 |
ທ່ານ ຄໍາເພົ້າ ວັນນະວົງ ຫົວໜ້າກົມກວດກາ ກະຊວງ ວທ ກ່າວວ່າ: ການຈັດງານຄັ້ງນີ້, ຖືເປັນບາດ ກ້າວອັນສໍາຄັນໃນການຮ່ວມມືດ້ານວຽກງານຮູບເງົາຂອງ 6 ປະເທດລຸ່ມແມ່ນໍ້ຂອງ-ແມ່ນໍ້າລ້ານຂ້າງ ທີ່ມີເປົ້າໝາຍ ແລະ ຈຸດປະສົງໃນການສົ່ງເສີມ, ແລກປ່ຽນ ແລະ ຮ່ວມມືດ້ານຮູບເງົາ; ໃນໄລຍະຜ່ານມາ, ສປປ ລາວ ໄດ້ສົ່ງຮູບເງົາ ແລະ ຄະນະຜູ້ແທນເຂົ້າຮ່ວມງານສັບປະດາຮູບເງົາແມ່ນໍ້າຂອງ-ແມ່ນໍ້າລ້ານຊ້າງທຸກຄັ້ງ ນັບແຕ່ຄັ້ງທີ 1 ຈົນຮອດ ຄັ້ງທີ 7 ເພື່ອເສີມສ້າງການພົວພັນ ແລະ ຮ່ວມມື ຊຶ່ງກັນ ແລະ ກັນ ລະຫວ່າງ ສປປ ລາວ ແລະ ສປ ຈີນ ກໍຄືບັນດາປະເທດໃນຂົງເຂດລຸ່ມແມ່ນໍ້າຂອງ; ສປປ ລາວ ຕີລາຄາສູງຕໍ່ການສະໜັບສະໜູນຮອບດ້ານ ແລະ ຕໍ່ເນື່ອງຂອງ ສປ ຈີນ ເພື່ອປະກອບສ່ວນເຂົ້າໃນການພັດທະນາວຽກງານຮູບເງົາ ໃນຂົງເຂດບັນດາປະເທດລຸ່ມແມ່ນໍ້າຂອງໃຫ້ມີຄວາມຍືນຍົງ.
 |
ໂດຍຜ່ານກິດຈະກຳເຄື່ອນໄຫວຫຼາຍຮູບແບບເປັນຕົ້ນ: ການແລກປ່ຽນດ້ານບຸກຄະລາກອນ ແລະ ຝຶກອົບຮົມທາງດ້ານເຕັກນິກຮູບເງົາ ຊຶ່ງ ສປປ ລາວ ກໍໄດ້ພະຍາຍາມຢ່າງຕັ້ງໜ້າເຂົ້າຮ່ວມບັນດາກິດຈະກຳຕ່າງໆທີ່ ສປ ຈີນ ໄດ້ຈັດຕັ້ງຂຶ້ນ ແລະ ງານສັບປະດາຮູບເງົາສາກົນແມ່ນໍ້າຂອງ-ແມ່ນໍ້າລ້ານຊ້າງຄັ້ງທີ 8 ໃນຄັ້ງນີ້, ຈະເປັນຂີດໝາຍສໍາຄັນທາງປະຫວັດສາດ ແຫ່ງການຮ່ວມມືລະຫວ່າງບັນດາປະເທດໃນຂົງເຂດລຸ່ມແມ່ນໍ້າຂອງ-ແມ່ນໍ້າລ້ານຊ້າງ ປະກອບສ່ວນເຂົ້າໃນການສະເຫຼີມສະຫຼອງການສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 10 ປີ ແລະ 65 ປີ ແຫ່ງການສ້າງຕັ້ງສາຍພົວພັນການທູດລະຫວ່າງລາວ-ຈີນ ທັງເປັນປີມິດຕະພາບລາວ-ຈີນ 2026 ແລະ ຫວັງຢ່າງຍິ່ງວ່າ ບັນດາທ່ານຜູ້ແທນຮູບເງົາທັງ 6 ປະເທດ ຈະຖືໂອກາດສໍາຄັນນີ້ ເພື່ອປຶກສາຫາລືໃນການຮ່ວມກັນຊຸກຍູ້, ສົ່ງເສີມ ແລະ ພັດທະນາ” ວຽກງານຮູບເງົາ ລະຫວ່າງ 6 ປະເທດໃນພາກພື້ນໃຫ້ໄດ້ຮັບຜົນສໍາເລັດຢ່າງໜ້າເພິ່ງພໍໃຈ ແລະ ໃຫຍ່ຫຼວງກວ່າເກົ່າ.
