 |
ທ່ານ ຄຳພັນ ຄຸນສົມບັດ ສສຊ ເຂດເລືອກຕັ້ງທີ 2 ແຂວງຜົ້ງສາລີ ໄດ້ປະກອບຄຳເຫັນຕໍ່ບົດລາຍງານ ຂອງສພຊ ຊຶ່ງທ່ານໄດ້ສະແດງຄວາມເຫັນດີເປັນເອກະພາບ ແລະ ຊົມເຊີຍຕໍ່ຜົນງານການເຄື່ອນໄຫວວຽກງານທີ່ຜ່ານມາ, ພ້ອມທັງຍົກໃຫ້ເຫັນສອງປະເດັນສຳຄັນທີ່ຕິດພັນກັບວຽກງານຕິດຕາມກວດກາ ແລະ ການແກ້ໄຂຄຳຮ້ອງຂໍຄວາມເປັນທຳ ເພື່ອໃຫ້ພາກສ່ວນກ່ຽວຂ້ອງນຳໄປພິຈາລະນາປັບປຸງ ຄື:1. ບັນຫາການຕິດຕາມກວດກາການຈັດຕັ້ງປະຕິບັດກົດໝາຍແລະ ມະຕິຂອງສະພາ, ໄລຍະຜ່ານມາ, ການຕິດຕາມກວດກາການປະຕິບັດລັດຖະທຳມະນູນ, ກົດໝາຍ ແລະ ມະຕິຕ່າງໆ ໄດ້ຮັບຜົນດີລະດັບໜຶ່ງ, ມີການຊີ້ແຈງຈາກພາກສ່ວນກ່ຽວຂ້ອງ ແລະ ຫຼາຍບັນຫາໄດ້ຮັບການແກ້ໄຂ.ເຖິງແນວໃດກໍຕາມມີບາງບັນຫາທີ່ຍັງບໍ່ທັນສາມາດແກ້ໄຂໄດ້ ຍ້ອນການຊີ້ແຈງ ຫຼື ວິທີການແກ້ໄຂຂອງບາງພາກສ່ວນຍັງບໍ່ທັນຖືກຈຸດ ແລະ ບໍ່ທັນຕອບສະໜອງຕາມຄວາມຮຽກຮ້ອງຕ້ອງການຂອງປະຊາຊົນ, ສະເໜີໃຫ້ກຳມາທິການກົດໝາຍ, ກຳມາທິການຍຸຕິທຳ ແລະ ບັນດາກຳມາທິການກ່ຽວຂ້ອງ ຄວນສົມທົບກັນຄົ້ນຄວ້າ ແລະ ແບ່ງຄວາມຮັບຜິດຊອບກັນຢ່າງຮັດກຸມ ເພື່ອເພີ່ມປະສິດທິພາບໃນການຕິດຕາມກວດກາໃຫ້ມີປະສິດທິຜົນສູງຂຶ້ນກວ່າເກົ່າ, 2. ຄວາມຫຍຸ້ງຍາກໃນການແກ້ໄຂຄຳຮ້ອງຂໍຄວາມເປັນທຳແລະ ຈຳນວນຄຳຮ້ອງທີ່ຍັງຄ້າງ, ໄດ້ຍົກໃຫ້ເຫັນເຖິງສະຖິຕິຄຳຮ້ອງຂໍຄວາມເປັນທຳທີ່ຍັງຄ້າງຢູ່ສະພາແຫ່ງຊາດ ຊຶ່ງມີສູງເຖິງ 886 ເລື່ອງ, ແຕ່ມີພຽງ 44ເລື່ອງ ເທົ່ານັ້ນທີ່ໄດ້ຮັບການແກ້ໄຂສຳເລັດ. ຕໍ່ກັບບັນຫາດັ່ງກ່າວ ທ່ານສະແດງຄວາມເປັນຫ່ວງວ່າ ຕົວເລກດັ່ງກ່າວເປັນຕົວເລກທີ່ຂ້ອນຂ້າງສູງ ແລະ ຕັ້ງຄຳຖາມວ່າຈຳນວນຄຳຮ້ອງດັ່ງກ່າວຢູ່ໃນຂອບເຂດທົ່ວປະເທດ ຫຼື ສະເພາະສະພາແຫ່ງຊາດຮັບຜິດຊອບ, ພ້ອມທັງສະເໜີໃຫ້ມີການຈັດສັນ ແລະ ແບ່ງປັນວຽກງານໃຫ້ກົງກັບໜ້າທີ່ຂອງແຕ່ລະກຳມາທິການຢ່າງເປັນລະບົບ.
ທ່ານ ອາລຸນໄຊ ສູນນະລາດ ສສຊປະຈຳເຂດເລືອກຕັ້ງທີ 15 ແຂວງຈຳປາສັກ ໄດ້ສະແດງຄວາມເຫັນດີເປັນເອກະພາບ ແລະ ຕີລາຄາສູງຕໍ່ການປະຕິບັດພາລະບົດບາດຂອງ ສພຊ ໂດຍສະເພາະໃນໄລຍະກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກທີ່ໄດ້ເພີ່ມບົດບາດການນຳພາຂອງພັກໃນວຽກງານສະພາໃຫ້ສູງເດັ່ນຂຶ້ນ.
