 |
ໃນກອງປະຊຸມຄັ້ງນີ້ ທ່ານ ບຸນເດດ ສຸດທະວີໄລ ໃນນາມກອງເລຂາ ຄະນະສະເພາະກິດຕ້ານ, ສະກັດກັ້ນ ແລະ ປາບປາມ ອາຊະຍາກຳສັດປ່າຂ້າມຊາດ ຕາມຂໍ້ຕົກລົງ ສະບັບເລກທີ 11/ນຍ, ໄດ້ກ່າວເປີດ ແລະ ມີຄຳເຫັນຕໍ່ກອງປະຊຸມ ໂດຍໄດ້ຍົກໃຫ້ເຫັນຄວາມສຳຄັນ ແລະ ຄວາມຈຳເປັນຮີບດ່ວນທີີ່ຈະຕ້ອງໄດ້ສືບຕໍ່ແກ້ໄຂບັນຫາ ກ່ຽວກັບ ວຽກງານການສະກັດກັ້ນ ແລະ ປາບປາມອາຊະຍາກຳສັດປ່າຂ້າມຊາດ ໂດຍສະເພາະແມ່ນການຄ້າຂາຍສິ້ນສ່ວນສັດປ່າຫວງຫ້າມ, ຊຶ່ງໄດ້ຖືກຍົກລະດັບໃຫ້ເປັນວຽກງານບູລິມະສິດລະດັບຊາດທີ່ຈະຕ້ອງໄດ້ແກ້ໄຂຢ່າງຮີບດ່ວນ ເພື່ອເປັນການຈັດຕັ້ງຜັນຂະຫຍາຍຕາມທິດຊີ້ນຳຂອງລັດຖະບານ ກໍຄືການປະຕິບັດກົດໝາຍວ່າດ້ວຍສັດປ່າ, ກົດໝາຍວ່າດ້ວຍການດຳເນີນຄະດີອາຍາ, ບັນດານິຕິກຳຕ່າງໆ ແລະ ພັນທະສາກົນທີ່ ສປປ ລາວ ເປັນພາຄີ.
ການສະກັດກັ້ນຮ້ານຄ້າທີ່ດຳເນີນກິດຈະການ ບໍ່ສອດຄ່ອງຕໍ່ກົດໝາຍ ແລະ ລະບຽບການ ຢູ່ນະຄອນຫຼວງພະບາງ ທີ່ພົບເຫັນແມ່ນ ມີການຄ້າຂາຍຊິ້ນສ່ວນສັດປ່າຫວງຫ້າມປະເພດ I (ນໍແຮດ, ງາຊ້າງ, ເກັດລິ່ນ ແລະ ອື່ນໆ) ການດຳເນີນທຸລະກິດດັ່ງກ່າວ ແມ່ນຜິດຕໍ່ລະບຽບກົດໝາຍໄດ້ສົ່ງຜົນກະທົບຢ່າງຮ້າຍແຮງຕໍ່ພາບພົດຂອງ ສປປ ລາວ ກໍຄື ພາບພົດຂອງ ແຂວງຫຼວງພະບາງ ທີ່ບັນດາອົງການຈັດຕັ້ງສາກົນໃຫ້ຄວາມສົນໃຈ ໃນການແກ້ໄຂບັນຫາດັ່ງກ່າວຂອງ ສປປ ລາວ. ຜ່ານມາລັດຖະບານໄດ້ ແຕ່ງຕັ້ງຄະນະສະເພາະກິດໃນການຕ້ານ ແລະ ສະກັດກັ້ນຢ່າງເຂັ້ມງວດ ແລະ ຜ່ານການລົງກວດກາຕົວຈິງໃນໄລຍະຜ່ານມາ ຢູ່ຮ້ານເປົ້າໝາຍ 15 ແຫ່ງ ໃນແຂວງຫຼວງພະບາງ, ເຈົ້າໜ້າທີ່ສາມາດຈັບກຸມ ແລະ ສັ່ງປິດກິດຈະການແລ້ວ 2 ຮ້ານ ໂດຍສາມາດຢຶດຂອງກາງປະເພດຊິ້ນສ່ວນຜະລິດຕະພັນສັດປ່າຫວງຫ້າມ ບັນຊີ I ຂອງ ສປປ ລາວ ແລະ ອົງການ CITES ໄດ້ຈຳນວນຫຼາຍ ພ້ອມທັງກັກຕົວຜູ້ຖືກຫາຊາວຕ່າງປະເທດ ມາດຳເນີນຄະດີຕາມກົດໝາຍ.