 |
ທ່ານ ໄຈ້ ຢູ່ຫຼົງ ຮອງຫົວໜ້າຄະນະໂຄສະນາແຂວງຢຸນນານ, ຫົວໜ້າພະແນກຮູບເງົາແຂວງຢຸນນານ ໄດ້ກ່າວວ່າ: ອາທິດຮູບເງົາສາກົນແມ່ນໍ້າຂອງ-ແມ່ນໍ້າລ້ານຊ້າງຄັ້ງທີ 8 ຈຸດປະສົງເພື່ອເພີ່ມທະວີການແລກປ່ຽນ ແລະ ການຮ່ວມມືໃນຂະແໜງສຽງ-ພາບທົ່ວອ່າງແມ່ນໍ້າຂອງ-ແມ່ນໍ້າລ້ານຊ້າງ. ພາຍໃຕ້ຫົວຂໍ້ ທົດສະວັດແຫ່ງການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ, ຮ່ວມກັນໂດຍຄວາມຝັນຂອງໂຮງໜັງ, ພ້ອມກັບຫ້າພາກສ່ວນສະໜັບສະໜູນ: ການສາຍຮູບເງົາແມ່ນໍ້າຂອງ-ແມ່ນໍ້າລ້ານຊ້າງ ເປັນການສົນທະນາກ່ຽວກັບການຮ່ວມມືດ້ານອຸດສາຫະກໍາ, ການສົ່ງເສີມໂຄງການຮູບເງົາ ແລະ ໂທລະພາບ, ການຝຶກອົບຮົມພິເສດກ່ຽວກັບເຕັກໂນໂລຊີສຽງ-ພາບ AI ແລະ ໃນລະຫວ່າງງານສາຍຮູບເງົາທີ່ມີຄຸນນະພາບສູງ ໄດ້ຄັດເລືອກມາຈາກຫົກປະເທດແມ່ນໍ້າຂອງ-ແມ່ນໍ້າລ້ານຊ້າງຈະຖືກສາຍໃນໂຮງໜັງ, ຜູ້ຊ່ຽວຊານດ້ານຮູບເງົາ ແລະ ໂທລະພາບຈາກ 6 ປະເທດ ຈະຈັດການສົນທະນາໂຕະມົນກ່ຽວກັບຫົວຂໍ້ອຸດສາຫະກຳທີ່ທັນສະໄໝ ເພື່ອສົ່ງເສີມການແລກປ່ຽນອຸດສາຫະກຳ ແລະ ການຮ່ວມມືກັນ. ກອງປະຊຸມແລກປ່ຽນ ແລະ ຝຶກອົບຮົມພິເສດກ່ຽວກັບການສ້າງສຽງ-ພາບ AI ຈະຖືກສະເໜີໃຫ້ຜູ້ປະຕິບັດທ້ອງຖິ່ນໃນລາວ. ຜູ້ສ້າງຊາວຈີນ ແລະ ຕ່າງປະເທດ ຈະເລີ່ມຕົ້ນການເດີນທາງໄປທັດສະນະສຶກສາຕາມເສັ້ນທາງລົດໄຟຈີນ-ລາວ ເພື່ອຄົ້ນຫາວັດສະດຸສ້າງສັນສຳລັບການຜະລິດຮູບເງົາ ແລະ ໂທລະພາບຂ້າມຊາຍແດນ.
 |
ການສາຍຮູບເງົາແບບດັ້ງເດີມ ເພື່ອດຳເນີນເປົ້າໝາຍຂອງການສື່ສານວັດທະນະທຳ, ການຈັບຄູ່ອຸດສາ ຫະກຳ ແລະ ການພັດທະນາພອນສະຫວັນ. ໂດຍໃຊ້ຮູບເງົາ ແລະ ໂທລະພາບເປັນສື່ກາງ, ມັນສະແດງໃຫ້ເຫັນເຖິງພູມສັນຖານການພັດທະນາຂອງປະເທດທີ່ເຂົ້າຮ່ວມ ແລະ ເປັນການສົ່ງເສີມຄວາມເຂົ້າໃຈ ຊຶ່ງກັນ ແລະ ກັນ, ຄວາມຜູກພັນທາງດ້ານອາລົມ ແລະ ສ້າງເວທີເຊື່ອມຕໍ່ຊັບພະຍາກອນສຳລັບອຸດສາຫະກຳສຽງ-ພາບໃນພາກພື້ນເພື່ອລວບລວມຈຸດແຂງດ້ານຄວາມຄິດສ້າງສັນ. ມັນຈະຊ່ວຍໃຫ້ການສ້າງ ແລະ ເຜີຍແຜ່ຜົນງານທີ່ໂດດເດັ່ນຫຼາຍຂຶ້ນ ຊຶ່ງມີຮາກຖານຢູ່ໃນຄວາມເປັນຈິງຂອງພາກພື້ນແມ່ນໍ້າຂອງ-ແມ່ນໍ້າລ້ານຊ້າງ ປະກອບສ່ວນເຂົ້າໃນການສ້າງຊຸມຊົນແມ່ນໍ້າຂອງ-ແມ່ນໍ້າລ້ານຊ້າງທີ່ມີອະນາຄົດຮ່ວມກັນ.
ຂ່າວ-ພາບ: ບຸນອູ້ມ
ຄໍາເຫັນ