 |
ໃນໂອກາດນີ້, ທ່ານ ຫງວຽນກວີ້ຈັອງ ຮອງຫົວໜ້າໜັງສືພິມ ແລະ ວິທະຍຸ-ໂທລະພາບຫາຍຟອ ໄດ້ລາຍງານໃຫ້ຮູ້ວ່າ: ໜັງສືພິມ ແລະ ວິທະຍຸ-ໂທລະພາບຫາຍຟອງ ແມ່ນກະບອກສຽງອົງການສື່ມວນຊົນທີ່ສຳຄັນຂອງນະຄອນຫາຍຟອງຂອງຫວຽດນາມ ໂດຍໄດ້ໂຮມເຂົ້າກັນລະຫວ່າງບັນດາສື່ສິ່ງພິມ ແລະ ວິທະຍຸ-ໂທລະພາບຂອງນະຄອນຫາຍຟອງ ແລະ ແຂວງຫາຍເຢືອງ ໃນເດືອນກໍລະກົດປີ 2025 ເຮັດໃຫ້ກາຍເປັນສື່ມວນຊົນທີ່ທັນສະໄໝແລະ ຄົບວົງຈອນ.
ສໍາລັບໂຄງສ້າງ ແລະ ການຈັດສັນບຸກຄະລາກອນຫຼັງການໂຮມກັນມີບຸກຄະລາກອນທັງໝົດ 400 ກວ່າຄົນປະກອບມີນັກຂ່າວ, ບັນນາທິການ, ນັກເຕັກນິກ ແລະ ພະນັກງານທົ່ວໄປຢູ່ໃນ 15 ພະແນກວິຊາສະເພາະເຊັ່ນ: ພະແນກຂ່າວປະຈຳວັນ, ພະແນກເຕັກໂນໂລຊີ-ເຕັກນິກ, ພະແນກເນື້ອໃນດີຈີຕອນ, ພະແນກໜັງສືພິມ ແລະ ອື່ນໆ.ໃນນັ້ນຊ່ອງໂທລະພາບ: ປະກອບມີ 2 ຊ່ອງຫຼັກຄື: THP ແລະ THP3. ສ່ວນຄື້ນວິທະຍຸ: ອອກອາກາດໃນ 3 ຄື້ນຄວາມຖີ່ຄື FM 93,7 MHz, 102,2 MHz ແລະ 104,5 MHz. ເນື້ອໃນຫຼັກໃນການນຳສະເໜີແມ່ນຂ່າວສານບ້ານເມືອງ, ເສດຖະກິດ, ວັດທະນະທຳ-ສັງຄົມ, ລາຍການບັນເທີງ ແລະ ການພັດທະນາຂອງນະຄອນຫາຍຟອງສູ່ການເປັນເມືອງທ່າລະດັບໂລກ. ສໍາລັບໜັງສືພິມ ແລະ ສື່ມີເດຍອອນລາຍປະກອບມີ: ເວັບໄຊຢ່າງເປັນທາງການ: ທ່ານສາມາດຕິດຕາມອ່ານຂ່າວສານທັງຮູບແບບໜັງສືພິມອອນລາຍ, ຟັງພອດແຄສ (Podcast) ແລະເບິ່ງລາຍການຢ້ອນຫຼັງໄດ້ທີ່ເວັບໄຊTHP ຫາຍຟອງ.
ພ້ອມນີ້, ຊ່ອງທາງໂຊຊຽວມີເດຍ: ຕິດຕາມຜ່ານເຟສບຸກໄດ້ທີ່ Facebook THP | Hai Phong. ຮັບຊົມວິດີໂອຂ່າວສານ 24/ ໄດ້ທີ່YouTube àiPhátthanhvàTruynhình Hi Phòng. ອົງກອນສື່ແຫ່ງນີ້ຖືເປັນກະບອກສຽງທີ່ສຳຄັນ ແລະ ມີການຫັນປ່ຽນໄປສູ່ລະບົບດີຈີຕອນຢ່າງເຕັມຮູບແບບເພື່ອໃຫ້ເຂົ້າເຖິງຜູ້ຊົມແລະຜູ້ອ່ານໄດ້ທຸກບ່ອນທຸກເວລາ.
