ຕະຫຼອດສີ່ທົດສະວັດ, ຄຕພ ສາມາດເຮັດຫຼ້ອນໜ້າທີ່ການເປັນເສນາທິການໂດຍກົງ ແລະໄດ້ຮັບຄວາມໄວ້ເນື້ອເຊື່ອໃຈຈາກຄະນະບໍລິຫານງານສູນກາງພັກ, ກົມການເມືອງສູນກາງພັກ ແລະ ຄະນະເລຂາທິການສູນກາງພັກໃນການຄົ້ນຄວ້າແຜນຍຸດທະສາດ, ແນວທາງນະໂຍບາຍການພົວພັນຕ່າງປະເທດຂອງພັກ. ພ້ອມກັນນັ້ນຍັງເຮັດໜ້າທີ່ຕາງໜ້າສູນກາງພັກໃນການພົວພັນ-ຮ່ວມມືກັບພັກການເມືອງຂອງຕ່າງປະເທດໃນຂອບສອງຝ່າຍ ແລະ ຫຼາຍຝ່າຍຕາມການມອບໝາຍຢ່າງມີໝາກຜົນຕົວຈິງ.
ຄຕພ ໄດ້ກາຍເປັນບ່ອນອີງອັນໜັກແໜ້ນ ແລະ ເປັນເຂັມທິດເຍືອງທາງໃຫ້ແກ່ການຈັດຕັ້ງ, ການເຄື່ອນໄຫວວຽກງານການຕ່າງປະເທດດ້ານພັກ ແລະ ການທູດປະຊາຊົນໃຫ້ມີຄຸນນະພາບ ແລະ ປະສິດທິຜົນສູງຂຶ້ນຢ່າງບໍ່ຢຸດຢັ້ງ ດ້ວຍພາລະບົດບາດອັນເປັນເອກະລັກນີ້ກໍຄືການເປັນເຈົ້າການຊີ້ນຳ, ຄຸ້ມຄອງການເຄື່ອນໄຫວວຽກງານພົວພັນຕ່າງປະເທດຂອງອົງການຈັດຕັ້ງພັກ ແລະ ການທູດປະຊາຊົນໃຫ້ມີຄວາມເປັນເອກະພາບ ໂດຍປະຕິບັດຕາມຫຼັກການຜ່ານປະຕູດຽວຢ່າງເຄັ່ງຄັດ.
ເວົ້າສະເພາະຂົງເຂດວຽກງານວິຊາສະເພາະໃນປີ 2026 ຜ່ານມາພາຍໃຕ້ການນໍາພາ-ຊີ້ນໍາຂອງອົງຄະຄະນະພັກຊຸດໃໝ່, ຄຕພ ສາມາດຍາດໄດ້ຜົນສໍາເລັດອັນພົ້ນເດັ່ນໃນຫຼາຍດ້ານເຊັ່ນ:ເປັນເສນາທິການທາງດ້ານເນື້ອໃນ ແລະ ໃຈກາງປະສານງານຢ່າງຮອບດ້ານກະກຽມໃຫ້ແກ່ ສະຫາຍ ທອງລຸນ ສີສຸລິດ ເລຂາທິການໃຫຍ່ເຂົ້າຮ່ວມພິທີເປີດນໍາໃຊ້ທ່າທຽບເຮືອເລກ 3, ທ່າເຮືອສາກົນລາວ-ຫວຽດ ແລະ ພິທີສະເຫຼີມສະຫຼອງວັນປົດປ່ອຍພາກໃຕ້ຫວຽດນາມ ຄົບຮອບ 50 ປີຢູ່ ສສ ຫວຽດນາມ; ເຂົ້າຮ່ວມພິທີສະເຫຼີມສະຫຼອງວັນຊາດ ສສ ຫວຽດນາມ ຄົບຮອບ 80 ປີ; ເຂົ້າຮ່ວມພິທີສະເຫຼີມສະຫຼອງໄຊຊະນະສົງຄາມຕ້ານຟາຊິດ ຄົບຮອບ 80 ປີຢູ່ ສປ ຈີນ ແລະ ການຢ້ຽມຢາມຢ່າງເປັນທາງການ ສປ ຈີນ; ໄດ້ກະກຽມ ແລະ ສົ່ງຄະນະຜູ້ແທນຂັ້ນສູງຂອງພັກ ເຂົ້າຮ່ວມກອງປະຊຸມສຸດຍອດ ຄັ້ງທີ 16 ສອງພັກ ລາວ-ກໍາປູເຈຍ ແລະ ເຂົ້າຮ່ວມການພົບປະສຸດຍອດຜູ້ນໍາ 3 ພັກ ລາວ-ຫວຽດນາມ-ກໍາປູເຈຍ ຄັ້ງທີ 4 ທີ່ຣາຊະອານາຈັກກໍາປູເຈຍ; ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງພັກແຮງງານເກົາຫຼີ ຄົບຮອບ 80 ປີ ທີ່ພຽງຢາງ ສປປ ເກົາຫຼີ; ໄດ້ເປັນເຈົ້າພາບຈັດກອງປະຊຸມພົບປະສອງກົມການເມືອງລາວ-ຫວຽດນາມຢູ່ ສປປ ລາວ ໃນທ້າຍປີ 2025; ຕ້ອນຮັບການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຫຼາຍຄະນະຜູ້ແທນຂັ້ນສູງຂອງພັກ ຈາກຕ່າງປະເທດເປັນຕົ້ນ: ການມາຢ້ຽມຢາມລັດຖະກິດ ສປປ ລາວ ຂອງ ສະຫາຍ ໂຕ ເລີມ ເລຂາທິການໃຫຍ່ພັກກອມມູນິດຫວຽດນາມ; ຕ້ອນຮັບ ສະຫາຍ ເຈີນ ເກີ້ມ ຕູ໊ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກກອມມູນິດຫວຽດນາມ ພ້ອມດ້ວຍຄະນະຜູ້ແທນຂັ້ນສູງຂອງພັກ, ລັດ ສສ ຫວຽດນາມ ໃນໂອກາດເດີນທາງມາຢ້ຽມຢາມ ສປປ ລາວ ຢ່າງເປັນທາງການ; ຕ້ອນຮັບການຊົມເຊີຍຂອງຜູ້ຕາງໜ້າພິເສດຂອງສູນກາງພັກກອມມູນິດຫວຽດນາມ ແລະ ຄະນະຜູ້ຕາງໜ້າພິເສດຂອງ ສະຫາຍເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຈີນ ມາຊົມເຊີຍກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ ປປ ລາວ. ພ້ອມດຽວກັນນັ້ນ, ຍັງໄດ້ເຂົ້າຮ່ວມກອງປະຊຸມສໍາມະນາວິທະຍາສາດລະຫວ່າງພັກກອມມູນິດຈີນກັບບັນດາພັກການເມືອງອ້ອມຂ້າງຈີນ ທີ່ ສປ ຈີນ; ກອງປະຊຸມເວທີປຶກສາຫາລືຄວາມໝັ້ນຄົງໃນພາກພື້ນເອີຣົບ-ອາຊີຢູ່ເມືອງເປິມ, ສຣັດເຊຍ;ກອງປະຊຸມສະພາວັດທະນະທໍາອາຊີຄັ້ງທີ IV ໃນຂອບ ICAPP ແລະ ກອງປະຊຸມສາກົນໃນຫົວຂໍ້: ບົດບາດຂອງພາກພື້ນຕໍ່ຄວາມໝັ້ນຄົງໂລກທີ່ອາແຊກໄບຊານ; ກອງປະຊຸມປຶກສາຫາລືການເມືອງອາຊີ-ເອີຣົບທີ່ບູດາເປສ, ຮົງກາຣີ; ກອງປະຊຸມສາກົນຄັ້ງທີ II ໃນຫົວຂໍ້: “ອະທິປະໄຕແຫ່ງລັດ ແລະ ຫຼັກການພົວພັນສາກົນ ໃນສະພາບການຂອງໂລກຫຼາຍຂົ້ວອຳນາດ ແລະ ຄວາມຫຼາກຫຼາຍ ໃນສະຕະວັດທີ 21” ທີ່ເບຣສ, ເບລາຣຸດຊີ; ກອງປະຊຸມປຶກສາຫາລື “ບົດບາດຂອງບັນດາພັກການເມືອງໃນການສ້າງປະຊາຄົມອາຊຽນທີ່ຮ່າໂນ້ຍ, ສສຫວຽດນາມ;ກອງປະຊຸມຄະນະປະຈໍາໄອແຄັບຄັ້ງທີ 45 ທີ່ອູລານບາຕໍ, ມົງໂກລີ.
