ສະຫາຍ ວິໄລ ຫຼ້າຄໍາຟອງ ເຂົ້າຢ້ຽມຂ່ຳນັບ ສະຫາຍເລຂາທິການໃຫຍ່ ປະທານປະເທດ ສສ ຫວຽດນາມ

ສະຫາຍ ວິໄລ ຫຼ້າຄໍາຟອງ ໄດ້ສະແດງຄວາມພາກພູມໃຈ ແລະ ປິຕິຍິນດີເປັນຢ່າງຍິ່ງ ທີ່ໄດ້ນໍາພາຄະນະ ເດີນທາງມາຢ້ຽມຢາມ ສສ ຫວຽດນາມ ຢ່າງເປັນທາງການ ເປັນຄັ້ງທໍາອິດ ໃນຖານະຕໍາແໜ່ງ ຜູ້ປະຈໍາການ ຄະນະເລຂາທິການສູນກາງພັກ ປປ ລາວ ສະໄໝທີ XII; ສະແດງຄວາມຂອບໃຈ ສະຫາຍ ໂຕ ເລິມ ຕໍ່ການຕ້ອນຮັບຄະນະ, ທີ່ເຕັມໄປດ້ວຍໄມຕີຈິດມິດຕະພາບອັນດູດດື່ມ, ສະໜິດສະໜົມຖານສະຫາຍອ້າຍນ້ອງ; ໄດ້ນໍາເອົາຄວາມຢື້ຢາມຖາມຂ່າວ ຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ມາຍັງ ສະຫາຍ ໂຕເລິມ; ໄດ້ແຈ້ງໃຫ້ຊາບກ່ຽວກັບຈຸດປະສົງຂອງການຢ້ຽມຢາມ ສສ ຫວຽດນາມ ຢ່າງເປັນທາງການໃນຄັ້ງນີ້; ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ນັບມື້ໄດ້ຮັບການເສີມຂະຫຍາຍຂຶ້ນຢ່າງບໍ່ຢຸດຢັ້ງ; ແຈ້ງໃຫ້ຊາບກ່ຽວກັບໝາກຜົນຂອງການພົບປະສອງຝ່າຍກັບ ສະຫາຍ ເຈີ່ນ ເກີມ ຕູ໊ ກໍາມະການກົມການເມືອງສູນກາງພັກ ຜູ້ປະຈໍາການ ຄະນະເລຂາທິການສູນກາງພັກກອມມູນິດຫວຽດນາມ ຊຶ່ງໄດ້ຮ່ວມກັນຕີລາຄາຄືນການຈັດຕັ້ງປະຕິບັດ ບັນດາຂໍ້ຕົກລົງຂອງການນໍາຂັ້ນສູງຂອງ ສອງພັກ, ສອງລັດ ໃນໄລຍະຜ່ານມາ, ແລກປ່ຽນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຂອງແຕ່ລະພັກ, ຕີລາຄາຄືນ ແລະ ຊຸກຍູ້ການຈັດຕັ້ງປະຕິບັດບັນດາໂຄງການຮ່ວມມືຍຸດທະສາດສອງຝ່າຍໃຫ້ມີຄວາມຄືບໜ້າເປັນກ້າວໆ.

ສະຫາຍ ໂຕເລິມ ໄດ້ສະແດງຄວາມປິຕິຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ສສ ຫວຽດນາມ ຢ່າງເປັນທາງການ ຂອງ ສະຫາຍ ວິໄລ ຫຼ້າຄໍາຟອງ ພ້ອມດ້ວຍຄະນະ ແລະ ຕີລາຄາສູງຕໍ່ໝາກຜົນຂອງການພົບປະ 2 ສະຫາຍຜູ້ປະຈໍາການ ຄະນະເລຂາທິການສູນກາງພັກຂອງ 2 ພັກ ຊຶ່ງເປັນການປະກອບສ່ວນອັນສຳຄັນໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລາວ-ຫວຽດນາມ ກໍຄື ເປັນການກະກຽມໃຫ້ແກ່ການສະເຫຼີມສະຫຼອງປີສາມັກຄີມິດຕະພາບ ສອງປະເທດ; ຕີລາຄາສູງຕໍ່ຜົນສໍາເລັດທີ່ ພັກ, ລັດ ແລະ ປະຊາຊົນລາວ ຍາດມາໄດ້ໃນການດໍາເນີນການປ່ຽນແປງໃໝ່ ຕະຫຼອດໄລຍະຜ່ານມາ ແລະ ຫວັງຢ່າງຍິ່ງວ່າ ຈະສາມາດຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XII ຂອງພັກ ປປ ລາວ ໄດ້ສໍາເລັດຢ່າງມີໄຊ.

