ສະຖານທີ່ທ່ອງທ່ຽວຊົນນະບົດ ສາມມານ ກິ່ງແຂວງສິບສອງພັນນາ

. ໂອກາດດັ່ງກ່າວ, ຄະນະຜູ້ແທນ ໄດ້ໄປຢ້ຽມຊົມສະຖານທີ່ທ່ອງທ່ຽວ ສາມມານ ໂດຍໃຫ້ການຕ້ອນຮັບ ຂອງທ່ານ ວັງ ຮວາຍ ປິງ ເລຂາຄະນະພັກເມືອງເມີ້ງຮັນ ຊຶ່ງທ່ານ ໄດ້ໃຫ້ຮູ້ກ່ຽວກັບຜົນສຳເລັດຕົວຈິງຂອງ ສາມມານ ວ່າ: ສາມມານ ເປັນເຂດສາທິດການທ່ອງທ່ຽວຊົນນະບົດທີ່ປະກອບດ້ວຍ 3 ບ້ານຄື: ບ້ານມານຄົງໄຕ, ມານລວານຈານ ແລະ ບ້ານມານຄົງມາຍ ໂດຍໄດ້ລວມເອົາສາມບ້ານທີ່ຢູ່ຕິດກັນ ທາງພູມສັນຖານ ແລະ ມີຮີດຄອງປະເພນີຄ້າຍຄືກັນ ເພື່ອຮ່ວມກັນພັດທະນາພື້ນທີ່, ສົ່ງເສີມການແບ່ງປັນຊັບພະຍາກອນ ແລະ ເສີມສ້າງຜົນປະໂຫຍດ, ຟື້ນຟູຊັບພະຍາກອນຂອງບ້ານໃນຫຼາຍດ້ານ ໂດຍສະເພາະການພັດທະນາອຸດສາຫະກຳໃໝ່, ໃນຮູບແບບທຸລະກິດໃໝ່, ກໍ່ສ້າງຊາວກະສິກອນເປັນມືອາຊີບປະເພດໃໝ່ ແລະ ຄ່ອຍໆສ້າງໂຄງການຕົວແບບ ສຳລັບການຟື້ນຟູຊົນນະບົດ ທີ່ປະສົມປະສານການພັກຜ່ອນ ໃນປ່າຝົນ, ການສ້າງສິລະປະ, ການທ່ອງທ່ຽວ, ກະສິກໍາ-ຫັດຖະກໍາ ແລະ ການດູແລສຸຂະພາບ.

ໃນນັ້ນ, ບ້ານມານລວານຈານ ເປັນບ້ານຫຼັກຂອງເຂດສາມມານ, ແມ່ນບ້ານຕົວແບບສຳລັບການທ່ອງທ່ຽວດ້ານສຸຂະພາບ ແລະ ປະກອບດ້ວຍສູນຝຶກອົບຮົມຟື້ນຟູຊົນນະບົດ ມີຕຶກອາຄານສະໜັບສະໜູນຂອງບ້ານ ໂດຍຮ່ວມມືກັບມະຫາວິທະຍາໄລກະສິກຳຈີນ, ຈັດການແລກປ່ຽນທາງວິຊາການ, ເວທີປາໄສ ແລະ ກິດຈະກຳຝຶກອົບຮົມຕ່າງໆເປັນປະຈຳ. ການພັດທະນາເສດຖະກິດລວມໝູ່, ສາມາດລົງທຶນໄດ້ຫຼາຍຂຶ້ນ ໃນໂຄງການພັດທະນາຄຸນນະພາບຊີວິດການເປັນຢູ່ຂອງປະຊາຊົນ ເປັນຕົ້ນ ການສ້ອມແປງຖະໜົນຫົນທາງ, ການຍົກລະດັບຫ້ອງນ້ຳສາທາລະນະ ແລະ ການປັບປຸງສິ່ງແວດລ້ອມ, ເຮັດໃຫ້ສະພາບແວດລ້ອມຂອງບ້ານດີຂຶ້ນເລື້ອຍໆ. ປັດຈຸບັນ, ໄດ້ຝຶກອົບຮົມພະນັກງານ ໃຫ້ບໍລິການທີ່ໄດ້ມາດຕະຖານ. ສິ່ງນີ້ບໍ່ພຽງແຕ່ປັບປຸງຄວາມສາມາດ ໃນການບໍລິການ ແລະ ການຕ້ອນຮັບແຂກທ່ອງທ່ຽວທັງພາຍໃນ ແລະ ຕ່າງປະເທດເທົ່ານັ້ນ, ແຕ່ຍັງໄດ້ບົ່ມເພາະພອນສະຫວັນທ້ອງຖິ່ນ, ເສີມສ້າງຄວາມສາມາດໃນການສ້າງເສດຖະກິດລວມໝູ່ ແລະ ຊ່ອງທາງລາຍຮັບຂອງບ້ານໃຫ້ເຂັ້ມແຂງຍິ່ງຂຶ້ນ.

