 |
ພະອາຈານ ພວງປະເສີດ ພູມະວົງ ກ່າວວ່າ: ການສຶກສາສົງ ແມ່ນສ່ວນໜຶ່ງຂອງລະບົບການສຶກສາແຫ່ງຊາດ ໃນການພັດທະນາຊັບພະຍາກອນມະນຸດ ທັງເປັນປັດໄຈສຳຄັນຍິ່ງ ໃນການປະກອບສ່ວນຊ່ວຍພັດທະນາປະ ເທດຊາດໃຫ້ມີຄວາມຈະເລີນກ້າວໜ້າ ແລະ ເປັນໄປໃນແນວທາງທີ່ຖືກຕ້ອງຕາມຄວາມປະສົງຂອງສັງຄົມ ໂດຍສະເພາະ ການສ້າງພະສົງ-ສາມະເນນໃຫ້ໄດ້ຮັບການສຶກສາຢ່າງທົ່ວເຖິງ. ອີກດ້ານໜຶ່ງເປັນການແບ່ງເບົາພາລະກໍ່ສ້າງຊັບພະຍາກອນມະນຸດ ຊ່ວຍຂະແໜງສຶກສາທິການ ແລະ ກິລາ, ການສຶກສາສົງ ແມ່ນການກໍ່ສ້າງບຸກຄົນຜູ້ໜຶ່ງໃຫ້ມີທັກສະທັງສອງດ້ານຄື: ດ້ານພຸດທະສາສະໜາ, ດ້ານຝ່າຍບ້ານເມືອງຄຽງຄູ່ກັນ; ສຳລັບການສຶກສາພຸດທະສາສະໜາພາຍໃຕ້ ບໍລິບົດປັນຍາປະດິດ (AI) ໄດ້ຮັບການພັດທະນາ ແລະ ປ່ຽນແປງໄປຢ່າງຫຼວງຫຼາຍໃນແຕ່ລະຂົງເຂດ (ນິກາຍ) ເນື່ອງຈາກແຕ່ລະທ້ອງຖິ່ນມີບໍລິບົດທາງວັດທະນະທຳ, ຄຳສອນ ແລະ ແນວຄິດທີ່ແຕກຕ່າງກັນ. AI ໄດ້ເຂົ້າມາມີບົດບາດເປັນເຄື່ອງມືຊ່ວຍຊອກຫາຂໍ້ມູນ, ແປພາສາຄຳສອນບູຮານ ແລະ ສ້າງປະສົບການການຮຽນຮູ້ແບບສະເພາະບຸກຄົນການນຳໃຊ້ AI ເຂົ້າໃນການສຶກສາພຸດທະສາສະໜາ ໂດຍແບ່ງຕາມຂົງເຂດ ແລະ ນິກາຍ ມີລັກສະນະເດັ່ນ ການອະນຸລັກ ແລະ ສ້າງຖານຂໍ້ມູນການນຳໃຊ້ AI ເຂົ້າມາຊ່ວຍໃນການແປ ແລະ ຖອດລະຫັດຄຳສອນຈາກຄຳພີໃບລານ ຫຼື ພາສາບາລີມາເປັນພາສານັ້ນໆ ເພື່ອໃຫ້ຜູ້ສຶກສາເຂົ້າເຖິງໄດ້ງ່າຍຂຶ້ນ; ລະບົບການຮຽນ-ການສອນຂອງສົງ ການປ່ຽນຮູບແບບການທ່ອງຈຳມາເປັນການໃຊ້ AI ຊ່ວຍສະຫຼຸບ, ວິເຄາະ ແລະ ປຽບທຽບອັດຖະກະຖາ (ຄຳອະທິບາຍຄຳສອນ); ການເຜີຍແຜ່ ແລະ ຕອບຄຳຖາມທຳມະເລີ່ມມີການພັດທະນາ Chatbot ທາງພຸດທະສາສະໜາ ເພື່ອຕອບຄຳຖາມຂໍ້ຂ້ອງໃຈກ່ຽວກັບຫຼັກທຳ, ວິໃນສົງ ແລະ ການປະຕິບັດກຳມະຖານຕະຫຼອດ 24 ຊົ່ວໂມງ.