ຄຽງຄູ່ກັບຜົນງານທີ່ພົ້ນເດັ່ນດັ່ງກ່າວແລ້ວ, ຍັງໄດ້ຊຸກຍູ້ສົ່ງເສີມການພົວພັນກັບບັນດາພັກການເມືອງຕ່າງປະເທດອື່ນໆໂດຍການສົ່ງບັນດາຈົດໝາຍອວຍພອນ, ຊົມເຊີຍໃນໂອກາດສໍາຄັນຕ່າງໆຂອງພັກການເມືອງຕ່າງປະເທດເປັນຕົ້ນແມ່ນ:ຊົມເຊີຍກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກກອມມູນິດຫວຽດນາມ, ກອງປະຊຸມໃຫຍ່ຄັ້ງທີ XIX ຂອງພັກກອມມູນິດສະຫະພັນຣັດເຊຍ,ກອງປະຊຸມໃຫຍ່ຄັ້ງທີ XVI ຂອງພັກກອມມູນິດຊິມບັບເວ; ກອງປະຊຸມໃຫຍ່ຄັ້ງທີ III ຂອງພັກກອມມູນິດກໍາມະກອນແອັດສະປາຍ.
ບັນດາຜົນສຳເລັດຂອງການເຄື່ອນໄຫວດ້ານການຕ່າງປະເທດດ້ານພັກໄດ້ເປັນການປະກອບສ່ວນອັນສຳຄັນ ເຂົ້າໃນການປົກປັກຮັກສາສະຖຽນລະພາບທາງດ້ານການເມືອງ, ຄວາມໝັ້ນຄົງຂອງຊາດແລະສ້າງສະພາບແວດລ້ອມສາກົນທີ່ເອື້ອອຳນວຍໃຫ້ແກ່ພາລະກິດການປົກປັກຮັກສາແລະພັດທະນາປະເທດຊາດ, ກໍຄືປະກອບສ່ວນຍົກສູງບົດບາດອິດທິພົນຂອງພັກປະຊາຊົນປະຕິວັດລາວໃນເວທີສາກົນໃຫ້ສູງຂຶ້ນຢ່າງຕໍ່ເນື່ອງ, ຊຶ່ງປັດຈຸບັນພັກປປລາວມີການພົວພັນກັບ 145 ພັກການເມືອງໃນ 85 ປະເທດທົ່ວໂລກ; ສ້າງຕັ້ງສະມາຄົມມິດຕະພາບກັບຕ່າງປະເທດທັງໝົດມີ 20 ສະມາຄົມແລະ 1 ຄະນະສັນຕິພາບແລະສາມັກຄີລາວກັບຕ່າງປະເທດ; ສ່ວນຢູ່ຂັ້ນທ້ອງຖິ່ນຍັງໄດ້ສ້າງຕັ້ງສະມາຄົມມິດຕະພາບລາວ-ຫວຽດນາມ, ລາວ-ຈີນຢູ່ 18 ແຂວງຂອງລາວແລະສະມາຄົມມິດຕະພາບລາວ-ກໍາປູເຈຍຢູ່ແຂວງຈໍາປາສັກແລະອັດຕະປື.
