ໃນກອງປະຊຸມ, ສະຫາຍ ຄໍາພັນ ເຜີຍຍະວົງ ໄດ້ກ່າວເປີດກອງປະຊຸມ ແລະ ເຜີຍແຜ່ເນື້ອໃນສຳຄັນຂອງ ມະຕິເລກທີ 64/ກມສພ ລົງວັນທີ 24 ກໍລະກົດ 2026 ວ່າດ້ວຍວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ ຊຶ່ງທ່ານໄດ້ເນັ້ນໃຫ້ເຫັນວ່າ: ກອງປະຊຸມຄັ້ງນີ້ມີຄວາມໝາຍຄວາມສຳຄັນຢ່າງຍິ່ງ ໃນການຈັດຕັ້ງຜັນຂະຫຍາຍມະຕິຂອງກອງປະຊຸມໃຫຍ່ ຄັ້ງທີ XII ຂອງພັກ ເພື່ອສ້າງ ແລະ ຄຸ້ມຄອງແຜນກຳນົດພະນັກງານນຳພາ-ຄຸ້ມຄອງ, ເພີ່ມທະວີຄວາມຮູ້-ຄວາມສາມາດ ແລະ ຕອບສະໜອງຕາມຄວາມຮຽກຮ້ອງຕ້ອງການຂອງການປະຕິບັດວຽກງານໃນໄລຍະໃໝ່.
ຈຸດປະສົງ ມະຕິຂອງກົມການເມືອງ ເພື່ອຄາດຄະເນເປົ້າໝາຍ, ຈັດວາງ, ສັບຊ້ອນ ຕໍາ ແໜ່ງພະນັກງານນໍາພາ-ຄຸ້ມຄອງ ແຕ່ລະຂັ້ນ, ແຕ່ລະຂະແໜງການ ຢ່າງພຽງພໍ ແລະ ມີຄຸນນະພາບ ແນໃສ່ຮັບປະກັນລັກສະນະສືບທອດ ປ່ຽນແທນຕໍ່ເນື່ອງໃນແຕ່ລະສະໄໝ ກອງປະຊຸມໃຫຍ່ຂອງພັກແຕ່ລະຂັ້ນ ເພາະວ່າ ແມ່ນວຽກງານທີ່ສໍາຄັນຕົ້ນຕໍ ໃນວຽກງານພະນັກງານຂອງພັກ ເພື່ອເຮັດໃຫ້ທຸກວຽກງານດໍາເນີນໄປຢ່າງຖືກຕ້ອງຕາມຂັ້ນຕອນ ລະບຽບແບບແຜນ ແລະ ສາມາດຕອບສະໜອງໜ້າທີ່ການເມືອງຂອງພັກ-ລັດໃນແຕ່ລະສະໄໝ.
 |
ສະຫາຍ ວັນສີ ກົວມົວ ກໍາມະການສູນກາງພັກ ຮອງຫົວໜ້າ ຄອສພ ໄດ້ຜ່ານຄໍາແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 557/ຄຈສພ, ລົງວັນທີ 21/8 /2026 ກ່ຽວກັບ ການຈັດຕັ້ງປະຕິບັດ ມະຕິຕົກລົງຂອງກົມການເມືອງສູນກາງພັກ ວ່າດ້ວຍວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ.
 |
ສະຫາຍ ຄໍາມອນ ຈັນທະຈິດ ກໍາມະການສໍາຮອງສູນກາງພັກ ຮອງຫົວໜ້າ ຄອສພ, ຜ່ານມາດຕະຖານພະນັກງານນໍາພາ-ຄຸ້ມຄອງຂອງ ຄອສພ.
 |
ສະຫາຍ ອານົງສັກ ອິນທະວົງ ກໍາມະການປະຈໍາພັກ ຫົວໜ້າກົມຈັດຕັ້ງ, ຜ່ານແຈ້ງການຂອງຄະນະຈັດຕັ້ງສູນກາງພັກ ສະບັບເລກທີ 1734/ຄຈສພ, ລົງວັນທີ 17ກັນຍາ 2026 ກ່ຽວກັບ ການກໍານົດເວລາສ້າງແຜນກໍານົດພະນັກງານນໍາພາ-ຄຸ້ມຄອງ, ຜ່ານແຜນກໍານົດພະນັກງານນໍາພາ-ຄຸ້ມຄອງ ຂັ້ນສູນກາງຄຸ້ມຄອງ ແລະ ຂັ້ນ ຄອສພ ຄຸ້ມຄອງ ແລະ ຂໍ້ຕົກລົງວ່າດ້ວຍ ການແຕ່ງຕັ້ງຄະນະຮັບຜິດຊອບ ການສ້າງແຜນກໍານົດພະນັກງານນໍາພາ-ຄຸ້ມຄອງ, ຂັ້ນສູນກາງຄຸ້ມຄອງ ແລະ ຂັ້ນ ຄອສພ ຄຸ້ມຄອງ. ຈາກນັ້ນກອງປະຊຸມ ຍັງໄດ້ປະກາດກົງຈັກການຈັດຕັ້ງຈໍານວນໜຶ່ງ.
 |
 |
 |
 |
ໃນໂອກາດດັ່ງກ່າວ, ທ່ານປະທານກອງປະຊຸມໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງເພີ່ມທະວີຄວາມຮັບຜິດຊອບ, ສຸມໃສ່ການຄົ້ນຄວ້າ, ເຊື່ອມຊຶມ ແລະ ເຂົ້າໃຈຕໍ່ເນື້ອໃນເອກະສານຢ່າງເລິກເຊິ່ງ ເພື່ອນຳໄປຈັດຕັ້ງປະຕິບັດໃນຂົງເຂດວຽກງານຂອງຕົນຮັບຜິດຊອບໃຫ້ເກີດຜົນປະໂຫຍດ ແລະ ມີປະສິດທິພາບສູງສຸດ ພ້ອມນັ້ນ ຍັງໄດ້ຍ້ອງຍໍຊົມເຊີຍຕໍ່ບັນດາສະຫາຍທີ່ໄດ້ຮັບບໍານານ, ບັນດາສະຫາຍທີ່ໄດ້ຮັບໜ້າທີ່ໃໝ່ ຈົ່ງສືບຕໍ່ເອົາໃຈໃສ່ໃນໜ້າທີ່ວຽກງານທີ່ໄດ້ຮັບມອບໝາຍ ໃຫ້ໄດ້ຮັບຜົນດີ ແລະ ເຊື່ອໝັ້ນວ່າ ພວກສະຫາຍຈະບຸກບືນຜ່ານຜ່າ ຊອກຮູ້ຮໍ່າຮຽນເອົາບົດຮຽນ ໃໝ່ໆທີ່ເດັ່ນ ເພື່ອມາພັດທະນາໝູນໃຊ້ເຂົ້າໃນວຽກງານຕົວຈິງໃນປັດຈຸບັນ.
(ຂ່າວ: ແສງຈັນ)
ຄໍາເຫັນ