ທ່ານ ພັອ ຈັນທະໜາ ກົມມະເມືອງ ຮອງປະທານສະຫະພັນນັກຮົບເກົ່າ ແຂວງອັດຕະປື ໄດ້ໃຫ້ສຳພາດຕໍ່ສື່ມວນຊົນແຂວງ ໃນວັນທີ 9 ກັນຍາ 2026 ເນື່ອງໃນໂອກາດວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 24 ປີ (9 ກັນຍາ 2002-9 ກັນຍາ 2026) ວ່າ: ການເຕີບໃຫຍ່ຂະຫຍາຍຕົວຂອງອົງການນັກຮົບເກົ່າຕິດພັນຢ່າງແໜ້ນແຟ້ນກັບມູນເຊື້ອ ແລະ ການເຕີບໃຫຍ່ຂອງພັກ ກໍຄື ກອງທັບປະຊາຊົນລາວ, ສະມາຊິກນັກຮົບເກົ່າມີຕົ້ນກຳເນີດຈາກນັກຮົບປະຕິວັດ ຜູ້ທີ່ໄດ້ຜ່ານການຕໍ່ສູ້ຢ່າງກ້າຫານ ໃນໄລຍະສົງຄາມ ຕະຫຼອດເຖິງພາລະກິດປົກປັກຮັກສາ ແລະ ພັດທະນາປະເທດຊາດ, ພາຍຫຼັງນັກຮົບປະຕິວັດເຫຼົ່ານັ້ນເຖົ້າແກ່ອາວຸໂສ ແລະ ພັກຜ່ອນຮັບເບ້ຍບຳນານຕາມນະໂຍບາຍຂອງພັກ-ລັດ, ຈຶ່ງໄດ້ມີການຈັດຕັ້ງເຕົ້າໂຮມ ແລະ ປົກປ້ອງຄຸ້ມຄອງບັນດານັກຮົບປະຕິວັດ, ຕໍ່ມາໄດ້ມີມະຕິຂອງກົມການເມືອງສູນກາງພັກ ກ່ຽວກັບການສ້າງຕັ້ງ ແລະ ການເຄື່ອນໄຫວອົງການນັກຮົບເກົ່າ ໂດຍໃຊ້ຊື່ວ່າ “ສະຫະພັນນັກຮົບເກົ່າແຫ່ງຊາດລາວ”.
ສຳລັບແຂວງອັດຕະປື, ສະຫະພັນນັກຮົບເກົ່າແຂວງ ໄດ້ຮັບການສ້າງຕັ້ງຂຶ້ນໃນປີ 2003 ຕາມຂໍ້ຕົກລົງຂອງຄະນະປະຈຳພັກແຂວງ ເລກທີ 042/ກປພຂ. ນັບແຕ່ນັ້ນມາ ອົງການນັກຮົບເກົ່າແຂວງ ໄດ້ຢູ່ພາຍໃຕ້ການຊີ້ນຳຂອງສະຫະພັນນັກຮົບເກົ່າແຫ່ງຊາດລາວ ແລະ ຄະນະພັກແຂວງ ເຮັດໜ້າທີ່ເປັນເສນາທິການໃນການເຕົ້າໂຮມ, ສຶກສາອົບຮົມ ແລະ ປົກປ້ອງສິດຜົນປະໂຫຍດອັນຊອບທຳຂອງສະມາຊິກ.
ຕະຫຼອດໄລຍະຜ່ານມາ, ສະຫະພັນນັກຮົບເກົ່າແຂວງ ໄດ້ສືບຕໍ່ສຶກສາອົບຮົມດ້ານການເມືອງ-ແນວຄິດ ໃຫ້ສະມາຊິກຢ່າງເປັນປະຈຳ, ເຮັດໃຫ້ແນວຄິດຂອງສະມາຊິກໂດຍພື້ນຖານມີຄວາມໝັ້ນຄົງ, ຮັກສາມູນເຊື້ອຂອງກອງທັບ ແລະ ເປັນແບບຢ່າງອັນດີ ໃຫ້ແກ່ລູກຫຼານຮຸ່ນສືບທອດ.
