 |
ທ່ານ ນາງ ເພສັດຊະກອນ ຊຸຕິມາ ພິພັດຜົນສະກຸນ ໄດ້ສະແດງຄວາມພາກພູມໃຈ ແລະ ກ່າວເຖິງປະ ຫວັດຄວາມເປັນມາຂອງໂຄງການວ່າ: ໂຄງການ Bright Smiles, Bright Futures (BSBF) ໄດ້ດຳເນີນງານມາຢ່າງຕໍ່ເນື່ອງກວ່າ 34 ປີ ໃນ 100 ກວ່າປະເທດທົ່ວໂລກ ແລະ ໄດ້ສ້າງຄວາມຮູ້ດ້ານສຸຂະພາບຜົ້ງປາກໃຫ້ເດັກນ້ອຍແລ້ວກວ່າ 2 ຕື້ຄົນ. ສະເພາະ ສປປ ລາວ ພາຍໃຕ້ (MOU) ສະບັບໃໝ່ນີ້, ບໍລິສັດ ຄອນເກດ ຕັ້ງເປົ້າໝາຍ ຈະສະໜອງອຸປະກອນຮັກສາສຸຂະພາບຜົ້ງປາກ-ແຂ້ວ ແລະ ສື່ການຮຽນ-ການສອນ ເພື່ອເຂົ້າເຖິງນັກຮຽນໃຫ້ເພີ່ມຂຶ້ນກວ່າ 267,000 ຄົນ ໃນ 8 ແຂວງ ແລະ 42 ເມືອງທົ່ວປະເທດ ເຊື່ອໝັ້ນວ່າ ສຸຂະພາບຜົ້ງປາກທີ່ດີແມ່ນຈຸດເລີ່ມຕົ້ນຂອງຄຸນນະພາບຊີວິດທີ່ດີ. ການປູກຝັງພຶດຕິກຳທີ່ຖືກຕ້ອງຕັ້ງແຕ່ໄວເດັກຈະຊ່ວຍໃຫ້ເດັກນ້ອຍເຕີບໃຫຍ່ຢ່າງມີຄວາມໝັ້ນໃຈ ແລະ ມີສຸຂະພາບທີ່ແຂງແຮງ.
ໂອກາດນີ້, ທ່ານ ນາງ ນວມຄຳ ຈັນທະບູລີ ໄດ້ມີຄຳເຫັນເນັ້ນໜັກເຖິງທິດທາງແຜນການຮ່ວມມື ເພື່ອຮັບປະກັນປະສິດທິຜົນຂອງໂຄງການ ໂດຍສະເໜີໃຫ້ບໍລິສັດ ຄອນເກດ ສືບຕໍ່ຂະຫຍາຍການສະໜັບສະໜູນໃຫ້ກວ້າງຂວາງ ໂດຍສະເພາະ ການຫຍັບເຂົ້າຫາເຂດຫ່າງໄກສອກຫຼີກ ທີ່ຍັງຂາດໂອກາດເຂົ້າເຖິງການບໍລິການສາທາລະນະສຸກ; ສ້າງຄວາມເຂັ້ມແຂງໃຫ້ຊຸມຊົນ ເພື່ອໃຫ້ສາມາດເພິ່ງຕົນເອງ ແລະ ຮັກສານິໄສ ຮັກສຸຂະພາບແຂ້ວໄດ້ໃນໄລຍະຍາວ; ກົມສາມັນສຶກສາ ຈະເປັນເຈົ້າການໃນການສ້າງເຄື່ອງມືຕິດຕາມ ແລະ ປະເມີນຜົນການ ຈັດຕັ້ງປະຕິບັດຢ່າງໃກ້ຊິດ ເພື່ອໃຫ້ເກີດຜົນປະໂຫຍດສູງສຸດຕໍ່ນັກຮຽນ. ສະແດງຄວາມຂອບໃຈ ແລະ ຍ້ອງຍໍຊົມເຊີຍຢ່າງຈິງໃຈ ມາຍັງບັນດາຜູ້ຊ່ຽວຊານດ້ານການແພດ ຈາກກະຊວງສາທາລະນະສຸກ ທີ່ໄດ້ໃຫ້ການຮ່ວມມື ແລະ ຊຸກຍູ້ກິດຈະກຳສົ່ງເສີມການຮັກສາສຸຂະພາບຜົ້ງປາກ ແລະ ແຂ້ວຢ່າງຕັ້ງໜ້າຕະຫຼອດມາ.
 |
ໂຄງການດັ່ງກ່າວ, ໄດ້ເລີ່ມຈັດຕັ້ງປະຕິບັດຢູ່ ສປປ ລາວ ມາຕັ້ງແຕ່ປີ 2008 ພາຍໃຕ້ການຮ່ວມມືຢ່າງໃກ້ຊິດລະຫວ່າງ ກະຊວງ ສສກ, ກະຊວງສາທາລະນະສຸກ ແລະ ບໍລິສັດ ຄອນເກດ ໂດຍມີໄລຍະການເຕີບໃຫຍ່ຂະຫຍາຍຕົວ ຄື: ໄລຍະປີ 2008-2014 ຈັດຕັ້ງປະຕິບັດໃນ 4 ແຂວງເປົ້າໝາຍ (ນວ, ຫຼວງພະບາງ, ສະຫວັນນະເຂດ ແລະ ຈຳປາສັກ); ໄລຍະປີ 2015-2017 ສືບຕໍ່ຂະຫຍາຍເປັນ 5 ແຂວງ (ນວ, ສະຫວັນນະເຂດ, ຫຼວງພະບາງ, ວຽງຈັນ ແລະ ຄຳມ່ວນ); ໄລຍະປີ 2019-2021 ສຸມໃສ່ລະດັບເມືອງໃນ 3 ແຂວງ ຄື: ແຂວງຄຳມ່ວນ 10 ເມືອງ, ໄຊຍະບູລີ 11 ເມືອງ ແລະ ແຂວງສາລະວັນ 8 ເມືອງ.
ສຳລັບໂຄງການຮ່ວມມືສະບັບໃໝ່ ລະຫວ່າງສອງພາກສ່ວນ ໄລຍະປີ 2025-2028 ກວມເອົາ 8 ແຂວງເປົ້າໝາຍ ລວມທັງໝົດ 42 ເມືອງ ຄື: ນວ 5 ເມືອງ, ແຂວງວຽງຈັນ 6 ເມືອງ, ບໍລິຄຳໄຊ 5 ເມືອງ, ຄຳມ່ວນ 4 ເມືອງ, ສະຫວັນນະເຂດ 6 ເມືອງ, ສາລະວັນ 5 ເມືອງ, ຈຳປາສັກ 5 ເມືອງ ແລະ ແຂວງໄຊຍະບູລີ 6 ເມືອງ.
ຂ່າວ-ພາບ: ລູກນ້ຳເຊ ອິນທະດາລິນ
ຄໍາເຫັນ