ທະນາຄານພັດທະນາອາຊີ ສະໜັບສະໜູນວຽກງານທ່ອງທ່ຽວແຂວງຈຳປາສັກໄດ້ຮັບການພັດທະນາ

ສົ່ງຜົນດີໃຫ້ຜູ້ປະກອບການຄ້າຂາຍ, ໂຮງແຮມ, ເຮືອນພັກ ແລະ ຮ້ານອາຫານມີການຂະຫຍາຍຕົວຢ່າງຕໍ່ເນື່ອງ ແລະ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ເປັນຢ່າງດີ ໃນການເດີນທາງເຂົ້າມາຢ້ຽມຊົມຈຸດຮ່ອງຮອຍປະຫວັດສາດ ແລະ ຄວາມງາມທາງທຳມະຊາດ ພາຍໃນດອນເດດ-ດອນຄອນ.

ທ່ານ ສຸລິນ ເພັດທານີ ຮອງຫົວໜ້າພະແນກ ວັດທະນະທໍາ ແລະ ການທ່ອງທ່ຽວ (ວທ) ແຂວງຈຳປາສັກ ໄດ້ໃຫ້ຮູ້ວ່າ: ໂຄງການພັດທະນາພື້ນຖານໂຄງລ່າງ ເພື່ອສົ່ງເສີມການທ່ອງທ່ຽວໃນ ອະນຸພາກພື້ນແມ່ນໍ້າຂອງໄລຍະ 2 ໂດຍໄດ້ຮັບການສະໜັບສະໜູນຈາກທະນາຄານພັດທະນາອາຊີ (ADB) ເປັນໂຄງການທີ່ສ້າງຜົນປະໂຫຍດໃຫ້ປະຊາຊົນພາຍໃນໂດຍກົງ ໂດຍສະເພາະແມ່ນປະຊາຊົນບ້ານດອນເດດ-ດອນຄອນ ເພາະເຂດດັ່ງກ່າວເປັນແຫຼ່ງທ່ອງທ່ຽວທີ່ສຳຄັນທາງປະຫວັດສາດທີ່ຕິດພັນກັບການທ່ອງທ່ຽວເຂດສີທັນດອນ ຊຶ່ງແຕ່ກ່ອນການເດີນທາງໃນເຂດດອນເດດ-ດອນຄອນ ຍັງບໍ່ທັນຕອບສະໜອງດ້ານການສັນຈອນທີ່ມີຄວາມສະດວກສະບາຍ ຍ້ອນຖະໜົນຫົນທາງເປັນທາງດິນແດງເຮັດໃຫ້ການໄປມາຫາສູ່ກັນ ມີຄວາມຫຍຸ້ງຍາກຫຼາຍ, ພາຍຫຼັງມີການປັບປຸງພື້ນຖານໂຄງລ່າງ ການຄົມມະນາຄົມ ກໍສະດວກສະບາຍຫຼາຍຂຶ້ນເຮັດໃຫ້ຊາວຄ້າຂາຍ ແລະ ຜູ້ປະກອບການສາມາດດຳເນີນທຸລະກິດຢ່າງຕໍ່ເນື່ອງ ຊຶ່ງສະແດງໃຫ້ເຫັນວ່າມີການສ້າງສາຕຶກອາຄານ, ເຮືອນຂອງປະຊາຊົນ, ຮ້ານອາຫານ, ເຮືອນພັກ ແລະ ໂຮງແຮມກໍເກີດຂຶ້ນຫຼາຍ, ເຮັດໃຫ້ມີນັກທ່ອງທ່ຽວເດີນທາງເຂົ້າມາທ່ຽວ ແລະ ເຮັດກິດຈະກໍາຕ່າງໆເພີ່ມຂຶ້ນ ເປັນຕົ້ນການຂີ່ລົດຖີບຊົມທິວທັດທໍາມະຊາດອ້ອມດອນ ສາມາດສ້າງລາຍຮັບ ແລະ ສ້າງອາຊີບໃຫ້ປະຊາຊົນໃນທ້ອງຖິ່ນ.

ປັດຈຸບັນ ວຽກງານການທ່ອງທ່ຽວຖືກຈັດໃຫ້ເປັນວຽກງານບຸລິມະສິດແຖວໜ້າຂອງການພັດທະນາແຂວງຈຳປາສັກ ເນື່ອງຈາກແຂວງຈໍາປາສັກມີທ່າແຮງດ້ານການທ່ອງທ່ຽວຫຼາຍເຂດ ເຊັ່ນ: ເຂດປາກຊ່ອງ, ປາກເຊ, ຈຳປາສັກ ແລະ ເຂດສີທັນດອນ.

ໃນນັ້ນ ດອນເດດ-ດອນຄອນ ເປັນເຂດທີ່ມີທ່າແຮງດ້ານປະຫວັດສາດແຕ່ສະໄໝຝຣັ່ງເຊັ່ນ: ຂົວຂ້າມນ້ຳຂອງແຫ່ງທຳອິດ, ລາງ-ຫົວລົດໄຟ ແລະ ຮ່ອງຮອຍລົດໄຟ, ຮ່ອງຮອຍວັດວາອາຮາມ ທີ່ບ້ານຄອນໃຕ້ ຊຶ່ງມີຄວາມເຊື່ອມໂຍງກັບສະໄໝເຈົ້າສຸລິຍະວົງສາ ເປັນມໍຣະດົກປະຫວັດສາດ ທີ່ຄວນໄດ້ຮັບການອະນຸລັກ ແລະ ສົ່ງເສີມໃຫ້ເປັນຈຸດດຶງດູດ ນັກທ່ອງທ່ຽວ.

ປັດຈຸບັນ, ທາງແຂວງກໍຄື ເມືອງໂຂງ ໄດ້ເປັນເຈົ້າການໃນການປົກປັກຮັກສາ ໂດຍມີການແຕ່ງຕັ້ງຄະນະຮັບຜິດຊອບລົງມາປະຕິບັດໜ້າທີ່ປົກປັກຮັກສາ ເຊັ່ນ: ການອະນາໄມຕາມແຄມທາງ ບ່າທາງ, ສ້ອມແປງຄືນບໍ່ໃຫ້ເສັ້ນທາງມີຄວາມເປ່ເພ ແລະ ອື່ນໆ ເພື່ອເຮັດໃຫ້ພື້ນຖານໂຄງລ່າງທີ່ສໍາຄັນດັ່ງກ່າວ ຖືກນໍາໃຊ້ໃຫ້ໄດ້ຍາວນານທີ່ສຸດ.