 |
ທ່ານ ແສງອາທິດ ພິມເມືອງ ປະທານຄະນະກໍາມະການປົກຄອງເມືອງຈັນທະບູລີ ປະທານ ຄະນະກຳມະການຈັດງານບຸນອອກພັນສາປະວໍຣະນາ ແລະ ບຸນຊ່ວງເຮືອ ທີ່ທ່າວັດຈັນ ເມືອງຈັນທະບູລີ ປະຈໍາປີ 2026 ໄດ້ຖະແຫຼງຂ່າວກ່ຽວກັບການກະກຽມຈັດງານບຸນອອກພັນສາປະວໍຣະນາ ແລະ ບຸນຊ່ວງເຮືອ ທີ່ທ່າວັດຈັນ ເມືອງຈັນທະບູລີ ປະຈໍາປີ 2026 ຕໍ່ສື່ມວນຊົນໃນວັນທີ 14 ຕຸລາຜ່ານມາ ທີ່ ນວ ວ່າ: ບຸນອອກພັນສາປະວໍຣະນາ ແລະ ບຸນຊ່ວງເຮືອ ຊຶ່ງເປັນງານບຸນປະຈໍາຊາດ ທີ່ສືບທອດປະຕິບັດກັນມາໃນທຸກໆປີ. ການຈັດງານບຸນດັ່ງກ່າວກໍເປັນການຮັກສາຮີດຄອງປະເພນີອັນດີງາມຂອງຊາດ, ເປັນການປະກອບສ່ວນດຶງດູດນັກທ່ອງທ່ຽວພາຍໃນ ແລະ ຕ່າງປະເທດ, ເຂົ້າມາທ່ຽວ ນວ, ເປັນການຊຸກຍູ້ສົ່ງເສີມການຜະລິດສິນຄ້າໜຶ່ງເມືອງ ໜຶ່ງຜະລິດຕະພັນ ເພື່ອທົນແທນການນໍາເຂົ້າ ແລະ ເປັນການສົ່ງເສີມການຄ້າ-ຂາຍ ເຮັດໃຫ້ເສດຖະກິດດີຂຶ້ນ.
ງານບຸນໃນປີນີ້ປະກອບມີກິດຈະກຳຕ່າງໆດັ່ງນີ້: ກິດຈະກຳທາງດ້ານສາສະໜາ ແລະ ຮີດຄອງປະເພນີ: ໃນເຊົ້າວັນທີ 20/10/2026 ເວລາ 7:00 ໂມງເຊົ້າ ມີການຄອບໄຂວ່ສະຖານທີ່ສັກສິດ. ເລີ່ມເວລາ 3:00 ໂມງເຊົ້າ ຂອງວັນທີ 26/10/2026 ເປັນຕົ້ນໄປຈະໄດ້ມີພິທີຄື: ເຂດວັດວາອາຣາມ: ເວລາ 3:00 - 4:00 ໂມງເຊົ້າ ພະອາຈານ ມີພິທີສູດອອກພັນສາປະວໍຣະນາ, ເວລາ 7:00 ໂມງເຊົ້າ ພິທີຕັກບາດຖວາຍສັງຄະທານຕາມປະເພນີລາວ, ເວລາ 19:00 - 19:40 ໂມງແລງ ມີພິທີວຽນທຽນ, ໄຫຼເຮືອໄຟນໍ້າ; ເຂດສວນເຈົ້າອານຸວົງ ແລະ ຜາມໄຊ (ທ່າວັດຈັນ): ເວລາ 20:00 ໂມງເປັນຕົ້ນໄປມີການຄົບງັນ, ຈຸດບັ້ງໄຟພຸ-ໄຟດອກ ແລະ ບັ້ງໄຟຕະໄລ, ມີການສະແດງສິລະປະວັນນະຄະດີ; ເຂດແຄມຂອງທ່າວັດຈັນ: ມີການໄຫຼເຮືອໄຟ, ລອຍກະໂທງ ແລະ ບໍ່ອະນຸຍາດໃຫ້ອອກໄປໄຫຼຢູ່ກາງຂອງ.
