ທ່ານ ໂຕເລີມ ເລຂາທິການໃຫຍ່ພັກກອມມູນິດຫວຽດນາມ ໄດ້ຊົມເຊີຍໝາກຜົນການເຈລະຈາ ແລະ ການພົບປະກັບບັນດາການນຳຂັ້ນສູງ ຫວຽດນາມ ທ່ານຢືນຢັນວ່າ: ຫວຽດນາມ ຍາມໃດກໍຈົດຈຳການຊ່ວຍເຫຼືອອັນລ້ຳຄ່າ ແລະ ຄວາມສຸດຈິດສຸດໃຈທີ່ຊາວໂຊວຽດ ແລະ ຣັດເຊຍ ສະຫງວນໃຫ້ຫວຽດນາມ ໃນຊຸມປີທຳການຕໍ່ຕ້ານທີ່ຫຍຸ້ງຍາກ ກໍຄືໃນພາລະກິດສ້າງສາ ແລະ ປ້ອງກັນປະເທດ; ຢືນຢັນວ່າ ຫວຽດນາມ ຖືສຳຄັນການພົວພັນທີ່ມີມາແຕ່ດົນນານ ແລະ ການພົວພັນຄູ່ຮ່ວມມືຍຸດທະສາດຮອບດ້ານກັບ ຣັດເຊຍ, ຍາມໃດກໍຖືຣັດເຊຍ ແມ່ນຄູ່ຮ່ວມມືສຳຄັນແຖວໜ້າໃນນະໂຍບາຍການຕ່າງປະເທດຂອງຫວຽດນາມ. ທ່ານເລຂາທິການໃຫຍ່ກໍໄດ້ຍົກບັນດາທິດທາງສຳຄັນເພື່ອແນໃສ່ເພີ່ມທະວີການພົວພັນລະຫວ່າງ ຫວຽດນາມ - ຣັດເຊຍ ໃຫ້ເລິກເຊິ່ງກວ່າເກົ່າໃນໄລຍະຈະມາເຖິງ.
ທ່ານນາຍົກລັດຖະມົນຕີ ຣັດເຊຍ ໄດ້ແຈ້ງໃຫ້ທ່ານເລຂາທິການໃຫຍ່ຮັບຊາບ ໝາກຜົນການພົບປະເຈລະຈາກັບທ່ານ ຟ້າມມິງຈິງນາຍົກລັດຖະມົນຕີ ຫວຽດນາມ, ທ່ານນາຍົກລັດຖະມົນຕີຣັດເຊຍຢືນຢັນວ່າ, ຣັດເຊຍ ຕີລາຄາສູງບັນດາຄວາມມານະພະຍາຍາມ ຂອງຝ່າຍຫວຽດນາມໃນການແກ້ໄຂຄວາມຫຍຸ້ງຍາກ, ຊຸກຍູ້ການຮ່ວມມືສອງຝ່າຍໃນໄລຍະມໍ່ໆມານີ້. ທ່ານນາຍົກລັດຖະມົນຕີຣັດເຊຍຢືນຢັນວ່າ ລັດເຊຍ ຍາມໃດກໍຖື ຫວຽດນາມ ແມ່ນໜຶ່ງໃນບັນດາຄູ່ຮ່ວມມືບຸລິມະສິດສຳຄັນທີ່ສຸດຢູ່ພາກພື້ນ ອາຊີ - ປາຊີຟິກ, ພິເສດແມ່ນຢູ່ອາຊີຕາເວັນອອກສ່ຽງໃຕ້, ພ້ອມແລ້ວທີ່ຈະເປີດກວ້າງການພົວພັນຄູ່ຮ່ວມມືຍຸດທະສາດຮອບດ້ານກັບ ຫວຽດນາມ ໃຫ້ເລິກເຊິ່ງກວ່າເກົ່າອີກໃນບັນດາຂົງເຂດເສດຖະກິດ-ການຄ້າ, ພະລັງງານ, ປ້ອງກັນປະເທດ, ຄວາມໝັ້ນຄົງ, ວິທະຍາສາດ-ເຕັກໂນໂລຊີ, ວັດທະນະທຳ, ການສຶກສາ ແລະ ການພົວພັນແລກປ່ຽນປະຊາຊົນ.
ຄໍາເຫັນ