ຍົກລະດັບແຫຼ່ງທ່ອງທ່ຽວດ້ວຍແນວຄິດອະນຸລັກສິ່ງແວດລ້ອມ

ທ່າມກາງທິວທັດທີ່ຍັງຄົງຄວາມງາມດັ້ງເດີມ ມີຫຼາຍຊຸມຊົນໄດ້ເລີ່ມປ່ຽນແນວຄິດ ຈາກການນຳໃຊ້ທຳມະຊາດແບບມີການຮັກສາ ແລະ ຟື້ນຟູຢ່າງມີແຜນການ. ພວກເຂົາສ້າງແຫຼ່ງທ່ອງທ່ຽວທີ່ບໍ່ພຽງແຕ່ດຶງດູດນັກທ່ອງທ່ຽວ ແຕ່ຍັງຮັກສາປ່າໄມ້, ນ້ຳ ແລະ ຊີວະນາໆ ພັນໃຫ້ຄົງຢູ່ຄູ່ຊຸມຊົນໄດ້ຢ່າງຍືນຍົງ. ນີ້ຄືຫົວໃຈຂອງ “ການທ່ອງທ່ຽວສີຂຽວ” ທີ່ກຳລັງຈຸດປະກາຍແນວຄິດໃໝ່ໃນສັງຄົມ.

ຖ້ຳນອນເມືອງວັງວຽງ ແຂວງວຽງຈັນ, ເປັນໜຶ່ງໃນສະຖານທີ່ທ່ອງທ່ຽວທາງທຳມະຊາດ ທີ່ມີຄວາມສວຍສົດງົດງາມ ແລະ ເປັນອີກຖ້ຳໜຶ່ງທີ່ໄດ້ຮັບຄວາມນິຍົມຈາກນັກທ່ອງທ່ຽວ, ຊຶ່ງປັດຈຸບັນ ຖ້ຳນອນໄດ້ຮັບການບູລະນະຄືນໃໝ່ ແລະ ມີຫຼາຍກິດຈະກໍາທີ່ເປີດໃຫ້ບໍລິການ ເປັນຕົ້ນ ຂີ່ສະລິງທີ່ມີຄວາມຍາວເຖິງ 2,000 ແມັດ, ການບໍລິການຍ່າງເລາະຖ້ຳ ໂດຍມີປະຊາຊົນເປັນຜູ້ນຳທາງ, ຍ່າງທ່ຽວຊົມທຳມະຊາດຢູ່ຖ້ຳນອນ, ບໍລິການຂີ່ເຮືອລ່ອງນ້ຳຊອງ, ປີນຜານອນ ສ່ວນການບໍລິການທີ່ພັກ ແລະ ຮ້ານອາຫານແມ່ນເປີດບໍລິການຕະຫຼອດ ແລະ ສາມາດຮອງຮັບນັກທ່ອງທ່ຽວຫຼາຍກວ່າ 300 ຄົນ.

ທ່ານ ບຸນພັນ ວົງສຳພັນ ຫົວໜ້າບໍລິສັດ ທ່ອງທ່ຽວວັນເດີຟູນລາວ ຈຳກັດ ໄດ້ໃຫ້ສຳພາດຕໍ່ສື່ມວນຊົນຈາກໂຄງການແກມຊິວ (GAMCIL) ຮ່ວມກັບສະມາຄົມນັກຂ່າວ ເມື່ອບໍ່ດົນມານີ້ວ່າ: ພາຍຫຼັງໄດ້ສ້າງຕັ້ງບໍລິສັດ ທ່ອງທ່ຽວວັນເດີຟູນລາວ ໃນປີ 2014 ແລ້ວ ຈຶ່ງມີແນວຄວາມຄິດວ່າເຮັດແນວໃດ ຈຶ່ງຊິມີລາຍຮັບເຂົ້າບໍລິສັດເພີ່ມຂຶ້ນ ແລະ ສາມາດສ້າງລາຍຮັບໃຫ້ປະຊາຊົນ ແລະ ລັດຖະບານ, ພໍມາຮອດປີ 2015 ຈຶ່ງໄດ້ສ້າງສະລິງ ເພື່ອໃຫ້ບໍລິການນັກທ່ອງທ່ຽວທີ່ມາທ່ຽວຢູ່ຖ້ຳນອນແຫ່ງນີ້. ທາງພວກເຮົາມີບໍລິການຂີ່ເຮືອຄາຍັກລ່ອງນ້ຳຊອງ, ມີຮ້ານອາຫານໃວ້ຄອຍບໍລິການ, ບໍລິການປີນຜາ, ບໍລິການຍ່າງລອດຖ້ຳນາງຟ້າເບິ່ງປະຕິມະກຳຈາກທຳມະຊາດສ້າງຂຶ້ນ, ຊົມທຳມະຊາດ ແລະ ຂີ່ສະລິງ. ທຸກການບໍລິການແມ່ນມີຜູ້ພາທ່ຽວ, ພ້ອມທັງອຸປະກອນຮັກສາຄວາມປອດໄພ ໃນແຕ່ລະກິດຈະກຳ. ທັງນີ້, ເພື່ອຮັບປະກັນຄວາມປອດໄພໃຫ້ນັກທ່ອງທ່ຽວ.

ທ່ານ ບຸນພັນ ຍັງໄດ້ເວົ້າອີກວ່າ: ສິ່ງສຳຄັນອີກສິ່ງໜຶ່ງ ການອະນຸລັກຮັກສາສິ່ງແວດລ້ອມ ແມ່ນມີຄວາມສຳຄັນຫຼາຍ, ທາງພວກເຮົາໄດ້ປູກຈິດສຳນຶກຕໍ່ພະນັກງານທຸກຄົນໃຫ້ເອົາໃຈໃສ່ເປັນພິເສດ, ຊຶ່ງສະ ຖານທີ່ທ່ອງທ່ຽວຍັງເປັນບ່ອນສ້າງວຽກເຮັດງານທຳໃຫ້ປະຊາຊົນ ພາຍໃນບ້ານຫ້ວຍສະເຫງົ້າມີລາຍຮັບທີ່ໝັ້ນຄົງ ທັງເປັນການປົກປັກຮັກສາແຫຼ່ງທ່ອງທ່ຽວທາງທຳມະຊາດ ໃຫ້ມີຄວາມສະອາດສວຍງາມ, ສາມາດດຶງດູດນັກທ່ອງທ່ຽວໃຫ້ມາທ່ອງທ່ຽວ, ມາໃຊ້ບໍລິການຫຼາຍຂຶ້ນ ພ້ອມກັນຮັກສາສິ່ງແວດລ້ອມ ແລະ ທຳມະຊາດໃຫ້ອຸດົມສົມບູນ ເພື່ອໃຫ້ຍືນຍົງຈາກຮຸ່ນພວກເຮົາໄປຈົນເຖິງຮຸ່ນຕໍ່ໆໄປ.