ທູດລາວຍື່ນສານຕາຕັ້ງຕໍ່ປະທານາທິບໍດີ ແຫ່ງ ສາທາລະນະລັດ ອີຕາລີ

ພາຍຫຼັງການຍື່ນສານຕາຕັ້ງ, ທ່ານເອກອັກຄະລັດຖະທູດລາວຄົນໃໝ່ ໄດ້ຮັບກຽດຢ້ຽມຂ່ຳນັບ ແລະ ພົບປະກັບພະນະທ່ານປະທານາທິບໍດີ ຊຶ່ງໃນນັ້ນທ່ານທູດໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດຈາກ ພະນະທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ສົ່ງເຖິງພະນະທ່ານ ແຊຈິໂອ ມັດຕາເຣນລາ ແລະ ຜ່ານພະນະທ່ານ ໄປຍັງລັດຖະບານ ແລະ ປະຊາຊົນອິຕາລີ ທຸກຖ້ວນໜ້າ, ພ້ອມທັງໄດ້ສະແດງຄວາມຂອບໃຈຢ່າງເລິກເຊິ່ງຕໍ່ການຕ້ອນຮັບອັນອົບອຸ່ນ.

ໃນໂອກາດດັ່ງກ່າວ, ທ່ານປະທານາທິບໍດີ ກໍໄດ້ສະແດງຄວາມຊົມເຊີຍທ່ານເອກອັກຄະລັດຖະທູດລາວຄົນໃໝ່ປະຈຳ ສາທາລະນະລັດ ອີຕາລີ, ພ້ອມທັງໄດ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດໄປຍັງ ພະນະທ່ານປະທານປະເທດ, ລັດຖະບານ ແລະ ປະຊາຊົນລາວ ເຊັ່ນກັນ. ພ້ອມທັງ, ອວຍພອນໃຫ້ທ່ານເອກອັກຄະລັດຖະທູດປະສົບຜົນສໍາເລັດໃນການປະຕິບັດໜ້າທີ່ເພື່ອສົ່ງເສີມການພົວພັນຮ່ວມມືຂອງສອງປະເທດໃນຕໍ່ໜ້າ.

ໃນໂອກາດນີ້, ທັງສອງຝ່າຍໄດ້ແລກປ່ຽນຄຳຄິດຄຳເຫັນກ່ຽວກັບການພົວພັນມິດຕະພາບອັນຍາວນານລະຫວ່າງສອງປະເທດກໍຄືຂົງເຂດການຮ່ວມມືເຊັ່ນ: ການສຶກສາ, ການທ່ອງທ່ຽວ ແລະ ການອະນຸລັກຮັກສາມໍລະດົກທາງດ້ານວັດທະນະທຳ ພ້ອມທັງການຮ່ວມມືສະໜັບສະໜູນຊຶ່ງກັນ ແລະ ກັນໃນເວທີສາກົນ; ນອກ ຈາກນັ້ນ, ທ່ານທູດຍັງໄດ້ແຈ້ງສະພາບການພັດທະນາເສດຖະກິດ-ສັງຄົມຂອງ ສປປ ລາວ, ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາໃນທ້າຍປີ 2026 ແລະ ການເປັນເຈົ້າພາບຈັດກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ (CMM) ຮອບວຽນທີ 3 ໃນເດືອນກັນຍາປີ 2026.

ໃນໂອກາດໄປເຄື່ອນໄຫວຍື່ນສານຕາຕັ້ງໃນຄັ້ງນີ້, ທ່ານ ດາວວີ ວົງໄຊ ຍັງໄດ້ພົບປະກັບກົມພິທີການທູດ, ກົມອາຊີ ແລະ ໂອເຊອານີ, ກະຊວງການຕ່າງປະເທດ ແລະ ການຮ່ວມມືສາກົນຂອງອີຕາລີເພື່ອທົບທວນຄືນການຮ່ວມມື ແລະ ແລກປ່ຽນຄຳຄິດຄຳເຫັນກ່ຽວກັບທ່າແຮງ ແລະ ທິດທາງການຮ່ວມມືໃນຕໍ່ໜ້າລະຫວ່າງ ສປປ ລາວ ແລະ ສ ອີຕາລີ ລວມທັງການຮ່ວມມືຫຼາຍຝ່າຍໂດຍສະເພາະໃນຂອບອົງການສະຫະປະຊາຊາດ ແລະ ອາຊຽນ ເພື່ອຮັດແໜ້ນການພົວພັນຮ່ວມມືໃຫ້ດີຍິ່ງຂຶ້ນ. ທັງສອງປະເທດໄດ້ສ້າງຕັ້ງສາຍພົວພັນການທູດໃນວັນທີ 7 ທັນວາ 1965.