ກິດຈະກຳການຊ່ວງເຮືອ: ໃນວັນທີ 27/10/2026 ເວລາ 8:30 ໂມງເຊົ້າເປັນຕົ້ນໄປເລີ່ມຈັດການແຂ່ງຂັນຊ່ວງເຮືອ 30 ສີພາຍ (ຊາຍ) ແລະ ເຮືອ 12 ສີພາຍ (ຍິງ-ຊາຍ) ລະຫວ່າງອົງ ການປົກຄອງເມືອງ ແລະ ບັນດາ 3 ຕາແສງ, ເວລາ 16:00 ໂມງມອບລາງວັນເຮືອຊ່ວງ. ສໍາລັບກິດຈະກຳວາງສະແດງ ແລະ ຊື້-ຂາຍສິນຄ້າ: ກຳນົດແຕ່ວັນທີ 23 - 27/10/2026 (ກໍານົດເວລາ 5 ວັນ): ມີການວາງສະແດງ ແລະ ຂາຍສິນຄ້າຢູ່ໃນຂອບເຂດສວນເຈົ້າອານຸວົງ, ຢູ່ຕາມຂອບເສັ້ນທາງເຈົ້າຟ້າງຸ່ມ ແຕ່ສາມແຍກປາກປ່າສັກ ລົງຮອດສາມແຍກທະນາຄານການຄ້າຕ່າງປະເທດລາວ ມະຫາຊົນ, ກຳນົດໃຫ້ມີການຊື້-ຂາຍເຂົ້າຫຼາມ, ປີ້ງໄກ່, ທາງຄົນຍ່າງເບື້ອງເສັ້ນທາງແຕ່ວົງວຽນເສັ້ນແຄມຂອງລົງມາຮອດໜ້າຫໍປະດິດສະຖານຮູບປັ້ນເຈົ້າອານຸວົງ, ສີ່ແຍກໄຟແດງວັດອິນແປງເສັ້ນທາງເສດຖາທິລາດ ໄປຫາສີ່ແຍກໄຟແດງວັດສີສະເກດ ກຳນົດເປັນບ່ອນຝາກລົດຈັກ ແລະ ລົດໃຫຍ່ ບາງຈຸດທີ່ສາມາດນໍາໃຊ້ໄດ້. ສະເພາະເສັ້ນທາງເບື້ອງບ້ານວັດຈັນ, ມີໄຊ, ຊຽງຍືນ ແລະ ບ້ານສີຫອມ ແມ່ນກໍານົດໃຫ້ຂາຍເຂົ້າຫຼາມ, ປີ້ງໄກ່, ມີການຕັ້ງຮ້ານຂາຍເຄື່ອງ, ຂາຍສິນຄ້າ ແລະ ຜະລິດຕະພັນ. ສໍາລັບການຕັ້ງຮ້ານຂາຍເຄື່ອງຕ່າງໆທັງເສັ້ນທາງເບື້ອງນອກ ແລະ ໃນຂອບເຂດສວນເຈົ້າອານຸວົງແມ່ນໃຫ້ຕັ້ງຮ້ານຢ່າງມີຄວາມເປັນລະບຽບສວຍງາມ; ກິດຈະກຳປ້ອງກັນຊາດ-ປ້ອງກັນຄວາມສະຫງົບ: ພວກເຮົາໄດ້ຖືສໍາຄັນ ຕໍ່ກັບວຽກງານປ້ອງກັນຄວາມສະຫງົບປອດໄພຮອບດ້ານ ໂດຍໃຫ້ມີການຈັດຕັ້ງການປ້ອງກັນເວນຍາມ ແລະ ປະຈຳການຕະຫຼອດ 24 ຊົ່ວໂມງ ໂດຍນຳໃຊ້ກຳລັງຂອງເມືອງຈັນທະບູລີ ເປັນຕົ້ນຕໍຢູ່ຕາມບ້ານ, ສຳນັກງານ, ອົງການ ທົ່ວເມືອງໃຫ້ມີຄວາມສະຫງົບປອດໄພ 100% ຊຶ່ງກຳນົດຈຸດປ້ອງກັນ 18 ຈຸດ. ໃນນີ້, ຈຸດປ້ອງກັນວົງໃນ 