ວາງສະແດງສິລະປະຮູບແຕ້ມ ແລະ ແລກປ່ຽນວັດທະນະທໍາ ລາວ-ຈີນ

ໃນພິທີ, ທ່ານ ຄໍາຮຸ່ງ ຈັນທະວົງ ຫົວໜ້າ ສຂຈ ຝ່າຍລາວໄດ້ຂຶ້ນກ່າວຕ້ອນຮັບ. ຈາກນັ້ນ, ຄະນະປະທານໄດ້ຜັດປ່ຽນກັນຂຶ້ນມີຄໍາເຫັນ. ທ່ານ ເດຊານຸ ລາດ ແສນດວງເດດ ກ່າວວ່າ: ປີ 2026 ເປັນປີປະຫວັດສາດທີ່ມີຄວາມໝາຍຢ່າງຍິ່ງ ເນື່ອງຈາກເປັນການສະຫຼອງຄົບຮອບ 65 ປີແຫ່ງການສ້າງ ສາຍພົວພັນທາງການທູດ ລາວ-ຈີນ ແລະ ຖືກກຳນົດເປັນປີມິດຕະພາບ ລາວ-ຈີນ. ຕະຫຼອດໄລຍະ 65 ປີທີ່ຜ່ານມາ, ສອງປະເທດຂອງພວກເຮົາ ໄດ້ຮ່ວມມືກັນຢ່າງໃກ້ຊິດບົນພື້ນຖານຂອງການເຄົາລົບ, ໄວ້ວາງໃຈ ແລະ ການຊ່ວຍເຫຼືອຊຶ່ງກັນ ແລະ ກັນ ຈົນເຮັດໃຫ້ຄວາມສຳພັນລາວ-ຈີນ ພັດທະ ນາເປັນຄວາມຮ່ວມມືແບບຮອບດ້ານ ແລະ ເລິກເຊິ່ງຍິ່ງຂຶ້ນ. ພ້ອມນີ້, ປີນີ້ ຍັງເປັນປີແຫ່ງການສະຫຼອງ 30 ປີ ແຫ່ງການສ້າງຕັ້ງ ມຊ. ພວກເຮົາຖືວ່າ ວັດທະນະທຳ ແລະ ສິລະປະເປັນຂົວ ຕໍ່ອັນສໍາຄັນທີ່ເຊື່ອມຕໍ່ຫົວໃຈຂອງປະຊາຊົນທັງສອງປະເທດ. ສິລະປະພາບ ວາດບໍ່ພຽງແຕ່ສະທ້ອນຄວາມງາມ ຂອງທຳມະຊາດ ແລະ ວັດທະນະທຳ ເທົ່ານັ້ນ, ແຕ່ຍັງສະທ້ອນເຖິງປັນຍາ, ຈິດວິນຍານ, ຄຸນຄ່າ ແລະ ເອກະລັກ ຂອງແຕ່ລະຊາດ. ດັ່ງນັ້ນ, ງານໃນມື້ນີ້ ຈຶ່ງບໍ່ແມ່ນພຽງແຕ່ການນໍາສະເໜີຜົນງານທາງສິລະປະເທົ່ານັ້ນ, ແຕ່ເປັນການສືບສານຄວາມເປັນມິດ, ການຮຽນຮູ້ຊຶ່ງກັນ ແລະ ກັນ ແລະ ການ ເສີມສ້າງຄວາມເຂົ້າໃຈລະຫວ່າງປະຊາຊົນສອງຊາດ ລາວ-ຈີນ.

