 |
ທ່ານ ນາງ ອາລຸນນີ ປັນຍາສິດ ໄດ້ມີຄໍາເຫັນກ່າວເປີດກອງປະຊຸມວ່າ: ໃນໄລຍະຜ່ານມາ, ການທ່ອງທ່ຽວ ໄດ້ກາຍເປັນຂະແໜງການເສດຖະກິດທີ່ສໍາຄັນ ຂອງປະເທດເຮົາ ຊຶ່ງສ້າງລາຍຮັບ ເປັນອັນດັບທີ່ 4 ຮອງຈາກຂະແໜງການ: ອຸດສາຫະກໍາອື່ນໆ, ແຮ່ທາດ ແລະ ໄຟຟ້າ ແລະ ໃນປີ 2025 ທີ່ຜ່ານມາ ສປປ ລາວ ເຮົາສາມາດຕ້ອນຮັບນັກທ່ອງທ່ຽວສາກົນ ໄດ້ຈໍານວນ 4.5 ລ້ານເທື່ອຄົນ ເພີ່ມຂຶ້ນຈາກປີ 2024 ຈໍານວນ 11% ແລະ ສ້າງລາຍຮັບໄດ້ກວ່າ 1.7 ຕື້ໂດລາ ເພີ່ມຂຶ້ນ 20% ຈາກປີທີ່ຜ່ານມາ. ຊຶ່ງ 5 ອັນດັບນັກທ່ອງທ່ຽວ ທີ່ເຂົ້າມາທ່ຽວລາວ ຫຼາຍທີ່ສຸດແມ່ນ: ໄທ, ຈີນ, ຫວຽດນາມ, ສ ເກົາຫຼີ ແລະ ຣັດເຊຍ. ພ້ອມກັນນີ້, ຂະແໜງການທ່ອງທ່ຽວ ຍັງເປັນຂະແໜງການສໍາຄັນ ທີ່ຊ່ວຍສ້າງວຽກເຮັດງານທໍາ ແລະ ສ້າງລາຍໄດ້ໃຫ້ປະຊາຊົນທ້ອງຖິ່ນ, ທັງເປັນຂົວຕໍ່ໃນການເຜີຍແຜ່ວັດທະນະທໍາ ແລະ ພາບພົດອັນດີງາມຂອງປະເທດເຮົາສູ່ສາກົນ.
ທ່ານ ມະໂນທອງ ພົງສະຫວັດ ໄດ້ກ່າວມີຄໍາເຫັນວ່າ: ແຂວງຄໍາມ່ວນ ມີທ່າແຮງ ແລະ ຄວາມອຸດົມສົມບູນທາງດ້ານທໍາມະຊາດ, ປະຫວັດສາດ ແລະ ວັດທະນະທໍາ ທີ່ເປັນເອກະລັກ ເພື່ອໃຫ້ການທ່ອງທ່ຽວຂອງແຂວງເຮົາເຕີບໂຕຢ່າງແຂງແຮງ, ຍືນຍົງ ແລະ ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດໄດ້ຫຼາຍຂຶ້ນ,
ໃນໄລຍະປີ 2026 ແມ່ນໄດ້ສຸມໃສ່ວຽກງານການພັດທະນາ ແລະ ສົ່ງເສີມການທ່ອງທ່ຽວ ໂດຍໄດ້ເອົາໃຈໃສ່ຊຸກຍູ້ທັງພາກລັດ ແລະ ຜູ້ປະກອບການທ່ອງທ່ຽວພັດທະນາກິດຈະກໍາໃຫ້ມີຄວາມຫຼາກຫຼາຍເພື່ອດຶງດູດນັກທ່ອງທ່ຽວ,ຈັດຝຶກອົບຮົມສ້າຄວາມ
