 |
ທ່ານເຫຼັກໄຫຼສີວິໄລໄດ້ຍົກໃຫ້ເຫັນເຫດຜົນແລະຄວາມຈໍາເປັນໃນການປັບປຸງຮ່າງກົດໝາຍວ່າດ້ວຍການບິນພົນລະເຮືອນເພື່ອໃຫ້ມີເນື້ອໃນຄົບຖ້ວນ ສອດຄ່ອງກັບການຂະຫຍາຍຕົວຂອງເສດຖະກິດ-ສັງຄົມໃນປັດຈຸບັນ, ເຖິງແມ່ນວ່າໃນໄລຍະຜ່ານມາລະບຽບຫຼັກການທີ່ເປັນບ່ອນອີງໃນການຄຸ້ມຄອງຂອງລັດເຫັນວ່ານິຕິກຳຍັງບໍ່ທັນຮັດກຸມບໍ່ຈະແຈ້ງເທົ່າທີ່ຄວນ, ການຄຸ້ມຄອງທາງດ້ານການບິນຕິດພັນກັບຫຼາຍຂະແໜງການເຮັດໃຫ້ການຈັດຕັ້ງປະຕິບັດນິຕິກຳທີ່ວາງອອກຍັງຈຳກັດແລະມີໜ້ອຍ. ສະນັ້ນ, ຈຶ່ງໄດ້ລວບລວມເອົາບັນຫາ, ເນື້ອໃນຂອງບັນດານິຕິກຳທີ່ນໍາໃຊ້ຜ່ານມາເພື່ອກຳນົດພາລະບົດບາດ, ສິດແລະໜ້າທີ່ຂອງຂະແໜງການທີ່ກ່ຽວຂ້ອງເຂົ້າໃນຮ່າງກົດໝາຍສະບັບນີ້ໃຫ້ຊັດເຈນເພື່ອເຮັດໃຫ້ການຄຸ້ມຄອງມະຫາພາກມີປະສິດທິພາບປະສິດທິຜົນສູງພ້ອມທັງຫັນໄປສູ່ການຄຸ້ມຄອງລະບົບທີ່ທັນສະໄໝ, ເພື່ອປັບນິຕິກຳທີ່ຍັງໃຊ້ໃນປັດຈຸບັນໃຫ້ສອດຄ່ອງກັບກົດໝາຍແລະນິຕິກຳອື່ນທີ່ກ່ຽວຂ້ອງ, ທັງເປັນເຄື່ອງມືໃນການຄຸ້ມຄອງຂອງລັດໃຫ້ຮັດກຸມແລະເປັນລະບົບໃນການຄຸ້ມຄອງມະຫາພາກ, ການດໍາເນີນທຸລະກິດກ່ຽວກັບການບິນພົນລະເຮືອນໃຫ້ທັນສະໄໝ, ມີຄວາມປອດໄພ, ໂປ່ງໃສສາມາດຕິດຕາມກວດກາໄດ້ຢ່າງທັນການພ້ອມທັງປົກປັກຮັກສາຜົນປະໂຫຍດລວມຂອງຊາດຕໍ່ຜູ້ດຳເນີນທຸລະກິດປະກອບສ່ວນເຂົ້າໃນການສ້າງຖານລາຍຮັບເຂົ້າງົບປະມານແຫ່ງຊາດ.ດັ່ງນັ້ນ,ຈຶ່ງມີຄວາມຈຳເປັນຕ້ອງມີກົດໝາຍທີ່ມີເນື້ອໃນຄົບຖ້ວນ, ຮັດກຸມແທດເໝາະກັບສະພາບການສາມາດຈັດຕັ້ງປະຕິບັດໄດ້.
ໂຄງປະກອບຂອງຮ່າງກົດໝາຍວ່າດ້ວຍການບິນພົນລະເຮືອນສະບັບເກົ່າປີ 2018 ປະກອບມີ 18 ພາກ 27 ໝວດແລະ 174 ມາດຕາພາຍຫຼັງທີ່ປັບປຸງລ່າສຸດໃນປີ 2026 ປະກອບມີ 16 ພາກ, 35 ໝວດແລະ 189 ມາດຕາ, ຮັກສາເດີມ 28 ມາດຕາ, ປັບປຸງຄືນ 126 ມາດຕາແລະເພີ່ມເຂົ້າໃໝ່ 35 ມາດຕາ.