ທ່ານ ຊົ່ງ ຊຸນເຟິງ ກ່າວວ່າ: ການຈັດງານໃນຄັ້ງນີ້, ເພື່ອຫວັງວ່າຈະນໍາໃຊ້ ໝຶກພູ່ກັນເປັນສື່ກາງ ແລະ ນໍາໃຊ້ສິລະປະພາບວາດເປັນຂົວຕໍ່ ເພື່ອນຳສິລະ ປະຈິດຕະກຳ ແລະ ອັກສອນພູ່ກັນເຂົ້າ ສູ່ສະຖານສຶກສາ, ເຂົ້າໃກ້ຊາວໜຸ່ມ ແລະ ໃຫ້ຄວາມງາມແຫ່ງສຸນທະລີຍະພາບຈີນ ໄດ້ຊຶມຊັບເຂົ້າໄປໃນມິດຕະ ພາບລາວ-ຈີນ. ຜູ້ສ້າງສັນຜົນງານທີ່ນໍາມາວາງສະແດງໃນມື້ນີ້ຄື: ທ່ານ ຫຼິວ ຊານຢູ້ ຊຶ່ງເປັນນັກສິລະປະຈີນຜູ້ມີຄວາມສາມາດ ຮອບດ້ານທັງດ້ານກະວີ, ອັກສອນພູ່ ກັນ ແລະ ຈິດຕະກຳ ແລະ ໄດ້ຮັບການຍົກຍ້ອງວ່າເປັນ “ອັດສະລິຍະຜູ້ແປກ ໃໝ່ແຫ່ງແດນສູ່”. ຜົນງານສິລະປະ ທີ່ນໍາມາວາງສະແດງຢູ່ລາວໃນຄັ້ງນີ້, ມີທັງພາບພູຜາສາຍນໍ້າທ່າມກາງສາຍ ຝົນໝອກ, ພາບບຶງບົວອັນສະຫງົບງາມ ແລະ ຜົນງານອັກສອນພູ່ກັນ-ຈິດ ຕະກຳທີ່ສື່ເຖິງສັນຕິພາບ, ມິດຕະພາບ ແລະ ຄວາມຮ່ວມໃຈແຫ່ງພູຜາແມ່ນໍ້າ, ໝຶກເຂັ້ມ ແລະ ໝຶກອ່ອນ ໄດ້ວາດພາບພູຜາ ແມ່ນໍ້າອັນກວ້າງໃຫຍ່: ເສັ້ນພູ່ກັນແນວຕັ້ງ ແລະ ແນວນອນໄດ້ ຖ່າຍທອດຄວາມຜູກພັນອັນເລິກເຊິ່ງ ລະຫວ່າງເພື່ອນບ້ານ. ຜົນງານແຕ່ລະຜືນລ້ວນບັນຈຸໄວ້ດ້ວຍຄວາມປາຖະໜາອັນດີງາມຂອງທ່ານ ຫຼິວ ຊານຢູ້ ຕໍ່ມິດຕະພາບອັນສືບທອດ ຈາກຮຸ່ນສູ່ຮຸ່ນຂອງປະຊາຊົນ ລາວ-ຈີນ ແລະ ບັນຈຸໄວ້ດ້ວຍນໍ້າໃຈອັນຈິງໃຈ ຂອງນັກສິລະປະຈີນຕໍ່ຜືນແຜ່ນດິນ ລາວທີ່ເຕັມໄປດ້ວຍຊີວິດຊີວາແຫ່ງນີ້.

ໂອກາດນີ້, ທ່ານ ກິ່ງໄຊ ຈຸນລະມົນຕຣີ ກ່າວວ່າ: ການຈັດງານໃນຄັ້ງນີ້, ເປັນ ການສະທ້ອນໃຫ້ເຫັນຄວາມສຳພັນ ອັນແໜ້ນແຟ້ນຂອງສອງປະເທດ ແລະ ເປັນເວທີອັນສໍາຄັນໃນການເປີດ ໂອກາດໃຫ້ສິລະປິນ, ນັກວິຊາການ, ຄູ-ອາຈານ, ນັກສຶກສາ ແລະ ຜູ້ຮັກສິ ລະປະຂອງທັງສອງປະເທດໄດ້ມີໂອ ກາດພົບປະ, ແລກປ່ຽນບົດຮຽນ, ປະ ສົບການ ແລະ ສ້າງສາຍພົວພັນທາງ ດ້ານວິຊາການ ແລະ ວັດທະນະທຳ ໃຫ້ແໜ້ນແຟ້ນຍິ່ງໆຂຶ້ນ.