 |
ກອງປະຊຸມສາກົນໄດ້ຮັບກຽດຂຶ້ນກ່າວເປີດກອງປະຊຸມໂດຍ ທ່ານ ນາງ ຫງວຽນ ທີ ຫົ່ງ ກໍາມະການສູນກາງພັກກອມມູນິດ ຫວຽດນາມ ຮອງປະທານສະພາແຫ່ງຊາດ ແລະ ມີຄໍາເຫັນໂດຍທ່ານ ຫງວຽນ ຫຶວ ເງ່ຍ ກໍາມະການສູນກາງພັກ ປະທານອົງການກວດສອບແຫ່ງລັດ ສສ ຫວຽດນາມ ຊຶ່ງພາຍໃນກອງປະຊຸມໄດ້ມີການແລກປ່ຽນບົດຮຽນລະຫວ່າງບັນດາສະຖາບັນກວດສອບສູງສຸດຢ່າງກົງໄປກົງມາ ເພື່ອຖອດຖອນບົດຮຽນອັນດີ ແລະ ທິດທາງໃນການພັດທະນາວຽກງນກວດສອບໃນຕໍ່ໜ້າ ຊຶ່ງໄດ້ສຸມໃສ່ໃນວຽກງານການຫັນເປັນດີຈີຕອນໃນວຽກງານກວດສອບພາກລັດ, ການນໍາໃຊ້ປັນຍາປະດິດໃນການກວດສອບ ແລະ ລວມເຖິງພາລະບົດບາດຂອງອົງການກວດສອບແຫ່ງລັດ ໃນການຄຸ້ມຄອງ ແລະ ຕິດຕາມບັນຫາການພັດທະນາຂອງແຕ່ລະປະເທດ. ພ້ອມນີ້ ຍັງໄດ້ມີການຈັດເວທີສົນທະນາໂຕະມົນ ຈາກບັນດາຜູ້ນໍາຂອງສະຖາບັນກວດສອບສູງສຸດ ກອງປະຊຸມໄດ້ທົບທວນ ແລະ ແລກປ່ຽນບົດຮຽນກ່ຽວກັບສະຖານະພາບທາງກົດໝາຍ, ຄວາມເປັນເອກະລາດ, ບົດບາດຂອງອົງການກວດສອບແຫ່ງລັດລວມທັງທ່າອ່ຽງການພັດທະນາ ແລະ ນະວັດຕະກຳໃໝ່ ເຊັ່ນ: ການຫັນເປັນດີຈີຕອນ, ການນຳໃຊ້ປັນຍາປະດິດ (AI) ແລະ ຂໍ້ມູນຂະໜາດໃຫຍ່ ໃນວຽກງານກວດສອບ. ກອງປະຊຸມໄດ້ກໍານົດທິດທາງແຜນການໃນຕໍ່ໜ້າຄື: ສືບຕໍ່ພັດທະນາປັບປຸງດ້ານກົດໝາຍ ແລະ ມາດຕະຖານການກວດສອບ, ການຍົກລະດັບວິທີການກວດສອບ, ຍົກລະດັບການຕິດຕາມກວດກາຜົນການກວດສອບ, ເພີ່ມມາດຕະການຕໍ່ການລະ ເມີດ ແລະ ເພີ່ມທະວີການຮ່ວມມືລະຫວ່າງສະຖາບັນກວດສອບສູງສຸດສາກົນໃນຂອບສອງຝ່າຍ ແລະ ຫຼາຍຝ່າຍເພື່ອຍົກລະດັບພັດທະນາຄວາມສາມາດ.
