 |
ກອງປະຊຸມຄັ້ງນີ້ ເປັນການສືບຕໍ່ຜົນການຄົ້ນຄວ້າ ແລະ ລະດົມຄຳເຫັນເປີດກວ້າງທົ່ວປະເທດ ຈາກກອງປະຊຸມວັນທີ 18 ກັນຍາ ຜ່ານມາ ເພື່ອວິເຄາະໃຫ້ເລິກເຊິ່ງ ບັນດາບັນຫາທີ່ຍັງມີການເຂົ້າໃຈ ແລະ ນໍາໃຊ້ກົດໝາຍ ບໍ່ທັນເປັນເອກະພາບ ກ່ຽວກັບ ການກຳນົດຖານະ “ຜົວ ຫຼື ເມຍ” ຕາມມາດຕາ 247, ໂດຍສະເພາະ ກໍລະນີການຢູ່ກິນຮ່ວມກັນ ໂດຍບໍ່ໄດ້ຈົດທະບຽນແຕ່ງດອງ; ພ້ອມທັງ ການກຳນົດຂອບເຂດຄວາມໝາຍຂອງຄຳວ່າ “ງັດແງະ” ຕາມມາດຕາ 231 ວັກ 2 ປະມວນກົດໝາຍອາຍາ ເພື່ອຈຳແນກການລັກຊັບທົ່ວໄປອອກຈາກການລັກຊັບທີ່ມີລັກສະນະເພີ່ມໂທດ ແນໃສ່ຊອກຫາແນວທາງແກ້ໄຂ ທີ່ມີພື້ນຖານທາງດ້ານກົດໝາຍ, ສອດຄ່ອງ ກັບ ຫຼັກນິຕິສາດ ແລະ ສາມາດນຳໄປປະຕິບັດໄດ້ໃນພາກຕົວຈິງ ຢ່າງມີປະສິດທິຜົນ.
ໃນໂອກາດດັ່ງກ່າວ, ທ່ານ ຄຳເພັດ ສົມວໍລະຈິດ ໄດ້ກ່າວເປີດກອງປະຊຸມ ໂດຍເນັ້ນໜັກກວ່າ: ການແລກປ່ຽນຄໍາເຫັນທາງດ້ານກົດໝາຍ ແລະ ການນຳໃຊ້ກົດໝາຍອາຍາ ຕ້ອງຕັ້ງຢູ່ບົນຫຼັກຄວາມຖືກຕ້ອງ ຕາມກົດໝາຍ, ຮັບປະກັນຄວາມເປັນເອກະພາບ, ຄວາມຍຸຕິທຳ ແລະ ບໍ່ຂະຫຍາຍການຮັບຜິດທາງອາຍາເກີນຂອບເຂດທີ່ກົດໝາຍກຳນົດ. ທ່ານ ຍັງໄດ້ຊີ້ນຳໃຫ້ບັນດາຜູ້ແທນສຸມໃສ່ວິເຄາະບັນຫາທີ່ຍັງມີທັດສະນະແຕກຕ່າງກັນຕາມກົດ ໝາຍສາກົນ, ມາດຕາ 31 ຂອງສົນທິສັນຍາກຸງວຽນ ວ່າດ້ວຍກົດໝາຍສົນທິສັນຍາ ປີ 1969 ທີ່ໄດ້ກໍານົດຫຼັກການໃນການຕີຄວາມໝາຍສົນທິສັນຍາໂດຍກົງ, ແຕ່ກໍມີຄຸນຄ່າໃນຖານະກອບວິທີຄິດທາງວິຊາການ ເພື່ອປະກອບການຄົ້ນຄວ້າກົດໝາຍພາຍໃນ ໂດຍອີງໃສ່ຖ້ອຍຄຳ, ເນື້ອໃນ, ຈຸດປະສົງ ຂອງບົດບັນຍັດ, ກົດໝາຍ ທີ່ກ່ຽວຂ້ອງ ແລະ ພຶດຕິກໍາ ຈາກພາກປະຕິບັດ; ພ້ອມທັງ ກຳນົດໃຫ້ແຈ້ງວ່າ ບັນຫາໃດສາມາດສະຫຼຸບໄດ້, ບັນຫາໃດຕ້ອງຄົ້ນຄວ້າຕໍ່ ແລະ ບັນຫາໃດຕ້ອງສະເໜີໃຫ້ອົງການທີ່ມີສິດອຳນາດພິຈາລະນາ.
ໃນການປຶກສາຫາລື, ບັນດາຜູ້ແທນ ແລະ ຜູ້ຊ່ຽວຊານດ້ານກົດໝາຍ ໄດ້ສຸມໃສ່ແລກປ່ຽນທັດສະນະທາງນິຕິສາດ ແລະ ບົດຮຽນຈາກການດຳເນີນຄະດີຕົວຈິງ, ໂດຍເນັ້ນການຈຳແນກຖານະຜົວເມຍ ຕາມກົດໝາຍ ອອກຈາກຂໍ້ເທັດຈິງ ຂອງການຢູ່ກິນຮ່ວມກັນ, ການກຳນົດອົງປະກອບ ແລະ ຫຼັກຖານ ຂອງການງັດແງະ, ລວມທັງ ການພິຈາລະນາຂອບເຂດການນຳໃຊ້ກົດໝາຍ ຕໍ່ຮູບແບບການກະທຳໃໝ່ໃນຍຸກດີຈີຕອນ ໂດຍພ້ອມກັນ ຊອກຫາຄຳຕອບທີ່ມີເຫດຜົນ, ມີຫຼັກຖານຮອງຮັບ ແລະ ບໍ່ຂັດກັບຫຼັກການພື້ນຖານຂອງກົດໝາຍອາຍາ.
ຜົນການປຶກສາຫາລື ຈະໄດ້ຮັບການສັງລວມເປັນພື້ນຖານທາງວິຊາການ ເພື່ອສະເໜີແນວທາງໃນການແກ້ໄຂຢ່າງເໝາະສົມ, ທັງໃນດ້ານການນຳໃຊ້ບົດບັນຍັດທີ່ມີຢູ່, ການສະ ເໜີຕີຄວາມໝາຍຕໍ່ອົງການທີ່ມີສິດອຳນາດ ແລະ ການສຶກສາປັບປຸງກົດໝາຍໃນຕໍ່ໜ້າ. ກອງປະຊຸມຄັ້ງນີ້ເປັນອີກບາດກ້າວສຳຄັນໃນການປະສານ ແລະ ລະດົມຄວາມຮູ້ທາງນິຕິສາດເຂົ້າກັບປະສົບການໃນພາກປະຕິບັດ ແນໃສ່ຍົກສູງຄຸນນະພາບການດຳເນີນຄະດີອາຍາ, ປົກປ້ອງສິດ ແລະ ຜົນປະໂຫຍດອັນຊອບທຳຂອງປະຊາຊົນ ແລະ ສ້າງຄວາມເຊື່ອໝັ້ນຂອງສັງຄົມ ຕໍ່ຂະບວນການຍຸຕິທຳ.
(ຂ່າວ: ອອປສ)
ຄໍາເຫັນ