3 ຈຸດ ແລະ ວົງນອກ 15 ຈຸດ ແລະ ປ້ອມແຈ້ງເຫດ (1191) 3 ຈຸດ, ມີສູນກ້ອງວົງຈອນ ເພື່ອຕິດຕາມຢູ່ຫ້ອງການສວນເຈົ້າອານຸວົງ ແລະ ຜາມກຳມະການ, ມີກຳລັງປ້ອງກັນທັງໝົດມີ 1,002 ຄົນ. ໃນນີ້, ກໍາລັງຊາວໜຸ່ມ 289 ຄົນ ລວມມີກຳລັງ ປກສ-ປກຊ ນະ ຄອນຫຼວງ, ປກສ-ກປຊ ເມືອງຈັນທະບູລີ, ກຳລັງ ປກສ ບ້ານ 30 ບ້ານ ແລະ ກຳລັງຊາວໜຸ່ມຂອງເມືອງ ເພື່ອເຂົ້າຮ່ວມໃນການປະຕິບັດໜ້າທີ່ກວດກາ, ປ້ອງກັນເວນຍາມຕາມທາງຮ່ອມທາງຊອຍ ແລະ ຕາມຈຸດຕ່າງໆ ທີ່ໄດ້ກຳນົດໄວ້. ພ້ອມນັ້ນ, ກິດຈະກໍາວຽກງານການອະນາໄມທໍາຄວາມສະອາດ; ວຽກງານຮັກສາສຸຂະພາບ; ວຽກງານປະຊາສໍາພັນ ກໍມີຄວາມພ້ອມຮອບ ດ້ານ.
 |
ສໍາລັບບັນດາຂໍ້ຫ້າມມີດັ່ງນີ້: ຫ້າມບໍ່ໃຫ້ມີການໂຄສະນາທຸກຮູບແບບທີ່ຜິດຕໍ່ກົດໝາຍຂອງ ສປປ ລາວ; ຫ້າມຂາຍ ຫຼື ນໍາເອົາອາວຸດທຸກປະເພດລວມທັງພ້າ, ມີດ, ງ້າວ, ໜ້າເກັກ, ກະຕູນ, ສະໜັບມື, ໂຄມໄຟລອຍ ແລະ ປະເພດສິ່ງຂອງມີຄົມຕ່າງໆ ເຂົ້າໄປໃນງານໂດຍເດັດຂາດ ເວັ້ນເສຍແຕ່ ເຈົ້າໜ້າທີ່ ທີ່ໄດ້ຮັບອານຸຍາດ; ຫ້າມນໍາເອົາຢາເສບຕິດ, ທາດເບື່ອ, ສານເຄມີທີ່ອອກລິດທາງຈິດປະ ສາດທຸກຊະນິດ, ສິ່ງທີ່ພາໃຫ້ເກີດສຽງດັງເກີນຂອບເຂດ, ບັ້ງກະໂພກເຂົ້າມາຈຸດ ແລະ ວາງຂາຍພາຍໃນງານຢ່າງເດັດຂາດ; ຫ້າມນໍາເອົາຜະລິດຕະພັນທີ່ລອກແບບສິ້ນລາວ ຫຼື ເຄື່ອງນຸ່ງລາວນໍາເອົາມາຂາຍ-ຈໍາໜ່າຍ ພາຍໃນງານເດັດຂາດ; ຫ້າມວາງ ແລະ ຂາຍສິນຄ້າ ຢູ່ນອກບໍລິເວນຮ້ານເກີນຂອບເຂດ ທີ່ຄະນະກຳມະການຈັດງານ ໄດ້ກຳນົດໃຫ້; ຫ້າມນໍາໃຊ້ເຄື່ອງຂະຫຍາຍສຽງໂຄສະນາສິນຄ້າພາຍໃນງານບຸນ, ນອກຈາກໄດ້ຮັບອະນຸຍາດຈາກຄະນະຮັບຜິດຊອບຈັດງານບຸນ; ຫ້າມຂາຍ ແລະ ນໍາເອົາຜະລິດຕະພັນວັດທະນະທໍາລາມົກ, ຮູບພາບລາມົກຕ່າງໆເຂົ້າມາວາງຂາຍຢູ່ໃນງານຢ່າງເດັດ ຂາດ; ຫ້າມຫຼິ້ນການພະນັນທຸກປະເພດ ແລະ ອາລະວາດຕີກັນ ຢ່າງເດັດຂາດ; ຫ້າມຂາຍເຄື່ອງຊະຊາຍໂດຍບໍ່ໄດ້ຮັບອານຸຍາດ ຈາກຄະນະກຳມະການຈັດງານ; ຫ້າມດື່ມສິ່ງມຶນເມົາເກີນຂອບເຂດ, ຖ້າຜູ້ໃດລະເມີດຈະຖືກເຈົ້າໜ້າທີ່ກ່າວເຕືອນ ຫຼື ນໍາຕົວໄປພັກຜ່ອນໄວ້ກ່ອນ; ຫ້າມບຸກຄົນ, ນິຕິບຸກຄົນ, ສຳນັກງານອົງການປົກຄອງບ້ານກີດຂວາງການຈັດສັນສະຖານທີ່ວາງສະແດງຂາຍສິນຄ້າຂອງຄະນະກຳມະການຈັດງານ; ຫ້າມຕອກເຫຼັກ ຫຼື ສິ່ງຂອງຕ່າງໆໃສ່ພື້ນທີ່ຢ່າງເດັດຂາດ; ຫ້າມແຈກຢາຍ ແຜ່ນພັບ ຫຼື ແຜ່ນເຈ້ຍໂຄສະນາສິນຄ້າຕ່າງໆ ຢູ່ພາຍໃນງານບຸນ; ຫ້າມຜູ້ສໍາປະທານສະຖານທີ່ງານບຸນ ມອບສະຖານທີ່ໃຫ້ແກ່ຜູ້ສຳປະທານອື່ນຈັບຈອງຕໍ່ເດັດຂາດ; ຫ້າມມີການໂຄສະນາສິນຄ້າ ໂດຍການເຕັ້ນໂຊນາງສາວ ແລະ ບໍ່ໃຫ້ມີມິນິຄອນເສີດ. ພ້ອມນີ້, ພວກເຮົາໄດ້ແຕ່ງຕັ້ງຈຸປະຈຳການໃນແຕ່ລະວັນ ໂດຍເລີ່ມແຕ່ວັນທີ 25-27/10/2026 ປະຈໍາຢູ່ຜາມກໍາມະການ ເພື່ອບັນຊາ, ຕິດຕາມ, ກວດກາເລີ່ມແຕ່ເວລາ 8:30 ໂມງ ແລະ ມີການຮັບສ່ອງແສງລາຍງານປະຈໍນທຸກໆວັນ ຊຶ່ງກໍານົດເອົາເວລາ 21:30 ໂມງ ຢູ່ຜາມກໍາມະການ.
ປະທານຄະນະກໍາມະການປົກຄອງເມືອງຈັນທະບູລີ ຍັງຮຽກຮ້ອງມາຍັງບັນດາທ່ານທຸກພາກ ສ່ວນສັງຄົມ, ຕະຫຼອດຮອດພະນັກງານ, ທະຫານ, ຕຳຫຼວດ, ປະຊາຊົນບັນດາເຜົ່າ ທົ່ວ ນວ ຈົ່ງໄດ້ພ້ອມກັນຮ່ວມແຮງຮ່ວມໃຈເປັນເຈົ້າການ ປະກອບສ່ວນ ແລະ ເຂົ້າຮ່ວມງານບຸນອອກພັນສາປະວໍຣະນາ ແລະ ບຸນຊ່ວງເຮືອ ທີ່ທ່າວັດຈັນ ເມືອງຈັນທະບູລີ ປະຈຳປີ 2026 ດ້ວຍບັນຍາກາດເບີກບານມ່ວນຊື່ນ, ມີສະຕິລະວັງຕົວ, ເປັນເຈົ້າການໃນການປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຮັກສາອະນາໄມຄວາມສະອາດຊ່ວຍກັນໃນງານບຸນ.
(ຂ່າວ-ພາບ: ວັນເພັງ)
ຄໍາເຫັນ