ບໍລິຄໍາໄຊ ຈູດທໍາລາຍຢາເສບຕິດຫຼາຍລາຍການເນື່ອງໃນວັນແຫ່ງຊາດຕ້ານຢາເສບຕິດ ຄົບຮອບ 25 ປີ

ທ່ານ ພົຈວ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງບໍລິຄຳໄຊ ໄດ້ ຕາງໜ້າໃຫ້ຄະນະກຳມະການຄວບຄຸມ ແລະ ຕ້ານຢາເສບຕິດແຂວງ ສະຫຼຸບລາຍງານຜົນການເຄື່ອນໄຫວວຽກງານຕ້ານ ແລະ ສະກັດກັ້ນຢາເສບຕິດໃນໄລຍະ 1 ປີຜ່ານມາ ສະພາບການຊື້-ຂາຍ ແລະ ລະບາດຂອງຢາເສບຕິດໃນທົ່ວໂລກ ແລະ ພາກພື້ນ ຍັງຄົງຜັນແປຢ່າງສັບສົນ ແລະ ສ້າງຜົນກະທົບຕໍ່ການພັດທະນາເສດຖະກິດ-ສັງຄົມ. ສຳລັບແຂວງບໍລິຄຳໄຊ ຍັງຖືກກູ່ມຄົນບໍ່ຫວັງດີໃຊ້ເປັນເສັ້ນທາງຂົນສົ່ງ ແລະ ມີກຸ່ມຄົນບໍ່ດີລັກລອບປູກຝິ່ນ-ກັນຊາ ຢູ່ເຂດພູດອຍ ພ້ອມທັງມີກຸ່ມໄວໜຸ່ມ, ນັກຮຽນ-ນັກສຶກສາ ຕົກເປັນທາດຂອງຢາເສບຕິດ. ຜ່ານການຈັດຕັ້ງປະຕິບັດວາລະແຫ່ງຊາດ ຢ່າງເປັນເຈົ້າການ, ເຈົ້າໜ້າທີ່ ປກສ ແຂວງບໍລິຄຳໄຊສາມາດຍາດໄດ້ຜົນງານອັນພົ້ນເດັ່ນໂດຍສະເພາະຄະດີທີ່ສານຕັດສິນໃຊ້ໄດ້ເດັດຂາດແລ້ວ (161 ເລື່ອງ, ນັກໂທດ 211 ຄົນ) ສານເສບຕິດຂອງກາງທີນໍາມາທຳລາຍປະຈຳປີ 2026 ປະກອບມີ:ຢາບ້າ: 6,350,798 ເມັດ,ຄັນຊາແຫ້ງ: 3,194 ກິໂລກຼາມ,ຢາດີໄອ (DI): 67,266 ຂວດ,ໃບກະທ່ອມ 2,059 ກິໂລກຼາມ,ນ້ຳກະທ່ອມສຳເລັດຮູບ 360 ຕຸກ ,ຢາໄອສ໌: 45 ກິໂລກຼາມ ,ຄໍລາເຈນປະສົມສານເສບຕິດ: 314 ຊອງ ,ຢາສູບໄຟຟ້າ: 163 ອັນ,ເຄຕາມີນ (ຢາເຄ): 1 ກິໂລກຼາມ ,ສານເຄມີ ແລະ ແປ້ງຜະລິດຢາບ້າ: ແປ້ງຜະລິດຢາບ້າ 51 ກິໂລກຼາມ, ຄາເຟອິນ 52 ກິໂລກຼາມ, ແປ້ງຂາວ 108 ກິໂລກຼາມ, ແປ້ງຝຸ່ນ 124.5 ກິໂລກຼາມ, ສີປະສົມ ແລະ ນ້ຳຢາແຕ່ງກິ່ນຈຳນວນໜຶ່ງ.

ສັງລວມແລ້ວ ຢາບ້າ ຍັງຄົງເປັນອັນດັບໜຶ່ງທີ່ແຜ່ລະບາດໜັກກວມເອົາ 70% ໂດຍສະເພາະໃນກຸ່ມຊາວໜຸ່ມ, ໄວໜຸ່ມ, ເຍົາວະຊົນ ແລະ ກຳມະກອນ. ສ່ວນອີກ 30% ແມ່ນການມົ້ວສຸມສິ່ງເສບຕິດປະເພດໃໝ່ ເຊັ່ນ: ຢາເຄ, ນ້ຳກະທ່ອມ, ກາເຟ ແລະ ຄໍລາເຈນປະສົມສານເສບຕິດ ທີ່ກຳລັງແຜ່ລາມຕາມຮ້ານອາຫານ, ຮ້ານບັນເທີງ ແລະ ຮ້ານຄາລະໂອເກະ. ຕໍ່ກັບບັນຫາຫຍໍ້ທໍ້ດັ່ງກ່າວ, ທາງເຈົ້າໜ້າທີ່ ແລະ ພາກສ່ວນທີ່່ຽວຂ້ອງ ໄດ້ວາງມາດຕະການຢ່າງເດັດຂາດໃນຕໍ່ໜ້າ ໂດຍຈະສືບຕໍ່ຜັນຂະຫຍາຍວາລະແຫ່ງຊາດ, ສ້າງບ້ານ ແລະ ຄອບຄົວປອດຢາເສບຕິດ, ໂຄສະນາເຜີຍແຜ່ຜົນຮ້າຍຂອງຢາເສບຕິດໃຫ້ເຂົ້າເຖິງທຸກຸ່ມເປົ້າໝາຍ ພ້ອມທັງຮຽກຮ້ອງໃຫ້ທຸກພາກສ່ວນໃນສັງຄົມ, ປະຊາຊົນ ແລະ ນັກຸລະກິດ ຮ່ວມມືກັນເປັນເຈົ້າການເພື່ອປົກປ້ອງລູກຫຼານໃຫ້ຫຼຸດພົ້ນຈາກໄພພິບັດຢາເສບຕິດຢ່າງຮອບດ້ານ.

ຂ່າວ_ພາບ: ສາຍສະໝອນ