ສວນນໍ້າທິດາເພັດ ຕົວແບບການພັດທະນາການທ່ອງທ່ຽວ ຕິດພັນກັບການຜະລິດກະສິກໍາແບບຍືນຍົງ

ທ່ານ ທອງສະຫວັນ ແສນພິລາວົງສາ ໄດ້ໃຫ້ຮູ້ວ່າ: ຄອບຄົວຂອງຂ້າພະເຈົ້າ ເປັນນັກວິສະວະກອນກໍ່ສ້າງ, ດ້ວຍຄວາມຮັບຮູ້-ເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ກ່ຽວກັບການພັດທະນາເສດຖະກິດ ເວົ້າລວມ, ເວົ້າສະເພາະ ແມ່ນການພັດທະນາ, ສົ່ງເສີມການທ່ອງທ່ຽວ ໃນຮູບແບບກະສິກຳ ໂດຍຖືເອົາວຽກງານກະສິກຳ ເປັນບຸລິມະສິດໜຶ່ງ ໃນການພັດທະນາເສດຖະກິດ-ສັງຄົມ ເພື່ອສົ່ງເສີມການຜະລິດເປັນສິນຄ້າ, ການບໍລິການສ້າງວຽກເຮັດງານທໍາ, ສ້າງລາຍຮັບ ແລະ ປັບປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນ.

ເຖິງແມ່ນວ່າ ຄອບຄົວຂ້າພະເຈົ້າຈະບໍ່ແມ່ນພື້ນຖານປະຊາຊົນ ທີ່ອາໄສຢູ່ໃນເມືອງປະທຸມພອນ ແຕ່ກໍໄດ້ຮັບການຕ້ອນຮັບ, ຄວາມເອົາໃຈໃສ່ສະໜັບສະໜູນ ຈາກຄະນະພັກ-ອົງການປົກຄອງເມືອງ ຕະຫຼອດຮອດປະຊາຊົນເປັນຢ່າງດີ. ໃນປີ 2009 ຂ້າພະເຈົ້າໄດ້ຮັບການມອບໂອນກໍາມະສິດນໍາໃຊ້ທີ່ດິນຕອນດັ່ງກ່າວ ຈໍານວນ 4.5 ເຮັກຕາ, ຕັ້ງຢູ່ບ້ານຫຼັກ 40 ຫ່າງຈາກສໍານັກງານເມືອງ 900 ແມັດ ຊຶ່ງເປັນຕອນດິນທີ່ມີຄວາມໝາຍ, ຄວາມສໍາຄັນ ແລະ ມີຄວາມສວຍງາມ, ມີແຫຼ່ງນໍ້າທໍາມະຊາດໄຫຼຜ່ານຕະຫຼອດປີ ຈຶ່ງເປັນແຮງບັນດານໃຈເຮັດໃຫ້ຄອບຄົວຂ້າພະເຈົ້າ ຕັດສິນໃຈລິເລີ່ມສ້າງຕອນດິນແຫ່ງນີ້ເປັນສວນສາທິດໃຫ້ກັບລູກໆໃນໄວເດັກ ເພື່ອເປັນການປູກຈິດສໍານຶກໃຫ້ຮັກ ແລະ ຫວງແຫນໃນຄວາມງາມຂອງທໍາມະຊາດ ຈຶ່ງໄດ້ນໍາໃຊ້ແຫຼ່ງທຶນສ່ວນຕົວເຂົ້າໃນການພັດທະນາການປູກ-ການລ້ຽງແບບຄອບຄົວ ໂດຍບໍ່ມີພະນັກງານປະຈໍາ ຈະມາແຕ່ໄລຍະວັນເສົາ-ອາທິດ.