ເຂັ້ມແຂງໃຫ້ແກ່ພາກລັດ ແລະ ຜູ້ປະກອບ ການທ່ອງທ່ຽວ ກ່ຽວກັບການໂຄສະນາຜ່ານສື່ອອນລາຍ ນອກນັ້ນ ຍັງໄດ້ຈັດກິດຈະກໍາສົ່ງເສີມ ການທ່ອງທ່ຽວ ເຊື່ອມໂຍງ ລາວ-ໄທ ລະຫວ່າງຄໍາມ່ວນ ສປປ ລາວ ແລະ ນະຄອນພະນົມ ຣາຊະອານາຈັກໄທ. ຜ່ານການຈັດຕັ້ງປະຕິບັດມາດຕະການສົ່ງເສີມການທ່ອງທ່ຽວຕ່າງໆ ໄດ້ເຮັດໃຫ້ຂະແໜງການທ່ອງທ່ຽວຂອງແຂວງ ມີການຂະຫຍາຍຕົວດ້ວຍຈັ່ງຫວະທີ່ດີຂຶ້ນ ສະແດງອອກໃນໄລຍະ 8 ເດືອນຂອງປີ 2026 ທີ່ຜ່ານມານີ້ ມີນັກທ່ອງທ່ຽວເຂົ້າມາແຂວງຄໍາມ່ວນ ທັງໝົດ 485,608 ເທື່ອຄົນ, ຍິງ 166,186 ເທື່ອຄົນ ເຊິ່ງໃນນີ້ມີ: ນັກທ່ອງທ່ຽວພາຍໃນ 191,868 ເທື່ອຄົນ, ນັກທ່ອງທ່ຽວຕ່າງປະເທດ 293,740 ເທື່ອຄົນ, ສາມາດກະຈາຍລາຍໄດ້ຈາກການທ່ອງທ່ຽວໃຫ້ກັບສັງຄົມ ໄດ້ປະມານ 61 ລ້ານກວ່າ.
ກອງປະຊຸມຄັ້ງນີ້, ຜູ້ເຂົ້າຮ່ວມຍັງໄດ້ຮັບຟັງການນໍາສະເໜີສະພາບການຄຸ້ມຄອງ ແລະ ຈັດຕັ້ງປະຕິບັດມາດຕະຖານການທ່ອງທ່ຽວຂອງແຂວງຄໍາມ່ວນ, ສະພາບລວມການຈັດຕັ້ງປະຕິບັດມາດຕະຖານການທ່ອງທ່ຽວ ຢູ່ ສປປ ລາວ ໃນໄລຍະຜ່ານມາ, ມາດຕະຖານສະຖານທີ່ພັກແຮມ ສປປ ລາວ, ມາດຕະຖານການຈັດລະດັບສະຖານທີ່ທ່ອງທ່ຽວ ສປປ ລາວ ແລະ ມາດຕະຖານໂຮງແຮມຂຽວອາຊຽນ. ທັງນີ້ກໍເພື່ອເຮັດໃຫ້ ພາກລັດ, ພາກທຸລະກິດ ໃນຂະແໜງການທ່ອງທ່ຽວ ພາຍໃນແຂວງ ໄດ້ຮັບຮູ້ ແລະ ເຂົ້າໃຈ ລາຍລະອຽດກ່ຽວກັບບັນດາຂໍ້ກຳນົດ, ຕົວຊີ້ວັດ ແລະ ແຜນການປະເມີນຮາກຖານການທ່ອງທ່ຽວ ສປປ ລາວ ໃນການນໍາໃຊ້ມາດຕະຖານດັ່ງກ່າວ ເຂົ້າໃນການຈັດຕັ້ງປະຕິບັດຕົວຈິງ ຢ່າງມີປະສິດທິພາບ ທັງເປັນການຍົກລະດັບຄຸນນະພາບການບໍລິການ ໃຫ້ສອດຄ່ອງຕາມເກນມາດຕະຖານ ທີ່ໄດ້ວາງໄວ້.ຂ່າວ: ກອງຄໍາ
ຄໍາເຫັນ