ນອກຈາກນີ້, ຜົນສໍາເລັດທີ່ສໍາຄັນໃນປີຜ່ານມາແມ່ນການນໍາເອົາຜົນສໍາເລັດກອງປະຊຸມໃຫຍ່ສະມາຊິກພັກຄັ້ງທີ III ຂອງອົງຄະນະພັກ ຄຕພ ຊຶ່ງໄດ້ມີການເລືອກຕັ້ງເອົາຄະນະບໍລິຫານງານພັກຊຸດໃໝ່ແລະຮັບຮອງເອົາ 5 ແຜນງານ 28 ໂຄງການສໍາລັບ 5 ປີ; ພ້ອມກັນນັ້ນ, ກໍໄດ້ກ້າວເຂົ້າສູ່ໄລຍະໃໝ່ແຫ່ງການຫັນປ່ຽນຢ່າງຕັ້ງໜ້າໄດ້ສຳເລັດການປັບປຸງກົງຈັກການຈັດຕັ້ງພາຍໃນຢ່າງຮອບດ້ານ, ການແຕ່ງຕັ້ງແລະສັບຊ້ອນຕຳແໜ່ງບໍລິຫານຂັ້ນຫົວໜ້າກົມແລະພະນັກງານຫຼັກແຫຼ່ງເພື່ອຮັບປະກັນຄວາມເປັນເອກະພາບແລະຫັນເປັນທັນສະໄໝຜ່ານກົນໄກປະຕູດຽວໃຫ້ມີຄຸນນະພາບສູງຂຶ້ນເລື້ອຍໆ, ສາມາດເປັນເສນາທິການທີ່ແຫຼມຄົມແລະຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ຢ່າງມີໄຊ.
ການສະເຫຼີມສະຫຼອງວັນສ້າງຕັ້ງຄົບຮອບ 43 ປີ,ໃນປີ 2026 ນີ້ແມ່ນດຳເນີນໄປໃນທ່າມກາງບັນຍາກາດທີ່ທົ່ວພັກ, ທົ່ວກອງທັບແລະທົ່ວປວງຊົນລາວທັງຊາດພວມຕັ້ງໜ້າບຸກບືນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີXIIຂອງພັກຢ່າງມີໝາກຜົນ. ຄະນະນຳ, ພະນັກງານ-ລັດຖະກອນຂອງ ຄຕພທຸກຄົນໄດ້ມີຄວາມສາມັກຄີ, ເອກະພາບສູງແລະຄວາມມຸ່ງໝັ້ນອັນແຮງກ້າທີ່ຈະສືບຕໍ່ຝຶກຝົນຫຼໍ່ຫຼອມຕົນເອງທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດແລະຍົກສູງລະດັບວິຊາສະເພາະຢ່າງຮອບດ້ານເພື່ອເຮັດສຳເລັດໜ້າທີ່ເປັນ"ເສນາທິການ"ທີ່ສະຫຼາດສ່ອງໃສໃຫ້ແກ່ສູນກາງພັກ.
ໃນເສັ້ນທາງແຫ່ງການກ້າວໄປຂ້າງໜ້າ, ເຖິງວ່າສະພາບການສາກົນແລະພາກພື້ນຈະມີການຜັນແປໄປຢ່າງສັບສົນແລະຄາດເດົາໄດ້ຍາກ, ແຕ່ບົນພື້ນຖານມູນເຊື້ອອັນສະຫງ່າງາມແລະບົດຮຽນອັນອຸດົມສົມບູນທີ່ຖອດຖອນໄດ້ຕະຫຼອດ 43 ປີຜ່ານມາ ແລະ ພາຍໃຕ້ການນໍາພາ-ຊີ້ນໍາຢ່າງໃກ້ຊິດ ຂອງກົມການເມືອງສູນກາງພັກ ແລະ ຄະນະເລຂາທິການສູນກາງພັກ,ຄະນະພົວພັນຕ່າງປະເທດສູນກາງພັກຈະສືບຕໍ່ຍົກສູງຄວາມຮັບຜິດຊອບຂອງຕົນ ໃນການເປັນເສນາທິການດ້ານວຽກງານຕ່າງປະເທດຂອງພັກ ໂດຍສະເພາະການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XII ຂອງພັກຕາມຄໍາຂວັນ “ຍົກສູງບົດບາດການນໍາພາທີ່ເຂັ້ມແຂງຂອງພັກ, ຕັ້ງໜ້າສ້າງເສດຖະກິດເອກະລາດ ເປັນເຈົ້າຕົນເອງ, ສືບຕໍ່ບູລະນະລະບອບປະຊາທິປະໄຕປະຊາຊົນ ໃຫ້ໜັກແໜ້ນ ກ້າວຂຶ້ນສູ່ສັງຄົມນິຍົມ” ໃຫ້ປະກົດຜົນເປັນຈິງ.
ຄໍາເຫັນ