ພ້ອມນັ້ນ, ກໍໄດ້ຊີ້ນໍາໃຫ້ບັນດາພາກສ່ວນກ່ຽວຂ້ອງຂອງສອງຝ່າຍ ສືບຕໍ່ເພີ່ມທະວີການປະສານສົມທົບຢ່າງແໜ້ນແຟ້ນ ໃນການຈັດຕັ້ງປະຕິບັດແນວທາງນະໂຍບາຍ ຂອງແຕ່ລະພັກ, ແຕ່ລະປະເທດ, ພິເສດ ແມ່ນໝາກຜົນຂອງການຢ້ຽມຢາມຂອງບັນດາສະຫາຍການນໍາຂອງທັງສອງປະເທດ, ການແລກປ່ຽນຂໍ້ມູນຂ່າວສານຊຶ່ງກັນ ແລະ ກັນເພື່ອຊຸກຍູ້ການຈັດຕັ້ງປະຕິບັດ ບັນດາໂຄງການຮ່ວມມືຂອງ 2 ພັກ, 2 ລັດ ໃຫ້ມີຜົນສໍາເລັດ ແລະ ສະໜັບສະໜູນການຈັດຕັ້ງປະຕິບັດ ມະຕິກອງປະຊຸມໃຫຍ່ ຂອງແຕ່ລະພັກ; ກະກຽມສະເຫຼີມສະຫຼອງສອງວັນປະຫວັດສາດ ລາວ-ຫວຽດນາມ (ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 65 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 50 ປີ) ໃນປີ 2027 ທີ່ຈະມາເຖິງ ແລະ ການພົບປະລະຫວ່າງການນໍາຂັ້ນສູງຂອງ ສອງພັກ, ສອງລັດ ໃນຕໍ່ໜ້າ ກໍຄື ການຈັດຕັ້ງປະຕິບັດບັນດາຂໍ້ຕົກລົງຂອງການນໍາຂັ້ນສູງຂອງ ສອງພັກ, ສອງລັດ ລາວ-ຫວຽດນາມ ຢ່າງມີປະສິດທິຜົນ.

ໃນໂອກາດການຢ້ຽມຢາມ ສສ ຫວຽດນາມ ຄັ້ງນີ້, ສະຫາຍ ວິໄລ ຫຼ້າຄໍາຟອງ ພ້ອມດ້ວຍຄະນະ ກໍໄດ້ຢ້ຽມຢາມ ແລະ ພົບປະກັບ ບັນດາການນໍາຂັ້ນສູງ ພັກ, ລັດ ສສ ຫວຽດນາມ ໂດຍສະເພາະ ສະຫາຍ ເລມິງຮຶງ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສສ ຫວຽດນາມ; ສະຫາຍ ເຈິນແທັງເໝີ້ນ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ສສ ຫວຽດນາມ; ສະຫາຍ ພົນເອກ ເລືອງ ຕາມ ກວາງ ກໍາມະການກົມການເມືອງສູນກາງພັກ ລັດຖະມົນຕີກະຊວງຕໍາຫຼວດ ແລະ ສະຫາຍ ເຈິ່ນ ດຶກ ຖັງ ກໍາມະການກົມການເມືອງ ເລຂາຄະນະບໍລິຫານງານພັກ ນະຄອນຫຼວງຮ່າໂນ້ຍ ອີກດ້ວຍ, ພ້ອມທັງໄດ້ໄປວາງພວງມາລາ ຢູ່ອະນຸສາວະລີນັກຮົບນິລະນາມ ແລະ ສຸສານ ປະທານ ໂຮ່ຈິມິນ.

ຈາກນັ້ນ, ໃນຕອນເຊົ້າຂອງວັນທີ 16 ຕຸລາ 2026, ສະຫາຍ ວິໄລ ຫຼ້າຄໍາຟອງ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກ ຢູ່ ແຂວງບັກນິງ ສສ ຫວຽດນາມ ເພື່ອແລກປ່ຽນບົດຮຽນວຽກງານຕາແສງ, ການແກ້ໄຂຄວາມທຸກຍາກ ແລະ ຮູບແບບການພັດທະນາຊົນນະບົດ ກ່ອນຈະເດີນທາງກັບຄືນປະເທດ.

(ຂ່າວ: ຄຕພ; ພາບ: ສຳນານ)