ທ່ານເລຂາຄະນະພັກ ເມືອງເມີ້ງຮັນ ໄດ້ກ່າວໃຫ້ຮູ້ອີກວ່າ: ໃນເຂດສວນກ້ວຍໄມ້ທີ່ໄດ້ປ່ຽນໂສມໜ້າມາຈາກສວນຢາງພາລາກ່ອນໜ້ານີ້ ຊຶ່ງຕົ້ນຢາງພາລາທີ່ມີຜົນຜະລິດຕໍ່າ ແລະ ເນື້ອທີ່ດິນກໍບໍ່ຖືກນຳໃຊ້ປະໂຫຍດຢ່າງເຕັມທີ່, ສົ່ງຜົນກະທົບທາງລົບຕໍ່ສະພາບແວດລ້ອມ. ຈາກນັ້ນ, ຈຶ່ງໄດ້ຢຶດໝັ້ນຫຼັກການອະນຸລັກຮັກສາ ແລະ ການນຳໃຊ້ທາງດ້ານນິເວດວິທະຍາໄປພ້ອມໆກັນ, ຫຼີກລ່ຽງການຕັດຕົ້ນໄມ້ ຫຼື ທຳລາຍປ່າ, ເພື່ອຮັກສາພື້ນຖານນິເວດວິທະຍາເດີມຂອງສວນຢາງພາລາ. ພ້ອມກັນນັ້ນ, ກໍຍັງໃຫ້ຄວາມຮູ້ກ່ຽວກັບການປູກຢາງພາລາ ແລະ ປະສົບການຕັດຢາງພາລາ. ສວນຢາງພາລາເກົ່າ ໄດ້ກາຍເປັນຈຸດທີ່ນິຍົມສຳລັບນັກທ່ອງທ່ຽວ. ບໍລິເວນໝູ່ບ້ານ ຈະມີສະລອຍນ້ຳ ຊຶ່ງໃນເມື່ອກ່ອນຈະເປັນໜອງນ້ຳແບບທໍາມະຊາດ ທີ່ເຕັມໄປດ້ວຍປ່າຫຍ້າຮົກເຮື້ອ ເຮັດໃຫ້ຮູບລັກສະນະຂອງໝູ່ບ້ານ ແລະ ສະພາບແວດລ້ອມການດຳລົງຊີວິດຂອງຊາວບ້ານ ບໍ່ສະອາດງາມຕາ. ດ້ວຍເຫດນັ້ນ ໜອງນ້ຳແຫ່ງນີ້ ຈຶ່ງໄດ້ຮັບການປັບປຸງບູລະນະຮັກ ໃຫ້ກາຍເປັນສະຖານທີ່ພັກຜ່ອນຢ່ອນອາລົມແບບທໍາມະຊາດ. ພ້ອມນີ້, ພາຍໃນໝູ່ບ້ານ ຍັງມີຕຶກອາຄານແບບໄຕລື້ ທີ່ໄດ້ຮັບການປົກປັກຮັກສາໄວ້ແບບດັ້ງເດີມຂອງຊາວໄຕລື້ ສຳລັບນັກທ່ອງທ່ຽວ ແລະ ພື້ນທີ່ການດຳລົງຊີວິດຕາມຮີດຄອງປະເພນີຂອງຊາວບ້ານ. ວິທີການປ່ຽນແປງນີ້, ຍັງຮັກສາໄວ້ໄດ້ຮູບລັກສະນະຂອງຕຶກອາຄານແບບໄຕລື້ (ເຮືອນຮ້ານ) ໃຫ້ດີທີ່ສຸດເທົ່າທີ່ຈະເປັນໄປໄດ້. ເຮືອນພັກໃນປັດຈຸບັນ ແມ່ນເຮືອນພັກຫຼັງທຳອິດໃນບ້ານທີ່ຖືກດັດແປງ ແລະ ຍັງເປັນເຮືອນຂອງຫົວໜ້າໝູ່ບ້ານ ມານລວານຈານ ອີກດ້ວຍ. ປັດຈຸບັນ, ໃນໝູ່ບ້ານສາມມານ ມີເຮືອນພັກ 20 ຫຼັງ ທີ່ໄດ້ຖືກດັດແປງ ແລະ ມັກຈະຖືກຈອງເຕັມໃນວັນພັກ, ຊ່ວຍໃຫ້ຊາວບ້ານສາມາດຫາລາຍໄດ້ລ້ຽງຊີບ ຈາກການທ່ອງທ່ຽວຊຸມຊົນ ໄດ້ຢ່າງແທ້ຈິງ.

