 |
ທ່ານ ບຸນເຫຼືອ ສິນໄຊວໍຣະວົງ ໄດ້ກ່າວຕ້ອນຮັບຄະນະຜູ້ແທນ ດ້ວຍຄວາມອົບອຸ່ນ ພ້ອມທັງສະແດງຄວາມຍິນດີຕໍ່ກັບ ທ່ານ ເອກອັກຄະຣາຊະທູດ ແຫ່ງຣາຊະອານາຈັກໄທ ທີ່ໄດ້ຮັບມອບໝາຍມາ ປະຈໍາການ ຢູ່ ສປປ ລາວ ແລະໃຫ້ກຽດນໍາພາຄະນະເດີນທາງມາຢ້ຽມຢາມ ເຮັດວຽກຢູ່ແຂວງຫຼວງພະບາງໃນຄັ້ງນີ້. ພ້ອມນັ້ນ ທ່ານໄດ້ຢືນຢັນວ່າ ສາຍພົວພັນ ລາວ-ໄທ ເປັນສາຍພົວພັນອັນດີງາມ ແລະຍາວນານ ໃນຖານະເປັນສອງປະເທດບ້ານໃກ້ເຮືອນຄຽງ ທີ່ມີຮີດຄອງປະເພນີ, ວັດທະນະທຳ ແລະພາສາທີ່ໃກ້ຄຽງກັນ ພ້ອມທັງມີການໄປມາຫາສູ່ ແລະຮ່ວມມືກັນຢ່າງສະໝ່ຳສະເໝີ. ພ້ອມທັງລາຍງານໂດຍຫຍໍ້ກ່ຽວກັບສະພາບລວມຂອງແຂວງຫຼວງພະບາງແລະຜົນການຮ່ວມມືລະຫວ່າງແຂວງຫຼວງພະບາງ ກັບ ລາຊະອານາຈັກໄທ ໃນໄລຍະຜ່ານມາ ແລະຍິນດີສືບຕໍ່ໃຫ້ການຮ່ວມມື, ອໍານວຍຄວາມສະດວກທຸກວຽກງານທີ່ຈະມີການຮ່ວມມືກັນໃນຕໍ່ໜ້າ ຕື່ມອີກ.
ໂອກາດນີ້ ທ່ານ ເອກອັກຄະຣາຊະທູດ ຜູ້ມີອຳນາດເຕັມແຫ່ງ ຣາຊະອານາຈັກໄທ ປະຈຳ ສປປ ລາວ ໄດ້ແຈ້ງຈຸດປະສົງການເຄື່ອນໄຫວ ເພື່ອສົ່ງເສີມ ແລກປ່ຽນຄວາມເຫັນ ກ່ຽວກັບແຜນການຮ່ວມມືໃນຕໍ່ໜ້າ ໂດຍສຸມໃສ່ການພັດທະນາດ້ານການຄ້າ, ການລົງທຶນ, ການທ່ອງທ່ຽວ ແລະຂົງເຂດທີ່ສອງຝ່າຍມີທ່າແຮງຮ່ວມກັນ ເພື່ອໃຫ້ສາຍພົວພັນການຮ່ວມມື ລະຫວ່າງ ລາວ-ໄທ ນັບມື້ນັບແໜ້ນແຟ້ນ ແລະເກີດໝາກຜົນເປັນຮູບປະທຳຫຼາຍຍິ່ງຂຶ້ນ.
ພາບ-ຂ່າວ: ທະນູສິນ ອິດທິພົນ
ຄໍາເຫັນ