ໃນໂອກາດນີ້, ທ່ານ ຄໍາພັນ ພົມມະທັດ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ ທ່ານເອກອັກຄະລັດຖະທູດ ທີ່ໄດ້ທຸ້ມເທເຫື່ອແຮງ ແລະ ສະຕິປັນຍາ ໃນການປະກອບສ່ວນຢ່າງຕັ້ງໜ້າເຂົ້າໃນການຮັດແໜ້ນ ແລະ ຍົກລະດັບການຮ່ວມມື ລະຫວ່າງ ສປປ ລາວ ແລະ ມາເລເຊຍ ໃຫ້ແຕກດອກອອກຜົນຍິ່ງໆຂຶ້ນເວົ້າລວມ, ເວົ້າສະເພາະແມ່ນຂະແໜງກົດໝາຍ ແລະ ຍຸຕິທຳ, ກະຊວງຍຸຕິທຳຍາມໃດກໍຕິລາຄາສູງຕໍ່ການຮ່ວມມື ແລະ ປະກອບສ່ວນອັນສຳຄັນຈາກທ່ານທູດ ຕໍ່ກະຊວງຍຸຕິທຳ ຂອງ ສປປ ລາວ ຕະຫຼອດມາທີ່ທ່ານປະຕິບັດໜ້າທີ່ເປັນເອກອັກຄະລັດຖະທູດ ມາເລເຊຍ ປະຈຳ ສປປ ລາວ.
ໂອກາດດັ່ງກ່າວ, ທ່ານ ອີດີ ອີວານ ບິນ ມາມຸດ ກໍໄດ້ສະແດງຄວາມຂອບໃຈຢ່າງຈິງໃຈ ຕໍ່ ທ່ານລັດຖະມົນຕີ ກະຊວງຍຸຕິທຳ ພ້ອມດ້ວຍຄະນະທີ່ໃຫ້ການຕອນຮັບຢ່າງອົບອຸ່ນ ໃນຄັ້ງນີ້. ໃນໄລຍະຜ່ານມາລັດຖະບານ ສປປ ລາວ ໄດ້ໃຫ້ການຮ່ວມມືສະໜັບສະໜູນ ແລະ ອຳນວຍຄວາມສະດວກໃຫ້ແກ່ຕົນເອງ ໃນການປະຕິບັດໜ້າທີ່ການທູດ ປະຈຳ ສປປ ລາວ ຈົນສຳເລັດຜົນຢ່າງຈົບງາມ. ພ້ອມທັງຢືນຢັນວ່າເຖິງແມ່ນຈະໄປຮັບໜ້າທີ່ໃໝ່ແຕ່ກໍຍັງຈະສືບຕໍ່ສະໜັບສະໜູນ ແລະ ສົ່ງເສີມສາຍພົວພັນມິດຕະພາບ ລະຫວ່າງ ສອງປະເທດ ໃຫ້ຈະເລີນງອກງາມຍິ່ງໆຂຶ້ນໄປ.
ໃນຕອນທ້າຍ, ທ່ານລັດຖະມົນຕີ ກະຊວງຍຸຕິທຳໄດ້ອວຍພອນໃຫ້ທ່ານເອກອັກຄະລັດຖະທູດມາເລເຊຍ ຈົ່ງມີສຸຂະພາບພະລານາໄມທີ່ສົມບູນມີຄວາມສຸກ ແລະ ປະສົບຜົນສຳເລັດອັນຍິ່ງໃຫຍ່ກວ່າເກົ່າ ໃນການຮັບໜ້າທີ່ໃໝ່ທີ່ມີກຽດຂອງທ່ານ.
ຂ່າວ-ພາບ: ບຸນຕອມ
ຄໍາເຫັນ