 |
ໃນວາລະກອງປະຊຸມ, ສະຫາຍ ຄໍານຸທອນ ສູນວິເລີດ ກໍາມະການຄະນະບໍລິຫານງານພັກ ຮອງປະທານກວດກາພັກ ຫົວໜ້າກົມກວດກາ ອົງການໄອຍະການປະຊາຊົນສູງສຸດ ໄດ້ຜ່ານບົດສະຫຼຸບການຈັດຕັ້ງປະຕິບັດວຽກງານກວດກາ ອົງການໄອຍະການປະຊາຊົນ ໄລຍະ 5 ປີ (2021–2025), ກຳນົດທິດທາງແຜນການ 5 ປີ (2026–2030) ຊຶ່ງໄດ້ຍົກໃຫ້ເຫັນຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານກວດກາຜ່ານມາ, ພ້ອມກັນນັ້ນ ຄະນະນໍາ ອົງການໄອຍະການປະຊາຊົນສູງສຸດ ກໍໄດ້ຈັດຕັ້ງເຊື່ອມຊຶມ–ເຜີຍແຜ່ເນື້ອໃນຈິດໃຈ ແລະ ຜົນສຳເລັດຂອງກອງປະຊຸມວຽກງານກວດກາທົ່ວປະເທດ ຄັ້ງທີ V, ມະຕິ ກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງ, ຄຳແນະນຳການຈັດຕັ້ງປະຕິບັດກົດລະບຽບພັກ ສະໄໝທີ XII ກ່ຽວກັບວຽກງານຕິດຕາມ, ກວດກາຂອງພັກ ແລະ ແຜນພັດທະນາວຽກງານກວດກາ 5 ປີ (2026–2030).
ໃນໂອກາດທີ່ໄດ້ເຂົ້າຮ່ວມກອງປະຊຸມທີ່ມີຄວາມໝາຍສຳຄັນນີ້, ສະຫາຍ ວັນໄຊ ພອງສະຫວັນ ໄດ້ໃຫ້ກຽດໂອ້ລົມຕໍ່ກອງປະຊຸມ ແລະ ໄດ້ເນັ້ນໜັກຫຼາຍບັນຫາສໍາຄັນ ເປັນຕົ້ນໄດ້ນໍາເອົາຈິດໃຈ ແລະ ເນື້ອໃນສໍາຄັນຂອງ ບົດໂອ້ລົມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ທີ່ໄດ້ກ່າວຕໍ່ກອງປະຊຸມວຽກງານກວດກາທົ່ວປະເທດ ຄັ້ງທີ V, ໃນວັນທີ 2 ກໍລະກົດ 2026 ທີ່ຫໍປະຊຸມແຫ່ງຊາດ ມາເຊື່ອມຊຶມ–ເຜີຍແຜ່ໃຫ້ກອງປະຊຸມ, ພ້ອມທັງ ໄດ້ໂອ້ລົມຊີ້ນຳ 6 ບັນຫາສຳຄັນ ເພື່ອນຳເອົາຜົນສຳເລັດຂອງກອງປະຊຸມໄປຜັນຂະຫຍາຍສູ່ການປະຕິບັດວຽກງານຕົວຈິງ. ໃນນັ້ນ, ໄດ້ເນັ້ນໜັກການກໍ່ສ້າງພັກ–ພະນັກງານ, ການຍົກສູງຄຸນນະພາບວຽກງານກວດກາ ແລະ ການດຳເນີນຄະດີມີຄວາມໂປ່ງໃສ, ມີຄວາມຍຸຕິທຳ ແລະ ຖືກຕ້ອງຕາມກົດໝາຍ, ການປະສານສົມທົບ ລະຫວ່າງ ບັນດາອົງການ ໃນຂະບວນການຍຸຕິທຳ, ການຜັນຂະຫຍາຍມະຕິຂອງພັກ, ການຮ່ວມມືກັບຕ່າງປະເທດ ແລະ ການປັບປຸງແບບແຜນການນຳພາ. ຄຳໂອ້ລົມດັ່ງກ່າວ ໄດ້ສະແດງເຖິງຄວາມເອົາໃຈໃສ່, ຄວາມເປັນຫ່ວງເປັນໃຍ, ຄວາມສາມັກຄີ ແລະ ການຊີ້ນຳອັນໃກ້ຊິດຕິດແທດຂອງກົມການເມືອງສູນກາງພັກ ຕໍ່ວຽກງານກວດກາ, ວຽກງານໄອຍະການປະຊາຊົນ, ທັງເປັນເຂັມຊີ້ທິດອັນສຳຄັນໃຫ້ອົງການໄອຍະການປະຊາຊົນໃນຂອບເຂດທົ່ວປະເທດ ນຳໄປຜັນຂະຫຍາຍໃຫ້ເກີດຜົນເປັນຮູບປະທຳ.
(ຂ່າວ:ອອປສ)
ຄໍາເຫັນ