ທ່ານ ພັອ ຈັນທະໜາ ກົມມະເມືອງ ໄດ້ເນັ້ນ 6 ດ້ານສຳຄັນ ສຳລັບທິດທາງໃນໄລຍະຕໍ່ໜ້າເປັນຕົ້ນ ເພີ່ມທະວີສຶກສາອົບຮົມມູນເຊື້ອ ແລະ ທາດແທ້ປະຕິວັດໃຫ້ແກ່ນັກຮົບເກົ່າ, ກຳລັງປະກອບອາວຸດ, ພະນັກງານລັດ ແລະ ປະຊາຊົນບັນດາເຜົ່າ ໃຫ້ເລິກເຊິ່ງ ແລະ ກວ້າງຂວາງ ຄວບຄູ່ກັບການເຊື່ອມຊຶມມະຕິກອງປະຊຸມຂອງພັກ ແລະ ມະຕິກອງປະຊຸມຜູ້ແທນນັກຮົບເກົ່າ.ພ້ອມທັງສືບຕໍ່ປັບປຸງກົງຈັກ ແລະ ແບບແຜນວິທີເຄື່ອນໄຫວຂອງອົງການ ໃຫ້ເຂັ້ມແຂງ ໜັກແໜ້ນ, ເປັນຕົວແທນທີ່ດີໃນການປົກປ້ອງສິດຜົນປະໂຫຍດ ແລະ ເປັນບ່ອນເຕົ້າໂຮມຄວາມສາມັກຄີຂອງຖັນແຖວນັກຮົບເກົ່າ; ສືບຕໍ່ປຸກລະດົມເຕົ້າໂຮມຄວາມສາມັກຄີ ລະຫວ່າງນັກຮົບເກົ່າກັບປະຊາຊົນບັນດາເຜົ່າ, ຊ່ວຍເຫຼືອເຊິ່ງກັນໃນຍາມພົບຄວາມຫຍຸ້ງຍາກ ແລະ ສ່ວນຮ່ວມໃນການຄຸ້ມຄອງລັດ-ສັງຄົມ ຕະຫຼອດເຖິງພາລະກິດປົກປັກຮັກສາ ແລະ ພັດທະນາປະເທດຊາດ; ເອົາໃຈໃສ່ແກ້ໄຂຊີວິດການເປັນຢູ່ ແລະ ຫລຸດຜ່ອນຄວາມທຸກຍາກຂອງນັກຮົບເກົ່າ, ປຸກລະດົມໃຫ້ສະມາຊິກເສີມຂະຫຍາຍມູນເຊື້ອເພິ່ງຕົນເອງ, ກຸ້ມຕົນເອງ ແລະ ສ້າງຖານະຄອບຄົວໃຫ້ໝັ້ນຄົງ,ສືບຕໍ່ຫັນລົງຮາກຖານ, ເສີມສ້າງອົງການນັກຮົບເກົ່າໃຫ້ເຂັ້ມແຂງ ຕິດພັນກັບວຽກງານ 3 ສ້າງ, ຂະບວນການແຂ່ງຂັນຮັກຊາດ ແລະ ເນື້ອໃນຂໍ້ແຂ່ງຂັນ “3 ດີ 6 ຮັກສາ” ໃຫ້ເກີດໝາກຜົນເປັນຮູບປະທຳ ແລະ ສືບຕໍ່ປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ເສີມຂະຫຍາຍສາຍພົວພັນ ແລະ ການຮ່ວມມືຊ່ວຍເຫຼືອເຊິ່ງກັນ ແລະ ກັນ ກັບປະເທດໃກ້ຄຽງ ໂດຍສະເພາະ ການຮ່ວມມືຮອບດ້ານກັບສະມາຄົມນັກຮົບເກົ່າ ສສ ຫວຽດນາມ.
ທ່ານ ພັອ ຈັນທະໜາ ກົມມະເມືອງ ກ່າວຕື່ມວ່າ: ໃນນາມສ່ວນຕົວ ບໍ່ວ່າຍາມໃດ ຕົນເອງແມ່ນບໍ່ເຄີຍລືມຄຸນງາມຄວາມດີ ແລະ ການເສຍສະລະອັນໃຫຍ່ຫຼວງຂອງບັນດານັກຮົບເກົ່າ ທີ່ໄດ້ອຸທິດເລືອດເນື້ອ, ເຫື່ອແຮງ ແລະ ຊີວິດເພື່ອຊາດ, ເພື່ອປະຊາຊົນ. ພ້ອມທັງຮຽກຮ້ອງມາຍັງຄະນະພັກ, ອຳນາດການປົກຄອງ, ກຳລັງປະກອບອາວຸດ ແລະ ປະຊາຊົນບັນດາເຜົ່າທົ່ວແຂວງອັດຕະປື ໃຫ້ສືບຕໍ່ໃຫ້ການດູແລ, ສະໜັບສະໜູນ ແລະ ຮ່ວມໄມ້ຮ່ວມມືກັບອົງການນັກຮົບເກົ່າ ເພື່ອໃຫ້ອົງການຈັດຕັ້ງນັກຮົບເກົ່າແຂວງອັດຕະປື ນັບມື້ເຕີບໃຫຍ່, ເຂັ້ມແຂງ ແລະ ສາມາດສືບຕໍ່ປະຕິບັດພາລະກິດອັນມີກຽດສະຫງ່າຕາມທີ່ພັກ ແລະ ລັດມອບໝາຍ.
ຄໍາເຫັນ