ສສຊ ນວ ສະເໜີ 4 ຈຸດສຳຄັນເພື່ອເຮັດໃຫ້ວຽກງານ ສພຊ ຫັນເປັນທັນສະໄໝ

ທ່ານ ທະນົງສິດ ເມືອງຈັນ ໄດ້ປະກອບຄຳເຫັນໂດຍເນັ້ນໃສ່4 ຈຸດສຳຄັນຄື: 1. ເຫັນດີກັບທິດທາງການຫັນເປັນທັນສະໄໝຂອງສະພາແຫ່ງຊາດ. ສະເໜີໃຫ້ເລັ່ງໃສ່ການນຳໃຊ້ລະບົບG-Chatຫຼື ຊ່ອງທາງອີເລັກໂທຣນິກອື່ນໆ ເພື່ອຮັບ-ສົ່ງຂໍ້ມູນ ແລະ ເອກະສານຕ່າງໆ ໃຫ້ບັນດາສສຊ ໃຫ້ມີຄວາມວ່ອງໄວ, ທັນເວລາ ແລະ ມີຄວາມໂປ່ງໃສກວ່າເກົ່າ, 2. ດ້ານການຕິດຕາມກວດກາ ແລະ ການຈັດຕັ້ງປະຕິບັດກົດໝາຍ. ເນື່ອງຈາກໄລຍະຜ່ານມາ, ການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ມະຕິຂອງສະພາ ຢູ່ບາງຂະແໜງການຍັງບໍ່ທັນເຂັ້ມງວດ ແລະ ຂາດການປະເມີນຜົນທີ່ຊັດເຈນ. ດັ່ງນັ້ນ, ສະເໜີໃຫ້ເອົາໃຈໃສ່ຕິດຕາມກວດກາ ການຈັດຕັ້ງປະຕິບັດໃຫ້ມີປະສິດທິພາບ ແລະ ປະສິດທິຜົນຫຼາຍຂຶ້ນ, ກຳນົດກົນໄກການແກ້ໄຂຄຳສະເໜີຂອງປະຊາຊົນໃຫ້ມີຄວາມຊັດເຈນ ໂດຍສະເພາະຄຳສະເໜີທີ່ສສຊ ໄດ້ຮັບໃນເວລາທີ່ລົງພົບປະຜູ້ມີສິດເລືອກຕັ້ງ ແລະ ຄຳສະເໜີຜ່ານສາຍດ່ວນສະພາແຫ່ງຊາດ. ຕ້ອງມີການລາຍງານຜົນການແກ້ໄຂ ໃນກອງປະຊຸມສະພາແຕ່ລະຄັ້ງໃຫ້ທັນຕາມກຳນົດເວລາ, 3. ດ້ານການຈັດສັນງົບປະມານ ສະເໜີໃຫ້ພິຈາລະນາຈັດສັນງົບປະມານໃຫ້ພຽງພໍກັບສະພາບຄວາມເປັນຈິງ ໂດຍສະເພາະແມ່ນງົບປະມານສຳລັບວຽກງານຕິດຕາມກວດກາ ແລະ ງົບປະມານໃນການເຜີຍແຜ່ຜົນສຳເລັດຂອງກອງປະຊຸມສະພາ. ປັດຈຸບັນ, ການເຜີຍແຜ່ຂໍ້ມູນຂ່າວສານຍັງບໍ່ທັນເລິກເຊິ່ງ ແລະ ທົ່ວເຖິງ ເນື່ອງດ້ານງົບປະມານຍັງຈຳກັດ, 4. ດ້ານການພັດທະນາບຸກຄະລາກອນເນື່ອງຈາກສະມາຊິກສະພາປະຊາຊົນຂັ້ນແຂວງ/ນະຄອນຫຼວງ, ພະນັກງານຊ່ວຍວຽກຂັ້ນແຂວງ, ນະຄອນຫຼວງ ແລະ ຂັ້ນເມືອງສ່ວນໃຫຍ່ແມ່ນຜູ້ຮັບຜິດຊອບໃໝ່ ແລະ ຍັງຂາດປະສົບການ. ດັ່ງນັ້ນ, ສະເໜີໃຫ້ມີແຜນສ້າງຄວາມເຂັ້ມແຂງໃຫ້ບຸກຄະລາກອນຢ່າງຕໍ່ເນື່ອງ, ຈັດຊຸດຝຶກອົບຮົມ, ສຳມະນາທັງໄລຍະສັ້ນ ແລະ ໄລຍະຍາວ ເພື່ອຍົກສູງຄວາມຮູ້ທາງດ້ານທິດສະດີ ແລະ ວິຊາສະເພາະ, ພິຈາລະນາຈັດຝຶກອົບຮົມທັງພາຍໃນ ແລະ ຕ່າງປະເທດຕາມເງື່ອນໄຂທີ່ເໝາະສົມ ເພື່ອແລກປ່ຽນບົດຮຽນ. ຂ່າວ: ພູວັນ, ພາບ: ບຸນຕອມ