ທ່ານ ສອນໄຊ ສີພັນດອນ ນາຍົກລັດຖະມົນແຫ່ງ ສປປ ລາວ ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ໃນໄລຍະ 6 ເດືອນຕົ້ນປີ 2026 ແລະ ທິດທາງແຜນການ 6 ເດືອນ ທ້າຍປີ 2026 ຕໍ່ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດຊຸດທີ X ໃນວັນທີ 6 ກໍລະກົດນີ້, ທີ່ສະພາແຫ່ງຊາດ ໂດຍພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ.
ທ່ານ ສອນໄຊ ສີພັນດອນ ກ່າວວ່າ: ເພື່ອຮັບປະກັນໃຫ້ອັດຕາການຂະຫຍາຍຕົວເສດຖະກິດບັນລຸໄດ້ໃນລະດັບ 5.5%, GDP ສະເລ່ຍຕໍ່ຫົວຄົນ ໃຫ້ໄດ້ 2,238 ໂດລາ ແລະ ລາຍໄດ້ແຫ່ງຊາດ (GNI) ສະເລ່ຍຕໍ່ຫົວຄົນ ໃຫ້ໄດ້ 2,101 ໂດລາ ສະເໜີເພີ່ມທະວີການຊຸກຍູ້ຂະແໜງເສດຖະກິດ ທີ່ເປັນທ່າແຮງຕົ້ນຕໍໄປຄຽງຄູ່ກັບການເລັ່ງແກ້ໄຂບັນຫາດ້ານສະຖຽນລະພາບດ້ານເສດຖະກິດມະຫາພາກ ເພື່ອເປັນພື້ນຖານສ້າງຄວາມເຊື່ອໝັ້ນໃຫ້ແກ່ພາກການຜະລິດ ແລະ ການລົງທຶນ ໂດຍສຸມໃສ່ຊຸກຍູ້ສົ່ງເສີມການຜະລິດສະບຽງອາຫານໃຫ້ໄດ້ຕາມແຜນ ເພື່ອຮັບປະກັນການສະໜອງຕະຫຼາດພາຍໃນຢ່າງພຽງພໍ. ພ້ອມນັ້ນ, ເລັ່ງຈັດຕັ້ງປະຕິບັດມາດຕະການແກ້ໄຂບັນຫາການເພີ່ມຂຶ້ນຂອງຕົ້ນທຶນ ແລະ ຂອດການຈໍາໜ່າຍໄປສູ່ເຂດຕ່າງໆໃຫ້ຄ່ອງຕົວ; ກະກຽມຕ້ານແລ້ງ ແລະ ຕ້ານຖ້ວມ ໃນຊ່ວງການຜະລິດໃນລະດູຝົນ ໂດຍເລັ່ງປັບປຸງ ແລະ ກໍ່ສ້າງຊົນລະປະທານ ເພື່ອຮັບປະກັນການສະໜອງນໍ້າໃຫ້ແກ່ການຜະລິດຢ່າງພຽງພໍ. ຄຽງຄູ່ກັນນີ້, ເລັ່ງຊຸກຍູ້ການຜະລິດສິນຄ້າກະສິກຳ ເພື່ອສົ່ງອອກ ໂດຍສຸມໃສ່ພືດ-ສັດ ທີ່ໄດ້ມີການເຈລະຈາເຕັກນິກແລ້ວ ໂດຍການແກ້ໄຂບັນຫາຕົ້ນທຶນ ໂດຍສະເພາະການເພີ່ມຂຶ້ນຂອງລາຄານໍ້າມັນ, ການເຂົ້າເຖິງຕະຫຼາດ, ການຄຸ້ມຄອງລາຄາ ແລະ ອື່ນໆ ເພື່ອຊຸກຍູ້ການສົ່ງອອກຜະລິດຕະພັນກະສິກຳ ໃຫ້ບັນລຸໄດ້ 1,900 ລ້ານໂດລາ; ລົງຕິດຕາມກວດກາ ແລະ ຊຸກຍູ້ພາກການຜະລິດແຮ່ທາດເພື່ອສົ່ງອອກ ໃຫ້ໄດ້ 2,185.9 ລ້ານໂດລາ ແລະ ໃຫ້ປະຕິບັດຕາມລະບຽບການທີ່ໄດ້ກໍານົດໄວ້ ໂດຍສະເພາະໂຄງການທີ່ໄດ້ອະນຸມັດແລ້ວໄປຄ່ຽງຄູ່ກັບການສົ່ງເສີມບາງອຸດສາຫະກຳແຮ່ທາດ ທີ່ມີທ່າແຮງດ້ານການປຸງແຕ່ງຢູ່ພາຍໃນປະເທດ ເປັນຕົ້ນແຮ່ຄໍາ, ທອງແດງ, ເກືອໂປຼຕັດ ແລະ ບົກຊິດ ຕາມນະໂຍບາຍພັດທະນາແຮ່ທາດໃນໄລຍະໃໝ່; ສືບຕໍ່ພັດທະນາບັນດາໂຄງການພະລັງງານໄຟຟ້າສະອາດ ແລະ ຊຸກຍູ້ບັນດາເຂື່ອນໄຟຟ້າຕ່າງໆໃຫ້ຜະລິດເຕັມກໍາລັງໃນຊ່ວງລະດູຝົນ ເພື່ອສົ່ງອອກກະແສໄຟຟ້າ ໃຫ້ບັນດາປະເທດເພື່ອນບ້ານໃຫ້ໄດ້ 45,705.94 ລ້ານກິໂລວັດໂມງ, ມູນຄ່າ 2,829.04 ລ້ານໂດລາ. ພ້ອມນີ້, ກໍໃຫ້ເລັ່ງເຈລະຈາເພື່ອສົ່ງອອກຕື່ມ; ຊຸກຍູ້ໂຄງການໂຄງລ່າງພື້ນຖານຂະໜາດໃຫຍ່ ທີ່ໄດ້ອະນຸມັດ ແລະ ເຊັນສັນຍາແລ້ວໃຫ້ເລີ່ມປະຕິບັດໂດຍໄວ ເປັນຕົ້ນທາງດ່ວນວຽງຈັນ-ບໍ່ເຕັນ, ທາງດ່ວນແຕ່ປາກຊັນ-ຊາຍແດນລາວ-ຫວຽດນາມ, ທາງລົດໄຟແຕ່ທ່າແຂກ-ຊາຍແດນລາວຫວຽດນາມ ແລະ ອື່ນໆ; ໂຄສະນາ ແລະ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໃຫ້ເພີ່ມຂຶ້ນ ຄຽງຄູ່ກັບການອໍານວຍຄວາມສະດວກການເຂົ້າອອກ ແລະ ແກ້ໄຂຕົ້ນທຶນການຂົນສົ່ງໂດຍສານ ເພື່ອສູ້ຊົນໃຫ້ນັກທ່ອງທ່ຽວ ຕ່າງປະເທດບັນລຸ 4.46 ລ້ານເທື່ອຄົນ.
ຄຽງຄູ່ກັນນັ້ນ, ສືບຕໍ່ປະຕິບັດນະໂຍບາຍການສະໜອງສິນເຊື່ອຜ່ານກອງທຶນຕ່າງໆ ເພື່ອສົ່ງເສີມຫົວໜ່ວຍທຸລະກິດ SME ເຊັ່ນ: ສະໜອງຜ່ານກອງທຶນສົ່ງເສີມ SME ແລະ ກອງທຶນ LAFF; ຄົ້ນຄວ້ານະໂຍບາຍສິນເຊື່ອ ໂດຍສະເພາະສິນເຊື່ອຂະະແໜງກະສິກຳ, ອຸດສາຫະກຳປຸງແຕ່ງ, ສິນເຊື່ອສໍາລັບການຜະລິດສົ່ງອອກ ແລະ ທົດແທນການນໍາເຂົ້າດ້ວຍການໝູນໃຊ້ແຫຼ່ງທຶນ ຫຼື ສະພາບຄ່ອງສ່ວນເກີນຂອງບັນດາທະນາຄານທຸລະກິດ ເພື່ອເປັນການຊຸກຍູ້ການຂະຫຍາຍຕົວເສດຖະກິດ.
ສໍາລັບນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ ໃຫ້ສືບຕໍ່ພິຈາລະນາແຫຼ່ງທຶນໃຫ້ສະເພາະຫົວໜ່ວຍທີ່ຜ່ານການຄົ້ນຄວ້າ ແລະ ເຫັນດີອະນຸມັດຈາກຄະນະຮັບຜິດຊອບຂັ້ນແຂວງ/ນະຄອນຫຼວງວຽງຈັນ ໃນປີ 2025 ເທົ່ານັ້ນ ແລະ ນະໂຍບາຍສິນເຊື່ອເພື່ອກະຕຸ້ນເສດຖະກິດ ສືບຕໍ່ສົມທົບດອກເບ້ຍຕາມແຜນການທີ່ກຳນົດໄວ້. ຄົ້ນຄວ້າແຫຼ່ງທຶນເພື່ອຊ່ວຍຊຸກຍູ້ຜູ້ປະກອບການຜະລິດສະບຽງອາຫານ ທີ່ຈໍາເປັນເຊັ່ນ: ຊີ້ນ, ປາ, ໄຂ່.
(ຂ່າວ: ວັນພັງ, ພາບ: ຕຸໄລເພັດ)
ຄໍາເຫັນ