ໂອກາດດຽວກັນນີ້, ຄະນະສື່ມວນຊົນລາວຍັງໄດ້ໄປຢ້ຽມຊົມເກາະກັກບາ (CátBà) ເກາະທີ່ໃຫຍ່ທີ່ສຸດຕັ້ງຢູ່ທາງພາກເໜືອຂອງປະເທດຫວຽດນາມໃນເຂດອ່າວຮ່າລອງ ແລະ ອ່າວລານຮ້າ ໂດຍຂຶ້ນກັບນະຄອນຫາຍຟອງ. ເກາະແຫ່ງນີ້ໄດ້ຮັບການຂຶ້ນທະບຽນເປັນເຂດສະຫງວນຊີວະນາໆພັນໂລກໂດຍ UNESCO ແລະ ເປັນໜຶ່ງໃນສະຖານທີ່ທ່ອງທ່ຽວທາງທໍາມະຊາດທີ່ມີຊື່ສຽງ ແລະ ສວຍງາມທີ່ສຸດ. ພ້ອມນີ້ກໍຍັງໄດ້ໄປທັດສະນະຫໍພິພິທະພັນນະຄອນຫາຍຟອງໜຶ່ງໃນສະຖາປັດຕະຍະກຳອັນເກົ່າແກ່ ແລະ ເປັນຫໍພິພິທະພັນຄົ້ນຄວ້າທ້ອງຖິ່ນແຫ່ງທຳອິດຂອງຫວຽດນາມ ຊຶ່ງໄດ້ເປີດໃຫ້ບໍລິການຢ່າງເປັນທາງການໃນວັນທີ 20 ທັນວາ 1959.
ປັດຈຸບັນເປັນບ່ອນເກັບຮັກສາເອກະສານ ແລະ ວັດຖຸບູຮານຫຼາຍກວ່າ 50,000 ຊິ້ນ, ໂດຍມີຫ້ອງຈັດສະແດງຫຼັກ 17 ຫ້ອງ, ແບ່ງອອກເປັນ 3 ສ່ວນໃຫຍ່ຄື: ປະຫວັດສາດຍຸກບູຮານຈັດສະແດງວັດຖຸບູຮານຍຸກກ່ອນປະຫວັດສາດເຊັ່ນ: ວັດທະນະທຳກາຍແບ້ວ ແລະ ຈາງແກ້ງທີ່ມີອາຍຸກວ່າ 7,000 ປີ ແລະ ເຄື່ອງປັ້ນດິນເຜົາສະໄໝຣາຊະວົງຫຼີ, ເຈີນ, ເລ, ມາກ; ໄລຍະການຕໍ່ສູ້ກູ້ຊາດເຊັ່ນ: ເອກະສານ ແລະ ອາວຸດໃນສະໄໝສົງຄາມຕໍ່ຕ້ານຝຣັ່ງແລະ ອາເມຣິກາ ຊຶ່ງມີຈຸດເດັ່ນຄື: ຊິ້ນສ່ວນຂອງປະຫາກາແຟງລອງເຈົາທີ່ລອດພົ້ນຈາກການຖິ້ມລະເບີດ ແລະ ຍຸກພັດທະນາ ແລະ ເສດຖະກິດຫ້ອງສະແດງສະເພາະກ່ຽວກັບວັດທະນະທຳທາງທະເລ, ເສດຖະກິດການເດີນເຮືອແລະ ອະທິປະໄຕຂອງໝູ່ເກາະ.
ແຫຼ່ງຂ່າວ: ວຽງຈັນໃໝ່
ຄໍາເຫັນ