ພາຍຫຼັງກົດໝາຍສະບັບນີ້ຖືກຮັບຮອງແລະປະກາດໃຊ້ແລ້ວຈະເປັນບ່ອນອີງທາງດ້ານນິຕິກຳຂອງວຽກງານການບິນພົນລະເຮືອນຂອງສປປລາວທີ່ຈະນໍາໃຊ້ເຂົ້າໃນການອ້າງອີງຕໍ່ການປະຕິບັດຕາມສົນທິສັນຍາສາກົນທີ່ສປປລາວເປັນພາຄີໂດຍສະເພາະການແກ້ໄຂຂໍ້ຄົງຄ້າງແລະຮອງຮັບການມາກວດສອບ-ກວດກາຄວາມປອດໄພການບິນແລະປ້ອງກັນຄວາມປອດໄພການບິນຮອບດ້ານຂອງອົງການການບິນພົນລະເຮືອນສາກົນ (ICAO) ໃນໄວໆນີ້.ເພື່ອຜັນຂະຫຍາຍວິໄສທັດຮອດປີ 2030 ຍຸດທະສາດການພັດທະນາການບິນພົນລະເຮືອນຮອດປີ 2030 ທີ່ໄດ້ກຳນົດເປົ້າໝາຍລວມທີ່ຕ້ອງສູ້ຊົນປະຕິບັດໃຫ້ສໍາເລັດຊຶ່ງໃນນັ້ນວຽກຈຸດສຸມທີ່ເປັນບຸລິມະສິດຕົ້ນຕໍທີ່ຕ້ອງໄດ້ຈັດຕັ້ງປະຕິບັດໂດຍສະເພາະການປັບປຸງກົດໝາຍແລະລະບຽບການໃຫ້ສອດຄ່ອງຕາມມາດຕະຖານແລະຄໍາເແນະນໍາຂອງອົງການບິນພົນລະເຮືອນສາກົນເພື່ອນໍາໃຊ້ເປັນເຄື່ອງມືໃນການຄຸ້ມຄອງມະຫາພາກດ້ານການບິນພົນລະເຮືອນໃຫ້ມີປະສິດທິພາບສູງ. ຄຽງຄູ່ກັນນີ້, ເພື່ອຍົກສູງບົດບາດຂອງກົມການບິນພົນລະເຮືອນໃຫ້ເປັນເຈົ້າໜ້າທີ່ທີ່ມີສິດແລະໜ້າທີ່ໃນການຄຸ້ມຄອງມະຫາພາກດ້ານການບິນພົນລະເຮືອນໃຫ້ກາຍເປັນຮູບປະທຳໂດຍນຳໃຊ້ລະບົບກົດໝາຍແລະລະບຽບການຢ່າງເຂັ້ມງວດພ້ອມດ້ວຍງົບປະມານພຽງພໍແລະບຸກຄະລາກອນດ້ານວິຊາສະເພາະການບິນໃຫ້ເທດເໝາະກັບພາລະບົດບາດຂອງຕົນເພື່ອຮັບປະກັນການຈັດຕັ້ງປະຕິບັດຢ່າງມີປະສິດທິຜົນ; ເພື່ອເປັນເຄື່ອງມືທີ່ມີຄວາມຮັດກຸມແລະຄົບຖ້ວນກວ່າເກົ່າໃນການຄຸ້ມຄອງລັດດ້ວຍກົດໝາຍ, ພ້ອມທັງສ້າງເງື່ອນໄຂໃນການພັດທະນາເສດຖະກິດສັງຄົມໃຫ້ດີຂຶ້ນ; ເພື່ອຮັບປະກັນການຈັດຕັ້ງປະຕິບັດການຄຸ້ມຄອງວຽກງານຂະແໜງການບິນພົນລະເຮືອນໃຫ້ມີຄວາມຄ່ອງຕົວ, ສະດວກ, ປອດໄພແລະເປັນລະບຽບຮຽບຮ້ອຍໃນສັງຄົມໃຫ້ຖືກຕ້ອງຕາມລະບຽບກົດໝາຍ, ປົກປ້ອງຜູ້ຊົມໃຊ້, ຊັບສິນແລະສ້າງໂອກາດໃນການຍາດແຍ່ງການລົງທຶນຂອງຕ່າງປະເທດໃນອະນາຄົດເພື່ອເຮັດໃຫ້ການຄຸ້ມຄອງ, ຕິດຕາມ, ກວດກາແລະການແບ່ງຄວາມຮັບຜິດຊອບກ່ຽວກັບວຽກງານຂະແໜງການບິນພົນລະເຮືອນລະຫວ່າງຂັ້ນສູນກາງ, ທ້ອງຖິ່ນແລະຂະແໜງການທີ່ກ່ຽວຂ້ອງມີຄວາມເປັນເອກະພາບໃນຂອບເຂດທົ່ວປະເທດເພື່ອເປັນເຄື່ອງມືທີ່ສໍາຄັນ, ຮັດກຸມແລະຄົບຖ້ວນໃນການຄຸ້ມຄອງລັດດ້ວຍກົດໝາຍປະກອບສ່ວນໃຫ້ການພັດທະນາເສດຖະກິດ-ສັງຄົມຂອງຊາດ.ຂ່າວ-ພາບ: ບຸນອູ້ມ
ຄໍາເຫັນ