ໃນກອງປະຊຸມ ຍັງໄດ້ຍົກໃຫ້ເຫັນເຖິງສິ່ງທ້າທາຍ ແລະ ປະກົດການຫຍໍ້ທໍ້ຕ່າງໆ ທີ່ສະຫຼັບຊັບຊ້ອນ ເພື່ອລົບຫຼີກການຕິດຕາມກວດກາຂອງ ເຈົ້າໜ້າທີ່ກ່ຽວຂ້ອງ, ກຸ່ມອາຊະຍາກຳເຫຼົ່ານີ້ມັກດຳເນີນການໃນລັກສະນະເຄືອຂ່າຍຂ້າມຊາດ ໂດຍນຳໃຊ້ຊື່ຄົນລາວຈົດທະບຽນວິສາຫະກິດເພື່ອບັງໜ້າ, ນຳໃຊ້ແຮງງານຕ່າງປະເທດທີ່ຜິດກົດໝາຍ ເຂົ້າມາດຳເນີນກິດຈະການ ມີການຊຳລະເງິນຄ່າສິນຄ້າຜ່ານລະບົບອອນລາຍ ຂ້າມຊາດ ເຊັ່ນ: WeChat Pay , Taobao ແລະ ອື່ນໆ ໂດຍບໍ່ໄດ້ຜ່ານລະບົບທະນາຄານຂອງ ສປປ ລາວ ບໍ່ພຽງແຕ່ເປັນການຫຼີກລ່ຽງພາສີ-ອາກອນຢ່າງຈະແຈ້ງເທົ່ານັ້ນ, ແຕ່ຍັງເຂົ້າຂ່າຍການຟອກເງິນຂ້າມຊາດ (Money Laundering).
ເພື່ອແກ້ໄຂບັນຫາດັ່ງກ່າວຢ່າງເດັດຂາດ, ທີ່ປະຊຸມໄດ້ວາງທິດທາງມາດຕະການອັນຮີບດ່ວນປະກອບມີ: ໃຫ້ຖອນກຳລັງເວນຍາມອອກຈາກຮ້ານເປົ້າໝາຍ, ໃຫ້ໃຊ້ມາດຕະການໃຫ້ປິດຮ້ານ ຫຼື ຖ້າຈະເປີດກໍເປີດເປັນປົກຕິຮັບແຂກທົ່ວໄປ (ລີກລ້ຽງບໍ່ໃຫ້ເປີດສະເພາະກຸ່ມລູກຄ້າທີ່ກຸ່ມທົວເປົ້າໝາຍ ຫຼື ເອີ້ນວ່າກຸ່ມທົວສູນຢວນເທົ່ານັ້ນ), ໃຫ້ໂຈະກິດຈະການຮ້ານທີ່ບໍ່ມີໃບອະນຸຍາດ, ໃຫ້ກວດກາຄືນບັນດາບໍລິສັດທ່ອງທ່ຽວຂອງຄົນຕ່າງປະເທດທີ່ບໍ່ມີຄົນລາວເປັນຄົນນຳທ່ຽວ ລວມທັງເນື້ອຫາໃນການອະທິບາຍ ແລະ ໂຄສະນາຊວນເຊື່ອເຮັດໃຫ້ ນັກທ່ອງທ່ຽວຕ່າງປະເທດເຂົ້າໃຈຜິດຕໍ່ລະບຽບກົດໝາຍ ຂອງ ສປປ ລາວ, ໃຫ້ການກວດກາການນຳໃຊ້ແຮງງານຢູ່ບັນດາຮ້ານເປົ້າໝາຍຕ່າງໆ, ໃຫ້ກອງກວດກາຊັບພະຍາກອນທຳມະຊາດ ແລະ ສິ່ງແວດລ້ອມ ແຂວງ ຫຼວງພະບາງ ສົມທົບກັບ ພະແນກອຸດສາຫະກຳ ແລະ ການຄ້າ ແລະ ພາກສ່ວນກ່ຽວຂ້ອງ ລົງລາດຕະເວນປະຈຳທຸກໆວັນແຕ່ 6:00 ໂມງເຊົ້າ ຫາ 21:00 ໂມງຄືນ ຢູ່ບັນດາຮ້ານເປົ້າໝາຍ ພ້ອມທັງໂຄສະນາເຜີຍແຜ່ ລະບຽບກົດໝາຍທີ່ກ່ຽວຂ້ອງ ຂອງ ສປປ ລາວ ຢູ່ເຂດເປົ້າ
ໝາຍທີ່ມີນັກທ່ອງທ່ຽວ ແລະ ທຸກໆຄະດີທີ່ກຳລັງດຳເນີນການ ແລະ ຕໍ່ໜ້າແມ່ນໃຫ້ປະຕີບັດຕາມກົດໝາຍອາຍາຢ່າງເຂັ້ມງວດ (ຫ້າມບໍ່ໃຫ້ແກ້ໄຂແບບບໍລິຫານ).
ກອງປະຊຸມໃນຄັ້ງນີ້ ໄດ້ຮຽກຮ້ອງໃຫ້ທຸກພາກສ່ວນ ໂດຍສະເພາະຂະແໜງການ ວັດທະນະທຳ ແລະ ທ່ອງທ່ຽວ, ອຸດສາຫະກຳ ແລະ ການຄ້າ, ພາສີ, ຕຳຫຼວດ, ທະຫານ, ໄອຍະການ, ສານ ແລະ ພາກສ່ວນສັງຄົມ ຈົ່ງໃຫ້ການຮ່ວມມື ໃນການຕ້ານ ແລະ ສະກັດກັ້ນອາຊະຍາກຳສັດປ່າຂ້າມຊາດ ໃນກໍລະນີພົບເຫັນເບາະແສ ໃນການລັກລອບຄ້າຂາຍ, ມີໄວ້ຄອບຄອງສັດປ່າຫວງຫ້າມ ສາມາດ ລາຍງານແຈ້ງເຫດໄດ້ທີ່ສາຍດ່ວນ 1528.
ເພື່ອເຮັດໃຫ້ຜົນກອງປະຊຸມຄັ້ງນີ້ກໍຄືບັນດາມາດຕະການທີ່ໄດ້ຕົກລົງກັນ ໄດ້ຖືກຈັດຕັ້ງປະຕິບັດ, ຄະນະປະທານ ກອງປະຊຸມໄດ້ເຂົ້າລາຍງານຜົນກອງປະຊຸມຕໍ່ ທ່ານ ບຸນເຫຼືອ ສິນໄຊວໍລະວົງ ຮອງເລຂາພັກແຂວງ ປະທານຄະນະກຳມະການປົກຄອງແຂວງຫຼວງພະບາງ ຊຶ່ງທ່ານກໍໄດ້ຍ້ອງຍໍຊົມເຊີຍ ຕໍ່ຜົນກອງປະຊຸມທີ່ທຸກພາກສ່ວນຈະໄດ້ພ້ອມສຸມໃສ່ນຳໃຊ້ມາດຕະການຕ່າງໆ ເພື່ອຮີບຮ້ອນແກ້ໄຂວຽກງານຕ້ານ ແລະ ສະກັດກັ້ນຂະບວນການອາຊະຍາກຳສັດປ່າຂ້າມຊາດຢູ່ແຂວງຫຼວງພະບາງ ອັນສຳຄັນທຸກພາກສ່ວນຈະຕ້ອງໄດ້ເປັນເຈົ້າການຮ່ວມກັນ.ຂ່າວ:ອາພຸດເດດ
ຄໍາເຫັນ