ທ່ານໄດ້ໃຫ້ຮູ້ຕື່ມວ່າ: ໝູ່ບ້ານສາມມານ ໄດ້ເຕົ້າໂຮມບັນດາແຫຼ່ງຊັບພະຍາກອນທີ່ກະແຈກກະຈາຍເຂົ້າດ້ວຍກັນ ຜ່ານຮູບແບບການພັດທະນາ ພາຍໃຕ້ແນວຄິດ; “ໜຶ່ງບ້ານ ໜຶ່ງຜະລິດຕະພັນ” ຊຶ່ງບໍ່ພຽງແຕ່ຫຼຸດຕົ້ນທຶນການລົງທຶນໃນການພັດທະນາຂະແໜງການຕ່າງໆເທົ່ານັ້ນ, ແຕ່ຫາກຍັງສ້າງເປັນກຳລັງແຮງລວມ ເພື່ອດຶງດູດນັກທ່ອງທ່ຽວອີກດ້ວຍ, ສົ່ງຜົນໃຫ້ທຸກບ້ານແບ່ງປັນຜົນກຳໄລ ແລະ ຜົນປະໂຫຍດຈາກການພັດທະນາລວມ, ເພື່ອໃຫ້ຊາວບ້ານທຸກຄົນ ສາມາດແບ່ງປັນ ໝາກຜົນແຫ່ງການພັດທະນາໄດ້.

ພ້ອມນີ້, ໃນໝູ່ບ້ານສາມມານ ປະກອບມີ ໂຮງງານຜະລິດຕະພັນເບຍ ທີ່ເຮັດຈາກໝາກໄມ້ ແລະ ຊັອກໂກແລັດຫຼາກຫຼາຍຊະນິດ, ຮ້ານກາເຟ ທີ່ໄດ້ຮັບຄວາມນິຍົມໃນໝູ່ບ້ານ, ພື້ນທີ່ມໍຣະດົກວັດທະນະທໍານາມມະທໍາ ແລະ ການເຮັດເຈ້ຍ, ເຄື່ອງປັ້ນດິນເຜົາຂອງເຜົ່າໄຕລື້, ການຕໍ່າແພ, ການສະແດງຟ້ອນກອງຕີນຊ້າງ ແລະ ສູນສິລະປະປ່າຝົນ ເພື່ອເປັນການຕ້ອນຮັບແຂກຕ່າງດ້າວທ້າວຕ່າງແດນ. ເມື່ອນັກທ່ອງທ່ຽວມາບ້ານແຫ່ງນີ້ ບໍ່ພຽງແຕ່ໄດ້ສໍາຜັດກັບທິວທັດທີ່ເປັນເອກະລັກສະເພາະຂອງບ້ານໄຕລື້ເທົ່ານັ້ນ, ແຕ່ຍັງໄດ້ສຳຜັດກັບວັດທະນະທໍານາມມະທໍາ ທີ່ໜ້າປະທັບໃຈອີກດ້ວຍ. ເຮັດໃຫ້ມໍລະດົກວັດທະນະທໍານາມມະທໍາ ປ່ຽນຈາກການສະແດງຢູ່ກັບທີ່ ໄປເປັນການເຄື່ອນໄຫວແບບມີສ່ວນຮ່ວມ. ນີ້ບໍ່ພຽງແຕ່ຊ່ວຍໃຫ້ປະຊາຊົນຮຽນຮູ້ທັກສະໃໝ່ໆ ແລະ ເພີ່ມລາຍໄດ້ເທົ່ານັ້ນ, ແຕ່ຍັງເຮັດໃຫ້ເຂົາເຈົ້າສາມາດເບິ່ງແຍງຄອບຄົວໄດ້ງ່າຍຂຶ້ນ. ສິ່ງສໍາຄັນ ສາມາດດຶງດູດຜູ້ຄົນໃຫ້ຮຽນຮູ້ກ່ຽວກັບວັດທະນະທຳພື້ນເມືອງຂອງຊົນເຜົ່າໄຕລື້ຫຼາຍຂຶ້ນ.

