດສະນາ ໂດຍມີຄະນະທັງສອງຝ່າຍເຂົ້າຮ່ວມເປັນສັກຂີພິຍານ.
(ຂ່າວ-ພາບ: ແກ້ວອຸເພັດ)
ຄໍາເຫັນ