ທ່ານ ພົນໂທ ວົງສອນ ອິນປານພິມ ໄດ້ຍົກໃຫ້ເຫັນຄວາມສໍາຄັນ, ເຫດຜົນ ແລະ ຄວາມຈໍາເປັນໃນການປັບປຸງກົດໝາຍ.ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວເປັນຕົ້ນການປັບປຸງກໍ່ສ້າງກົມກອງເຫຼົ່າຮົບ ທີ່ກອງທັບຂອງພວກເຮົາພວມຈັດຕັ້ງປະຕິບັດຢູ່ປັດຈຸບັນ ຊຶ່ງກົດໝາຍປີ 2018 ບໍ່ໄດ້ກໍານົດໄວ້;ການກໍານົດເນື້ອໃນບາງມາດຕາຂອງກົດໝາຍຍັງບໍ່ທັນຈະແຈ້ງ, ຮັດກຸມ, ຄົບຖ້ວນ, ຍັງມີບາງບັນຫາບໍ່ທັນໄດ້ກຳນົດໄວ້ໃນກົດໝາຍ ແລະ ການກໍານົດເນື້ອໃນບາງອັນບໍ່ທັນມີລັກສະນະຊຸກຍູ້, ສົ່ງເສີມ ໃຫ້ນາຍທະຫານມີຄວາມຫ້າວຫັນໃນການປະຕິບັດໜ້າທີ່ເປັນຕົ້ນອາຍຸກະສຽນປະດັບຊັ້ນ, ເລື່ອນຊັ້ນ, ປະດັບທຽບຊັ້ນ, ເລື່ອນທຽບຊັ້ນໃຫ້ນາຍທະຫານແຕ່ລະຂັ້ນ;ການປະດັບຊັ້ນ ແລະ ປະດັບທຽບຊັ້ນເປັນນາຍທະຫານ;ເງື່ອນໄຂການເລື່ອນຊັ້ນຂອງນາຍທະຫານ;ການກໍານົດຊັ້ນໃສ່ຕໍາແໜ່ງບັນຊາຂອງນາຍທະຫານ;ອາຍຸກະສຽນຮັບບໍານານ;ການຍົກຂັ້ນເງິນເດືອນ;ການເສຍອົງຄະ;ການບັນຊາລະບົບສອງຫົວໜ້າ.ບັນຫາອື່ນໆ ທີ່ຕິດພັນກັບການປະຕິບັດນະໂຍບາຍຂອງນາຍທະຫານ.ຈາກເຫດຜົນທີ່ກ່າວມານັ້ນ ຈຶ່ງເຫັນວ່າມີຄວາມຈຳເປັນຕ້ອງໄດ້ປັບປຸງກົດໝາຍວ່າດ້ວຍນາຍທະຫານກອງທັບປະຊາຊົນລາວ ສະບັບປີ 2018 ໃຫ້ມີເນື້ອໃນລະອຽດ, ຈະແຈ້ງ, ຄົບຖ້ວນ, ຊັດເຈນ ແລະ ສົມບູນຍິ່ງໆຂຶ້ນ ໂດຍນໍາເອົາບັນຫາທີ່ໄດ້ຈາກການປະເມີນມາເປັນພື້ນຖານໃນການປັບປຸງກົດໝາຍ.
ທ່ານ ພົນໂທ ວົງສອນ ອິນປານພິມ ກ່າວຕື່ມວ່າ: ພາຍຫຼັງກົດໝາຍສະບັບນີ້ຖືກຮັບຮອງແລະປະກາດໃຊ້ແລ້ວຄາດວ່າຜົນໄດ້ຮັບຈະເປັນເຄື່ອງມືອັນສໍາຄັນໃຫ້ລັດໃນການຄຸ້ມຄອງວຽກງານນາຍທະຫານແບບລວມສູນແລະເປັນບ່ອນອີງໃຫ້ກະຊວງປ້ອງກັນປະເທດໃນການຄຸ້ມຄອງ, ນໍາພາບັນຊາ, ສ້າງນາຍທະຫານ ແລະ ການປະຕິບັດນະໂຍບາຍຕໍ່ນາຍທະຫານ ເຮັດໃຫ້ນາຍທະຫານມີຄວາມໜັກແໜ້ນທາງດ້ານການເມືອງແນວຄິດ, ມີຄວາມເຂັ້ມແຂງ ແລະ ເຮັດສຳເລັດໜ້າທີ່ ທີ່ໄດ້ຮັບມອບໝາຍ; ເປັນບ່ອນອີງໃຫ້ບັນດາກະຊວງ, ອົງການຈັດຕັ້ງຕ່າງໆ ແລະ ອົງການປົກຄອງທ້ອງຖິ່ນໃນການຄຸ້ມຄອງນາຍທະຫານ ແລະ ສ້າງເງື່ອນໄຂອໍານວຍຄວາມສະດວກໃຫ້ນາຍທະຫານເຮັດສຳເລັດໜ້າທີ່, ຊ່ວຍເຫຼື່ອເບິ່ງແຍງທາງດ້ານວັດຖຸຈິດໃຈ ແລະ ຊີວິດການເປັນຢູ່ຂອງນາຍທະຫານ ແລະ ຄອບຄົວ ເປັນຕົ້ນຄອບຄົວນາຍທະຫານຜູ້ເສຍສະຫຼະຊີວິດ, ຜູ້ເສຍອົງຄະ, ວິລະຊົນແຫ່ງຊາດ, ນັກຮົບແຂ່ງຂັນ, ພະນັກງານບຳນານ ແລະ ຄອບຄົວນາຍທະຫານຜູ້ທີ່ກຳລັງປະຕິບັດໜ້າທີ່ຢູ່ເຂດຫ່າງໄກຊອກຫຼີກ, ທຸລະກັນດານ; ສ້າງສະຕິຕື່ນຕົວໃຫ້ນາຍທະຫານຕໍ່ການຈັດຕັ້ງ, ມີລະບຽບວິໄນເຂັ້ມງວດ ແລະ ເຮັດສຳເລັດໜ້າທີ່ການເມືອງຂອງກອງທັບທີ່ພັກ-ລັດ ມອບໝາຍໃຫ້; ກົດໝາຍມີເນື້ອໃນຄົບຖ້ວນ, ຊັດເຈນ, ຮັດກຸມ ແລະ ສອດຄ່ອງກັບສະພາບການປັບປຸງກໍ່ສ້າງກອງທັບໄລຍະໃໝ່.ໂຄງຮ່າງຂອງກົດໝາຍວ່າດ້ວຍນາຍທະຫານກອງທັບປະຊາຊົນລາວ ປີ 2018 ປະກອບມີ V ພາກ, 8 ໝວດ, 50 ມາດຕາ, ກົດໝາຍວ່າດ້ວຍນາຍທະຫານກອງທັບປະຊາຊົນລາວ ສະບັບປັບປຸງປະກອບມີ VIII ພາກ, 9 ໝວດ ແລະ 59 ມາດຕາ. ໃນນີ້, ເພີ່ມພາກໃໝ່ III ພາກ, ເພີ່ມໝວດໃໝ່ 4 ໝວດ, ຂຽນໃໝ່ 15 ມາດຕາ, ປັບປຸງ 38 ມາດຕາ ແລະ ຮັກສາໄວ້ 6 ມາດຕາ.(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