ມາຮອດປີ 2013-2014 ຍ້ອນເຫັນໄດ້ເຖິງເງື່ອນໄຂ ແລະ ໂອກາດໃນການພັດທະນາພື້ນທີ່ດັ່ງກ່າວໃຫ້ກາຍເປັນສະຖານທີ່ທ່ອງທ່ຽວທາງທໍາມະຊາດ ຕິດພັນກັບການຜະລິດກະສິກໍາແບບຍືນຍົງ ຂ້າພະເຈົ້າ ຈຶ່ງໄດ້ຂະຫຍາຍເນື້ອທີ່ຕື່ມອີກ ລວມເປັນ 85 ເຮັກຕາ ໄດ້ແບ່ງອອກເປັນ 4 ໂຊນ ຄື: 1) ປູກເຂົ້າ; 2) ປູກຕົ້ນໄມ້ໃຫ້ໝາກ; 3) ລ້ຽງສັດ ແລະ 4) ສໍາລັບການທ່ອງທ່ຽວທາງທໍາມະຊາດ, ໂດຍມີການພັດທະນາປັບປຸງແຄມຫ້ວຍໂຕະໂໝະ, ເຮັດກັນເຈື່ອນ, ປູກຕົ້ນໄມ້ປະດັບ ຮັກສາພື້ນທີ່ໃຫ້ມີຄວາມສວຍສົດງົດງາມ ແລະ ສີຂຽວ. ຕົກມາຮອດປີ 2015-2018 ສະຖານທີ່ແຫ່ງນີ້ ໄດ້ມີກະແສຕອບຮັບຈາກສັງຄົມເປັນຢ່າງດີ ໃນດ້ານການທ່ອງທ່ຽວສີຂຽວ ຈຶ່ງໄດ້ຂະຫຍາຍໃຫ້ມີສະຖານທີ່ບໍລິການໃຫ້ພຽງພໍ ໄດ້ເປີດໃຫ້ມີຮ້ານອາຫານບໍລິການໄລຍະວັນເສົາ-ອາທິດ ແລະ ເທສະການວັນສໍາຄັນຕ່າງໆ, ຄຽງຄູ່ກັນນີ້ພວກເຮົາໄດ້ເລີ່ມປູກຕົ້ນໄມ້ໃຫ້ໝາກ ແລະ ລ້ຽງສັດຈໍານວນໜຶ່ງ ເຊັ່ນ: ລ້ຽງປາ, ງົວ, ໝູປ່າ.

ມາຮອດ 2019-2023 ໄດ້ຮັບຜົນກະທົບຢ່າງໜັກໜ່ວງຈາກໄພພິບັດນໍ້າຖ້ວມ, ຈາກພະຍາດໂຄວິດ-19 ແລະ ໄພເງິນເຟີ້ ແຕ່ເຖິງຢ່າງໃດກໍຕາມ ຄອບຄົວຂອງພວກຂ້າພະເຈົ້າ ກໍບໍ່ໄດ້ລົດລະໃນຄວາມພະຍາຍາມ ໄດ້ຫັນວິກິດການໃຫ້ກາຍເປັນໂອກາດ ໂດຍໄດ້ມີການປັບປຸງພື້ນທີ່ທໍາການຜະລິດ ໃນຂອບເຂດເນື້ອທີ່ 60 ເຮັກຕາ, ເປັນໂຊນທ່ອງທ່ຽວ 4 ເຮັກຕາ ຂອງຈໍານວນເນື້ອທີ່ທັງໝົດ ເພື່ອໃຫ້ສອດຄ່ອງຕາມແຜນພັດທະນາເສດຖະກິດ-ສັງຄົມ ຈຶ່ງໄດ້ຂໍອະນຸຍາດຈົດທະບຽນ ດຳເນີນທຸລະກິດ ເປັນທິດາເພັດຟາມຂຶ້ນ ຊຶ່ງໄດ້ຮັບເງິນສະໜັບສະໜູນ ຈາກທະນາຄານຮ່ວມທຸລະກິດລາວ-ຫວຽດ ຈໍານວນໜຶ່ງ ເປົ້າ ໝາຍແມ່ນເພື່ອພັດທະນາເປັນແຫຼ່ງທ່ອງທ່ຽວ ໃນຮູບແບບກະສິກຳ. ເລີ່ມແຕ່ກາງປີ 2024 ຈົນຮອດປັດຈຸບັນ ໄດ້ມີການປັບປຸງຮ້ານອາຫານ ສະຖານບໍລິການ ພັກຜ່ອນ, ມີການບໍລິການແບບ ແຄັມປິງ, ມີສັດລ້ຽງໄວ້ໃຫ້ນັກທ່ອງທ່ຽວຊົມ ເປັນຕົ້ນແມ່ນ: ນົກກະຈອກເທບ, ແກະ, ນົກຍຸງ ແລະ ອື່ນໆ. ສັງລວມແລ້ວ ຕະຫຼອດໄລຍະ 5 ປີຜ່ານມາມີນັກທ່ອງທ່ຽວເຂົ້າມາທ່ຽວຊົມ ໃນໄລຍະເປີດບໍລິການທຸກວັນເສົາ-ອາທິດ ແລະ ວັນເທສະການຕ່າງໆ ມີປະມານ 3,500-4,000 ເທື່ອຄົນຕໍ່ປີ, ສ້າງລາຍຮັບໄດ້ປະມານ 400 ລ້ານກີບຕໍ່ປີ.