ປັດຈຸບັນ, ຊາວບ້ານໄດ້ຫັນປ່ຽນ ຈາກຜູ້ຢືນເບິ່ງ ໄປສູ່ຜູ້ມີບົດບາດສໍາຄັນ ແລະ ຄວາມກະຕືລືລົ້ນຂອງເຂົາເຈົ້າ ໃນການເລີ່ມຕົ້ນທຸລະກິດ ແລະ ສ້າງຜົນສຳເລັດໄດ້ຖືກກະຕຸ້ນຢ່າງເຕັມທີ່. ທຸກຄົນເຮັດວຽກຮ່ວມກັນ ເພື່ອບັນລຸເປົ້າໝາຍດຽວກັນ, ລາຍໄດ້ລວມຂອງບ້ານ ໄດ້ເພີ່ມຂຶ້ນຢ່າງຕໍ່ເນື່ອງ ແລະ ທຸກຄົວເຮືອນ ສາມາດໄດ້ຮັບຜົນປະໂຫຍດທີ່ເຫັນໄດ້ຊັດເຈນຈາກການພັດທະນາ.

ໃນມື້ດຽວກັນນັ້ນ, ຄະນະຜູ້ແທນ ກໍໄດ້ໄປຢ້ຽມຊົມສະຖານທີ່ຈະຕຸລັດຫົດນໍ້າ. ເພື່ອສຳຜັດກັບກິດຈະກຳຫົດນໍ້າ ທີ່ເປັນຕົວແທນຂອງຊົນເຜົ່າໄຕລື້. ໃນເຂດທິວທັດສວນຊົນເຜົ່າໄຕ ຊຶ່ງໄດ້ສ້າງຈະຕຸລັດຫົດນໍ້າຂະໜາດໃຫຍ່ ໃຫ້ເປັນບ່ອນຈັດກິດຈະກຳຫົດນໍ້າທຸກໆມື້ ເພື່ອຊ່ວຍໃຫ້ນັກທ່ອງທ່ຽວ ສາມາດສຳຜັດກັບຮີດຄອງປະເພນີຂອງຊົນເຜົ່າໄຕລື້ ໄດ້ໂດຍບໍ່ຕ້ອງລໍຖ້າງານບຸນຫົດນໍ້າ. ກ່ອນກິດຈະກຳຫົດນໍ້າແຕ່ລະຄັ້ງ, ຈະມີຂະບວນແຫ່, ພິທີຕັກນໍ້າ ແລະ ພິທີອວຍພອນ ໂດຍຈະນຳພານັກທ່ອງທ່ຽວ ໄປສຳຜັດກັບວັດທະນະທຳຊົນເຜົ່າ. ນີ້ແມ່ນກິດຈະກຳທີ່ຕ້ອງເຮັດ ເມື່ອມາຢ້ຽມຊົມສວນວັດທະນະທໍາຊົນເຜົ່າໄຕລື້. ກິດຈະກຳພື້ນເມືອງນີ້ ບໍ່ພຽງແຕ່ເຮັດໃຫ້ຜະລິດຕະພັນການທ່ອງທ່ຽວອຸດົມສົມບູນເທົ່ານັ້ນ, ແຕ່ຍັງເປັນການສົ່ງເສີມວັດທະນະທຳການຫົດນໍ້າແບບດັ້ງເດີມຂອງຊົນເຜົ່າໄຕລື້ ໄດ້ດີຍິ່ງຂຶ້ນ. ນອກຈາກນັ້ນ, ຍັງຊ່ວຍເພີ່ມຍອດຂາຍໃຫ້ກັບຮ້ານອາຫານອ້ອມຂ້າງ ແລະ ຜະລິດຕະພັນວັດທະນະທຳ, ຄວາມຄິດສ້າງສັນ, ຂະຫຍາຍຊ່ອງທາງຫາລາຍຮັບໃຫ້ກັບຊາວບ້ານ ແລະ ປ່ຽນວັດທະນະທຳພື້ນເມືອງ ໃຫ້ກາຍເປັນນາມບັດທອງຄຳ ເພື່ອການພັດທະນາຢ່າງແທ້ຈິງ. ຫວັງຢ່າງຍິ່ງວ່າ: ບັນດາທ່ານ ຈະໄປທ່ຽວຊົມ ຈະຕຸລັດຫົດນໍ້າໄຕລື້ ໃນໄວໆນີ້, ບ່ອນທີ່ທ່ານສາມາດສຳຜັດກັບບັນຍາກາດທີ່ມີຊີວິດຊີວາຂອງງານໄດ້ຢ່າງໃກ້ຊິດ.