ຮອງນາຍົກລັດຖະມົນຕີ ຕ້ອນຮັບການເຂົ້າຢ້ຽມອຳລາຂອງທູດອົສຕຣາລີ ປະຈຳລາວ

ໂອກາດນີ້, ທ່ານ ທອງສະລິດ ມັງໜໍ່ເມກ ໄດ້ລາຍງານໃຫ້ທ່ານເອກອັກຄະລັດຖະທູດອົສຕຣາລີ ຮັບຊາບກ່ຽວກັບຄວາມຄືບໜ້າໃນການປະຕິຮູບລະບົບການສຶກສາ ສາຍສາມັນຂອງ ສປປ ລາວ ເປັນ 6+3+3 ປັດຈຸບັນ ພວມຢູ່ໃນໄລຍະປັບປຸງຫຼັກສູດໃໝ່ ແລະ ຈະເລີ່ມຈັດຕັ້ງປະຕິບັດໃນສົກຮຽນ 2027-2028 ຂັ້ນ ປ.1-ປ.3 ແລະ ໃຫ້ສຳເລັດໃນສົກຮຽນ 2030-2031. ພ້ອມດຽວກັນນີ້, ທ່ານໄດ້ສະແດງຄວາມຍ້ອງຍໍຊົມເຊີຍທ່ານທູດອົສຕຣາລີ ທີ່ປະຕິບັດໜ້າທີ່ດ້ວຍຜົນສຳເລັດອັນຈົບງາມ ຕະຫຼອດເວລາການມາເຮັດໜ້າທີ່ການທູດຢູ່ລາວ ສະແດງຄວາມຂອບໃຈສະຖານທູດອົສຕຣາລີ ປະຈຳ ລາວ ທີ່ເປັນຂົວຕໍ່ທີ່ດີໃນການຮ່ວມມື ລະຫວ່າງລັດຖະບານອົສຕຣາລີ ກັບລັດຖະບານ ສປປ ລາວ ໃນຫຼາຍຂະແໜງການ ໂດຍສະເພາະຂະແໜງການສຶກສາ, ວິທະຍາສາດ ແລະ ກິລາ ເຫັນວ່າມີການພັດທະນາດີຂຶ້ນເປັນກ້າວໆ ເປັນຕົ້ນ ຊ່ວຍໃນການຝຶກອົບຮົມຄູສອນ, ຍົກລະດັບການຝຶກເວົ້າພາສາລາວຂອງເດັກນ້ອຍໃນເຂດຫ່າງໄກ, ການສ້າງວີດີໂອສັ້ນ ສົ່ງເສີມການສຶກສາ ແລະ ວີດີໂອການຮຽນ-ການສອນຕ່າງໆ ເຫັນວ່າສັງຄົມໃຫ້ການຕອບຮັບເປັນຢ່າງດີ. ນອກນັ້ນ, ທ່ານຮອງນາຍົກລັດຖະມົນຕີ ຍັງໄດ້ລາຍງານໃຫ້ທ່ານທູດຮັບຊາບຕື່ມກ່ຽວກັບວຽກງານການສຶກສາຊັ້ນສູງ ຊຶ່ງປັດຈຸບັນ ທາງກະຊວງ ສສກ ໄດ້ສ້າງຕັ້ງມະຫາວິທະຍາໄລສ້າງຄູແຫ່ງຊາດ ເພື່ອແນໃສ່ລົງເລິກການສິດສອນໃຫ້ມີປະສິດທິພາບດີຂຶ້ນກ່ວາເກົ່າ ຊຶ່ງເຫັນວ່າມີຜູ້ສົນໃຈສະໜັກຮຽນຄູເພີ່ມຂຶ້ນ. ແນວໃດກໍຕາມ ຕ້ອງມີການຝຶກອົບຮົມຄູຕື່ມອີກ ເພື່ອໃຫ້ສອດຄ່ອງກັບຫຼັກສູດໃໝ່ ເຮັດໃຫ້ການຮຽນ-ການສອນມີປະສິດທິພາບດີຂຶ້ນ. ພ້ອມນັ້ນ, ທ່ານຍັງໄດ້ລາຍງານກ່ຽວກັບວຽກງານພັດທະນາຊັບພະຍາກອນມະນຸດ, ວຽກງານແມ່ຍິງ, ແມ່ ແລະ ເດັກ ທີ່ທາງລັດຖະບານອົສຕຣາລີ ໃຫ້ການສະໜັບສະໜູນໃຫ້ຮັບຊາບຕື່ມອີກ.

ໂອກາດດຽວກັນ, ທ່ານ ນາງ ເມແກນ ຈອນ ໄດ້ສະແດງຄວາມຂອບໃຈລັດຖະບານ ສປປ ລາວ ກໍຄື ກະຊວງ ສສກ ທີ່ໃຫ້ການຮ່ວມືສະໜັບສະໜູມທີມງານຂອງລັດຖະບານອົສຕຣາລີ ໂດຍສະເພາະແມ່ນແຜນງານປັບປຸງຄຸນນະພາບ ແລະ ຂະຫຍາຍໂອກາດການເຂົ້າຮຽນສຳລັບການສຶກສາຂັ້ນພື້ນຖານຢູ່ ສປປ ລາວ ຫຼື ແຜນງານ BEQUAL ເຮັດໃຫ້ການປະຕິບັດໜ້າທີ່ຂອງທ່ານມີຜົນສຳເລັດ ທ່ານກ່າວວ່າວຽກງານການສຶກສາ ເປັນບຸລິມະສິດຂອງລັດຖະບານອົສຕຣາລີ ລວມເຖິງການໃຫ້ທຶນການສຶກສາ ໃນໄລຍະຜ່ານມາການໃຫ້ການຊ່ວຍເຫຼືອຜ່ານແຜນງານບີຄວາເຫັນວ່າ ການຮຽນຮູ້ຂອງເດັກນ້ອຍລາວ ເພີ່ມຂຶ້ນຈາກ 25% ໃນປີ 2024 ເປັນ 45% ໃນປີ 2026 ການເຂົ້າຮ່ວມຝຶກອົບຮົມຄູ ເພີ່ມຂຶ້ນເປັນ 3 ເທົ່າ. ນອກນັ້ນ, ທາງລັດຖະບານອົສຕຣາລີ ຍັງໄດ້ໃຫ້ການຊ່ວຍເຫຼືອຍົກລະດັບພາສາອັງກິດ ສຳລັບພະນັກງານລັດຖະກອນຕື່ມອີກ. ນອກນັ້ນ, ທ່ານທູດອົສຕຣາລີ ຍັງໄດ້ລາຍງານວຽກສາທາລະນະສຸກ, ໂຍທາທິການ ແລະ ຂົນສົ່ງ, ວຽກງານແມ່ຍິງ ແລະ ເດັກນ້ອຍ ໃຫ້ທ່ານຮອງນາຍົກລັດຖະມົນຕີຮັບຊາບ ຕື່ມອີກ.