ເຖິງວ່າທຸລະກິດ ແຫຼ່ງທ່ອງທ່ຽວຂອງຂ້າພະເຈົ້າ ໄດ້ຮັບການພັດທະນາຢ່າງຕໍ່ເນື່ອງ ແຕ່ຖ້າທຽບໃສ່ ຄວາມຮຽກຮ້ອງຕ້ອງການທາງດ້ານການທ່ອງທ່ຽວ ກໍຄືການໃຊ້ບໍລິການຂອງນັກທ່ອງທ່ຽວ ເຫັນວ່າ ຍັງມີບາງດ້ານຕ້ອງໄດ້ປັບປຸງໃຫ້ດີຂຶ້ນຕື່ມອີກ, ດັ່ງນັ້ນ ໃນຊຸມປີຕໍ່ໜ້າ ເພື່ອປະກອບສ່ວນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງ 5 ປີ ຄັ້ງທີ IX ໃຫ້ບັນລຸຕາມລະດັບຄາດໝາຍ, ຈະສືບຕໍ່ສຸມໃສ່ປັບປຸງຍົກລະດັບທຸລະກິດການທ່ອງທ່ຽວໃນຮູບແບບກະສິກຳ ແບບຍືນຍົງ ຕາມວຽກຈຸດສຸມດັ່ງນີ້:

1) ຍົກສູງຄຸນນະພາບການບໍລິການ-ອາຫານ ໃຫ້ເຂົ້າສູ່ມາດຕະຖານ ເພື່ອຮອງຮັບແຂກ ພາຍໃນ ແລະ ຕ່າງປະເທດ; 2) ຈະສືບຕໍ່ສົມທົບກັບພາກລັດ ແລະ ຂະແໜງການທີ່ກ່ຽວຂ້ອງ ໂຄສະນາສົ່ງເສີມການທ່ອງທ່ຽວ ເວົ້າລວມ, ເວົ້າສະເພາະ ແມ່ນໂຄສະນາແຫຼ່ງທ່ອງທ່ຽວ ເພື່ອເຮັດໃຫ້ນັກທ່ອງທ່ຽວໄດ້ຮູ້ຈັກກ່ຽວກັບແຫຼ່ງທ່ອງທ່ຽວທາງດ້ານທຳມະຊາດ, ປະຫວັດສາດ ແລະ ວັດທະນະທຳ ຂອງເມືອງປະທຸມພອນ ໃຫ້ຫຼາຍຂຶ້ນເຊັ່ນ: ຈາກສວນນໍ້າທິດາເພັດ ສູ່ສະຖານທີ່ທ່ອງທ່ຽວປະຫວັດສາດ ອູບໂມງ (ບ້ານໂຕະໂໜະທ່າ), ຈາກສວນນໍ້າທິດາເພັດ ສູ່ສະຖານທີ່ທ່ອງທ່ຽວວັດທະນະທໍາ ພູອາສາ (ບ້ານກຽດໂງ້ງ) ແລະ ຈາກ ສວນນໍ້າທີດາເພັດ ສູ່ແຫຼ່ງທ່ອງທ່ຽວທໍາມະຊາດຕາດກອຍ (ບ້ານນໍ້າພາກ), ຕາດໂລ້ (ບ້ານເຫຼົ່າຫຍ້າ), ຕາດໄມ້ເຮ້ຍ (ບ້ານໜອງເອກ) ແລະ ອື່ນໆ; 3) ສ້າງໃຫ້ເປັນສວນຕົວແບບໃຫ້ນັກຮຽນໄດ້ເຂົ້າມາທັດສະນະສຶກສາ ກ່ຽວກັບປະເພດຕົ້ນໄມ້ຕ່າງໆ ເພື່ອປູກຈິດສໍານຶກໃຫ້ລູກຫຼານ ໄດ້ຮັກໃນທໍາມະຊາດ, ສິ່ງແວດລ້ອມ ແລະ ເປີດກວ້າງໃຫ້ອົງກອນຕ່າງໆໄດ້ເຂົ້າມາຈັດກິດຈະກຳ ຕາມແຕ່ລະໂອກາດວັນສໍາຄັນຕ່າງໆ; 4) ຈະປະຕິບັດພັນທະອາກອນຕ່າງໆ, ປະກອບສ່ວນຊ່ວຍສັງຄົມຕາມເງື່ອນໄຂ ເພື່ອໃຫ້ເປັນຕົວແບບໃນການປະຕິບັດລະບຽບກົດໝາຍ.