ຂະແໜງການສາທາລະນະສຸກ ມີ 11 ຄາດໝາຍທີ່ຖືກຮັບຮອງໃນປີນີ້ ຊຶ່ງຈະຕ້ອງໄດ້ສູ້ຊົນໃຫ້ບັນລຸ ເພື່ອຈະຍູ້ໜູນໃຫ້ການປະຕິບັດຄາດໝາຍດ້ານວັດທະນະທໍາ-ສັງຄົມ ປະກອບສ່ວນສຳຄັນໃນການພັດທະນາເສດຖະກິດ-ສັງຄົມໃນປີນີ້ ໃຫ້ບັນລຸຕາມຄາດໝາຍທີ່ວາງໄວ້.
ຄາດໝາຍຂະແໜງສາທາລະນະສຸກໃນປີນີ້ມີຄື: ສູ້ຊົນໃຫ້ອັດຕາສ່ວນເດັກນ້ອຍລຸ່ມ 5 ປີ ນໍ້າໜັກ ຕໍ່າກວ່າມາດຕະຖານ ໃຫ້ຍັງເຫຼືອ 16% ຂອງປະຊາກອນເປົ້າໝາຍ; ອັດຕາສ່ວນເດັກນ້ອຍ ລຸ່ມ 5 ປີ ທີ່ມີລວງສູງຕໍ່າກວ່າມາດຕະຖານ ໃຫ້ຍັງເຫຼືອ 28% ຂອງປະຊາກອນເປົ້າໝາຍ; ອັດຕາການຕາຍຂອງເດັກ ລຸ່ມ 1 ປີ ໃຫ້ຍັງເຫຼືອ 22/1.000 ຄົນ ຂອງເດັກນ້ອຍເກີດມີຊີວິດ; ອັດຕາການຕາຍຂອງເດັກ ລຸ່ມ 5 ປີ ໃຫ້ຍັງເຫຼືອ 32/1.000 ຄົນ ຂອງເດັກນ້ອຍເກີດມີຊີວິດ; ອັດຕາສ່ວນການຕາຍຂອງແມ່ ໃຫ້ຍັງເຫຼືອ 120/100.000 ຄົນ ຂອງເດັກນ້ອຍເກີດມີຊີວິດ; ອັດຕາເກີດລູກມີແພດຊ່ວຍໃຫ້ໄດ້ 84% ຂອງປະຊາກອນເປົ້າໝາຍ; ອັດຕາໃຫ້ວັກຊິນກັນພະຍາດໃນເດັກລຸ່ມ 1 ປີ ໃຫ້ໄດ້ 95% ຂອງປະຊາກອນເປົ້າໝາຍ; ອັດຕາຊົມໃຊ້ນໍ້າສະອາດ ໃຫ້ບັນລຸ 94% ຂອງປະຊາກອນທັງໝົດ; ອັດຕາການຊົມໃຊ້ວິດຖ່າຍຄອບຄົວ ໃຫ້ໄດ້ 84% ຂອງຄອບຄົວທັງໝົດ; ອັດຕາການປົກຄຸມປະກັນສຸຂະພາບທົ່ວປວງຊົນໃຫ້ໄດ້ 94,5% ຂອງປະຊາກອນທັງໝົດ; ອັດຕາການປະກາດ ແລະ ຮັບຮອງບ້ານສາທາລະນະສຸກແບບຢ່າງ ໃຫ້ໄດ້ 54% ຂອງຈໍານວນບ້ານທັງໝົດ.
ບັນດາຄາດໝາຍຂະແໜງສາທາລະນະສຸກ ຂ້າງເທິງນັ້ນ ແມ່ນໄດ້ລະບຸໃນເອກະສານຊ້ອນທ້າຍ ຂອງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງບົດລາຍງານຂອງລັດຖະບານ ກ່ຽວກັບການສະຫຼຸບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ ກາງສະໄໝ 5 ປີ ຄັ້ງທີ IX (2021-2025), ທິດທາງແຜນການພັດທະນາເສດຖະກິດ-ສັງຄົມ ທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2023 ແລະ ແຜນພັດທະນາເສດຖະກິດ-ສັງຄົມ ປະຈໍາປີ 2024.
(ຂ່າວ: ສຸກສະຫວັນ, ພາບປະກອບ: UNICEF Laos)
ຄໍາເຫັນ