 |
ພະອາຈານ ພວງປະເສີດ ພູມະວົງ ໃຫ້ຮູ້ຕື່ມວ່າ: ໃນສົກປີ 2026-2027 ຊຶ່ງເປັນປີເລີ່ມຕົ້ນຂອງແຜນພັດທະນາການສຶກສາ ແລະ ກິລາ 5 ປີ ຄັ້ງທີ IX (2026-2030) ເພື່ອແນໃສ່ຍົກສູງຄຸນນະພາບ ໃນການກໍ່ສ້າງບຸກຄະລາກອນການສຶກສາສົງໃຫ້ມີຄຸນນະພາບ ແລະ ປະສິດທິພາບ, ເປັນພົນລະເມືອງທີ່ດີ ມີນໍ້າໃຈຮັກເຊື້ອແພງຊາດ, ເຄົາລົບຮັກພະພຸດທະສາສະໜາ, ຮັກລະບອບໃໝ່, ມີຄຸນນະທໍາ, ມີລະບຽບວິໄນ, ມີຄວາມຮູ້ທາງໂລກ ແລະ ທາງທໍາຄວບຄູ່ກັນ ເພື່ອເປັນທ່າແຮງໃນການພັດທະນາປະເທດຊາດ ແລະ ພະພຸດທະສາສະໜາ. ກະຊວງສຶກສາທິການ ແລະ ກິລາ ສົມທົບກັບກຳມາທິການສຶກສາສົງສູນກາງ ອພສ, ໄດ້ກຳນົດວຽກງານຈຸດສຸມຕໍ່ໜ້າ ຄື: ສຸມໃສ່ການປັບປຸງ (ຮ່າງ) ດໍາລັດວ່າດ້ວຍການສຶກສາສົງໃຫ້ສໍາເລັດ; ສ້າງແຜນວິເຄາະຕົວເລກບັນຈຸບັນພະຊິດຄູ ແລະ ບໍລິຫານໃໝ່ປະຈໍາປີ 2026 ແລະ ຈັດຕັ້ງແຜນພັດທະນາການສຶກສາສົງ 5 ປີ (2026-2030); ການສຶກສາສາຍປະຣິຍັດຕິທໍາ ຈັດຕັ້ງການຮຽນ-ການສອນຊັ້ນນັກທຳ (ຊັ້ນນັກທຳຕີ, ຊັ້ນນັກທຳໂທ ແລະ ຊັ້ນນັກທຳເອກ) ແລະ ຈັດພິມປຶ້ມແບບຮຽນ ແລະ ຄູ່ມືຄູ; ການຍົກສະຖານະວິທະຍາໄລຄູສົງອົງຕື້ ເປັນສະຖາບັນພັດທະນາການສຶກສາສົງ; ການຮ່ວມມືກັບມະຫາວິທະຍາໄລສົງ ແລະ ວິທະຍາໄລສົງພາຍໃນ ແລະ ຕ່າງປະເທດ ເພື່ອພັດທະ ນາການສຶກສາສົງລາວ; ຂະຫຍາຍໂຮງຮຽນສາມັນສຶກສາສົງ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງການພັດທະນາການສຶກສາສົງ; ປັບປຸງດຳລັດວ່າດ້ວຍການສຶກສາສົງ; ສ້າງ ແລະ ປັບປຸງນິຕິກຳລຸ່ມດຳລັດຈຳນວນໜຶ່ງ ເພື່ອເປັນເຄື່ອງມືຄຸ້ມຄອງວຽກງານການສຶກສາສົງ ແລະ ໃຫ້ສອດຄ່ອງກັບແຜນພັດທະນາເສດຖະ ກິດ-ສັງຄົມແຕ່ລະໄລຍະ.
ຂ່າວ-ພາບ: ບຸນອູ້ມ+ບຸນຕອມ
ຄໍາເຫັນ