 |
ກອງປະຊຸມຄັ້ງນີ້, ເພື່ອຍົກລະດັບການບໍລິການດ້ານການທ່ອງທ່ຽວຂອງແຂວງຫຼວງພະບາງ ໂດຍສະເພາະະາຍໃນ ເມືອງມໍລະດົກໂລກຫຼວງພະບາງ ໃຫ້ທັນສະໄໝ-ສະດວກ ຕໍ່ນັກທ່ອງທ່ຽວທັງພາຍໃນ ແລະ ຕ່າງປະເທດ. ທ່ານ ນາງ ສຸດາພອນ ຄົມທະວົງ ກ່າວວ່າ: ການນຳໃຊ້ລະບົບດິຈິຕອນ ເຂົ້າມາຊ່ວຍໃນການພັດທະນາການທ່ອງທ່ຽວ ສອດຄ່ອງກັບນະໂຍບາຍ ການຫັນເປັນທັນສະໄໝ ແລະ ການພັດທະນາແບບຍືນຍົງຂອງແຂວງ, ນອກຈາກຈະສ້າງຄວາມສະດວກ ໃຫ້ແກ່ນັກທ່ອງທ່ຽວແລ້ວ ສາມາດຊ່ວຍໃນການສະໜອງຂໍ້ມູນຈຳນວນນັກທ່ອງທ່ຽວ ການເກັບກຳຂໍ້ມູນສະຖິຕິ ແລະ ສ້າງຄວາມໂປ່ງໃສ ໃນການຈັດການລາຍຮັບຈາກການທ່ອງທ່ຽວ.
ທ່ານ ຄຳເພັດ ສີລາທອງນິດ ໄດ້ກ່າວເຖິງຄວາມສຳຄັນ ຂອງການນຳໃຊ້ເຕັກໂນໂລຊີ ເຂົ້າມາຊ່ວຍໃນການບໍລິການພາກລັດ ແລະ ເປັນການກະຕຸກຊຸກຍູ້ເສດຖະກິດການທ່ອງທ່ຽວຂອງທ້ອງຖິ່ນ ໃຫ້ຂະຫຍາຍຕົວ ຕື່ມອີກ.
ໂອກາດນີ້, ຕາງໜ້າບໍລິສັດຜູ້ອອກແບບແອັບ LDT Booking ໄດ້ນຳສະເໜີວິທີການນຳໃຊ້ແອັບພລິເຄຊັນ ທັງໃນລະບົບ iOS ແລະ Android, ຊຶ່ງຂັ້ນຕອນການຈອງ, ການຊຳລະເງິນ ແລະ ການນຳສະແດງປີ້ເຂົ້າຊົມສະຖານທີ່ທອງທ່ຽວ ແບບເອເລັກໂຕຣນິກ ໃຫ້ຜູ້ເຂົ້າຮ່ວມໄດ້ຮັບຊົມ ແລະ ທົດລອງໃຊ້ງານຕົວຈິງ. ຈຸດເດັ່ນຂອງລະບົບ LDT Booking ແມ່ນການນຳໃຊ້ລະບົບ "ປີ້ດ່ຽວ" (One Pass) ທີ່ອະນຸຍາດໃຫ້ນັກທ່ອງທ່ຽວສາມາດຈອງ ແລະ ເຂົ້າຊົມສະຖານທີ່ທ່ອງທ່ຽວ ໃນນະຄອນ ຫຼວງພະບາງ ໄດ້ຫຼາຍແຫ່ງ ໃນປີ້ດຽວ ຜ່ານແອັບພລິເຄຊັນທີ່ທັນສະໄໝ ຊ່ວຍອຳນວຍຄວາມສະດວກ ປະຢັດເວລາ. ສຳລັບນັກທ່ອງທ່ຽວ ແລະ ຜູ້ທີ່ສົນໃຈນຳໃຊ້ ສາມາດດາວໂຫຼດແອັບພລິເຄຊັນ LDT Booking ໄດ້ທັງໃນ App Store, Play Store ແລະ Google Play ຕັ້ງແຕ່ມື້ນີ້ເປັນຕົ້ນໄປ ເພື່ອວາງແຜນການເດີນທາງ ແລະ ສຳຜັດກັບຄວາມງົດງາມຂອງເມືອງມໍລະດົກໂລກຫຼວງພະບາງ ໄດ້ຢ່າງສະດວກ ໂດຍບໍ່ຕ້ອງກັງວົນເລື່ອງການຕໍ່ຄິວຊື້ປີ້.
(ຂ່າວ-ພາບ: ທະນູສີນ ອິດທິພົນ)
ຄໍາເຫັນ