ພ້ອມນັ້ນ, ໃນໂອກາດເຂົ້າຮ່ວມກອງປະຊຸມສາກົນຄັ້ງນີ້, ທ່ານ ວຽງທະວີສອນ ເທບພະຈັນ ພ້ອມດ້ວຍຄະນະ ຍັງໄດ້ຖືໂອກາດພົບປະສອງຝ່າຍກັບທ່ານ ຊຣີ ຊານໄຈ ເມີທີ ປະທານກວດສອບ ແລະ ຄວບຄຸມແຫ່ງອິນເດຍ ທັງເປັນປະທານສະຫະພັນສະຖານກວດສອບສູງສຸດອາຊີ ASOSAI ເພື່ອປຶກສາຫາລືກ່ຽວກັບການຮ່ວມມືສອງຝ່າຍ ລະຫວ່າງສອງອົງການກວດສອບແຫ່ງລັດ ໃນຕໍ່ໜ້າກໍຄືການສ້າງເປັນບົດບັນທຶກຄວາມເຂົ້າໃຈ ເພື່ອຍົກລະດັບການພົວພັນຮ່ວມມືທາງດ້ານວິຊາການ ແລະ ການພັດທະນາບຸກຄະລາກອນ ໂດຍຜ່ານຫຼາຍຮູບການເປັນຕົ້ນ: ການແລກປ່ຽນບົດຮຽນ, ການຝຶກອົບຮົມໃນຮູບແບບຕ່າງໆ ແລະ ໂດຍສະເພາະການພັດທະນາສະຖາບັນຄົ້ນຄ້ວາ ແລະ ຝຶກອົບຮົມຂອງອົງນກວດສອບແຫ່ງລັດ.
ພາຍຫຼັງສໍາເລັດກອງປະຊຸມສາກົນ, ຄະນະຜູ້ແທນຈາກບັນດາສະຖາບັນກວດສອບສູງສຸດ 16 ປະເທດ ໄດ້ເຂົ້າຢ້ຽມຂໍ່ານັບ ແລະ ພົບປະກັບ ທ່ານ ເຈິ່ນ ແທັງ ເໝິ້ນ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ສສ ຫວຽດນາມ ຊຶ່ງໃນການພົບປະດັງກ່າວ ຄະນະຜູ້ແທນໄດ້ລາຍງານສະພາບດ້ານດີ, ດ້ານຕັ້ງໜ້າ, ບົດຮຽນທີ່ຖອດຖອນໄດ້ ແລະ ທິດທາງໃນຕໍ່ໜ້າໃນກອງປະຊຸມສໍາມະນາສາກົນຕໍ່ປະທານສະພາແຫ່ງຊາດ ສສ ຫວຽດນາມ. ພ້ອມນັ້ນ, ທ່ານປະທານສະພາແຫ່ງຊາດ ໄດ້ສະແດງຄວາມຊົມເຊີຍຕໍ່ຜົນສໍາເລັດກອງປະຊຸມສໍາມະນາສາກົນດັ່ງກ່າວ ຊຶ່ງເປັນຂີດໝາຍອັນສໍາຄັນໃນການກ້າວສູ່ການພັດທະນາວຽກງານກວດສອບຫັນເປັນທັນສະໄໝ ແລະ ພ້ອມກັບຊຸກຍູ້ໃຫ້ບັນດາພາກສ່ວນຫົວໜ່ວຍງົບປະມານ ແລະ ພາກສ່ວນອື່ນໆໃຫ້ຫັນເປັນທັນສະໄໝໄປຄຽງຄູ່ກັນ ແລະ ມີຄວາມໂປ່ງໃສ່ ຊຶ່ງທ່ານປະທານສະພາໄດ້ເນັ້ນໜັກໃຫ້ບັນດາສະຖາບັນກວດສອບສູງສຸດ ສືບຕໍ່ມີການແລກປ່ຽນບົດຮຽນວຽກງານກວດສອບ, ພັດທະນາດ້ານບຸກຄະລາກອນ ແລະ ການຫັນເປັນທັນສະໄໝ ເພື່ອຍົກສູງຄວາມຮູ້, ປະສົບການ ແລະ ກຳແໜ້ນເນື້ອໃນມາໝູນໃຊ້ໃນການພັດທະນາວຽກງານກວດສອບແຫ່ງລັດຕົວຈິງໃຫ້ມີຄວາມເຂັ້ມແຂງຄຽງຄູ່ກັບການພັດທະນາປະເທດຊາດ ໃຫ້ມີຄວາມໂປ່ງໃສ, ຍຸດຕິທຳ ແລະ ປະກອບສ່ວນໃນການສ້າງສາພັດທະນາປະເທດຊາດ.
(ຂ່າວ: ອົງການກວດສອບ)
ຄໍາເຫັນ