 |
ການສຳຫຼວດໃນຄັ້ງນີ້, ເພື່ອສຶກສາສັກກະຍະພາບຂອງສາຍນ້ຳຫ້ວຍໂຕະໂໝະ ທັງໃນດ້ານທັດສະນີຍະພາບ, ຄວາມປອດໄພໃນການລ່ອງເຮືອ, ຈຸດເດັ່ນທາງທຳມະຊາດ ແລະ ຄວາມເໝາະສົມໃນການຈັດກິດຈະກຳທ່ອງທ່ຽວທາງນ້ຳ ລະຫວ່າງພາກລັດ ແລະ ພາກເອກະຊົນ ໂດຍມີສວນນ້ຳທິດາເພັດເປັນຈຸດເລີ່ມຕົ້ນໃນການຊຸກຍູ້ ແລະ ຕໍ່ຍອດທ່າແຮງດ້ານການທ່ອງທ່ຽວຂອງທ້ອງຖິ່ນ ໃຫ້ເກີດມູນຄ່າທາງເສດຖະກິດ ແລະ ສັງຄົມສູງສຸດ.
ທ່ານ ກິ່ງແກ້ວ ນະວະພົມ ກ່າວວ່າ: ເມືອງປະທຸມພອນມີທ່າແຮງດ້ານການທ່ອງທ່ຽວຫຼາຍດ້ານ ໂດຍສະເພາະແຫຼ່ງທ່ອງທ່ຽວທາງທຳມະຊາດ ທີ່ຍັງຄົງຄວາມອຸດົມສົມບູນ. ສາຍນ້ຳຫ້ວຍໂຕະໂໝະ ຖືເປັນໜຶ່ງໃນຈຸດສຳຄັນທີ່ມີທິວທັດງົດງາມ, ມີບັນຍາກາດສະຫງົບຮົ່ມເຢັນ ແລະ ມີສັກກະຍະພາບສູງໃນການພັດທະນາເປັນເສັ້ນທາງລ່ອງເຮືອທ່ອງທ່ຽວ ທີ່ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ໃນອະນາຄົດ.
ການລົງສຳຫຼວດຄັ້ງນີ້, ເພື່ອເປັນການເກັບກຳຂໍ້ມູນພື້ນຖານທີ່ສຳຄັນ ນຳໄປສູ່ການວາງແຜນພັດທະນາແຫຼ່ງທ່ອງທ່ຽວໃນໄລຍະຕໍ່ໜ້າ. ໂດຍມຸ່ງສ້າງໃຫ້ເມືອງປະທຸມພອນກາຍເປັນ “ເມືອງແວ່ ແລະ ເມືອງທ່ອງທ່ຽວທຳມະຊາດ” ທີ່ມີກິດຈະກຳຫຼາກຫຼາຍ ສອດຄ່ອງກັບສະພາບຕົວຈິງຂອງພື້ນທີ່. ທັງນີ້, ການພັດທະນາຈະດຳເນີນໄປຄວບຄູ່ກັບການອະນຸລັກສິ່ງແວດລ້ອມ, ການຮັກສາລະບົບນິເວດທາງທຳມະຊາດ ແລະ ການຄົງໄວ້ຊຶ່ງຮ່ອງ ຮອຍດ້ານວັດທະນະທຳ-ປະຫວັດສາດຂອງທ້ອງຖິ່ນຢ່າງຍືນຍົງ. ການລ່ອງເຮືອສຳຫຼວດໃນຄັ້ງນີ້, ໄດ້ເລີ່ມຕົ້ນຈາກທ່າສວນນ້ຳທິດາເພັດ ໄປຈົນຮອດປາກຫ້ວຍໂຕະໂໝະ ທີ່ໄຫຼອອກສູ່ແມ່ນ້ຳຂອງບ້ານໂຕະໂໝະທ່າໄລຍະທາງ 7 ກວ່າກິໂລແມັດ. ຕະຫຼອດເສັ້ນທາງ ແມ່ນໄດ້ແວ່ສຳຫຼວດຫຼາຍຈຸດທີ່ມີຄຸນຄ່າທັງດ້ານທຳມະຊາດ ແລະ ດ້ານປະຫວັດສາດ ເຊັ່ນ: ຈຸດຫີນສິ່ວທີ່ມີການເລົ່າຂານວ່າໃນອະດີດເຄີຍຖືກນຳໄປໃຊ້ໃນການກໍ່ສ້າງວັດພູຈຳປາສັກ ແລະ “ຂັ້ນໄດມ້າ” ຊຶ່ງເປັນຂັ້ນໄດຫີນບູຮານ ທີ່ເຊື່ອມຈາກວັດພູອາສາລົງສູ່ທ່ານ້ຳ. ຈຸດເດັ່ນເຫຼົ່ານີ້, ບໍ່ພຽງແຕ່ເພີ່ມມູນຄ່າໃຫ້ເສັ້ນທາງທ່ອງທ່ຽວທາງນ້ຳເທົ່ານັ້ນ ແຕ່ຍັງເປັນຫຼັກຖານສຳຄັນ ທີ່ສະທ້ອນໃຫ້ເຫັນເຖິງປະຫວັດ ສາດ ແລະ ຮາກຖານວັດທະນະທຳຂອງພື້ນທີ່. ການລົງພື້ນທີ່ໃນຄັ້ງນີ້, ບໍ່ພຽງແຕ່ການສຳຫຼວດເສັ້ນທາງລ່ອງເຮືອທ່ອງທ່ຽວເທົ່ານັ້ນ ແຕ່ຍັງເປັນການວາງຮາກຖານໃໝ່ ໃນການປ່ຽນທຶນທາງທຳມະຊາດ ແລະ ທຶນທາງວັດທະນະທຳ ໃຫ້ກາຍເປັນສິນຄ້າການທ່ອງທ່ຽວຄຸນນະພາບ ທີ່ສາມາດສ້າງລາຍໄດ້ໃຫ້ປະຊາຊົນ, ກະຕຸ້ນເສດຖະກິດທ້ອງຖິ່ນ ແລະ ສ້າງພາບລັກໃໝ່ໃຫ້ເມືອງປະທຸມພອນ ໃນຖານະເປັນປາຍທາງທ່ອງທ່ຽວອີກແຫ່ງໜຶ່ງຂອງແຂວງຈຳປາສັກ. ຂ່າວ-ພາບ: ສີສົມບູນ ວົງວຽງຄຳ
ຄໍາເຫັນ