ຂໍ້ສະເໜີແນະ ແລະ ບັນຫາສຳຄັນເພື່ອການປັບປຸງ: ດ້ານຜົນສຳເລັດການເລືອກຕັ້ງ: ທ່ານໄດ້ຍົກໃຫ້ເຫັນຜົນງານການເລືອກຕັ້ງ ສສຊ ຊຸດທີ 15 ໂດຍສະເພາະຕົວເລກຜູ້ມີສິດເລືອກຕັ້ງທີ່ມາໃຊ້ສິດເພີ່ມຂຶ້ນລື່ນແຜນ 3,15% ຊຶ່ງສະທ້ອນໃຫ້ເຫັນເຖິງການໂຄສະນາເຜີຍແຜ່ທີ່ກວ້າງຂວາງ ແລະ ການແກ້ໄຂບັນຫາຕາມຄຳສະເໜີຂອງປະຊາຊົນ, ການປັບປຸງກົດໝາຍ ແລະ ຄວາມສັກສິດ: ການສ້າງ ແລະ ປັບປຸງກົດໝາຍແມ່ນເຮັດໄດ້ດີ ແຕ່ຜົນຕອບຮັບຍັງມີຂໍ້ຈຳກັດ ເຊັ່ນ: ຕົວເລກບໍ່ບັນລຸຄາດໝາຍ ແລະ ກົດໝາຍຍັງບໍ່ທັນສັກສິດເທົ່າທີ່ຄວນ. ດັ່ງນັ້ນ, ຈຶ່ງສະເໜີໃຫ້ເອົາໃຈໃສ່ປະເມີນຄວາມຕ້ອງການໃນການປັບປຸງມາດຕາ ແລະ ກົດໝາຍໂດຍບໍ່ເນັ້ນພຽງແຕ່ປະລິມານພ້ອມທັງເພີ່ມຄວາມເຂັ້ມງວດໃນການບັງຄັບໃຊ້ກົດໝາຍໃຫ້ມີຄວາມສັກສິດຂຶ້ນກວ່າເກົ່າ, ການຕົກລົງບັນຫາສຳຄັນຂອງຊາດ: ສ່ວນຫຼາຍການຕົກລົງບັນຫາສຳຄັນຍັງປະກົດວ່າຕົກຄ້າງ ເນື່ອງຈາກອີງໃສ່ຄວາມຕ້ອງການຂອງຂະແໜງການ ແຕ່ບໍ່ໄດ້ຢູ່ໃນແຜນຂອງສະພາ. ດັ່ງນັ້ນ, ຄວນນຳເອົາບັນຫາສຳຄັນຂອງປະເທດມາພິຈາລະນາໃຫ້ລະອຽດຖີ່ຖ້ວນ ແລະ ມີຄວາມພ້ອມກ່ອນລົງມະຕິ, ວຽກງານຕິດຕາມກວດກາ: ຄວນສຸມໃສ່ 3 ບັນຫາສຳຄັນ ຄື: ການເຄົາລົບ ແລະ ປະຕິບັດກົດໝາຍ, ການປະຕິບັດບັນດາຄາດໝາຍຕ່າງໆ (ຊຶ່ງມີການລົງມະຕິຫຼາຍແຕ່ການລາຍງານຄືນຜົນການປະຕິບັດຍັງເກືອບວ່າບໍ່ມີ)ແລະ ການເອົາໃຈໃສ່ຕໍ່ຄຳສະເໜີຂອງປະຊາຊົນ ຊຶ່ງຖືເປັນປັດໄຈສຳຄັນໃນການສ້າງຄວາມເຊື່ອໝັ້ນຈາກປະຊາຊົນ, ການສ້າງຄວາມເຂັ້ມແຂງໃຫ້ສະພາ: ສະເໜີໃຫ້ຍົກລະດັບ ແລະ ປັບປຸງກຳມະການຕ່າງໆ ລວມທັງກຳມາທິການຂອງສະພາແຫ່ງຊາດ ຊຶ່ງເປັນກົນໄກສຳຄັນໃນການປະຕິບັດສິດໜ້າທີ່, ຜ່ານການຈັດຝຶກອົບຮົມ ແລະ ສ້າງຄວາມເຂັ້ມແຂງລົງໄປຮອດຂັ້ນທ້ອງຖິ່ນ ເພື່ອຍົກສູງຄຸນນະພາບ ແລະ ປະສິດທິພາບໃນການເຮັດວຽກ. ທ່ານ ສສຊ ໄດ້ເນັ້ນຢໍ້າຕື່ມວ່າ ຫາກປະຕິບັດຕາມຈຸດສຳຄັນເຫຼົ່ານີ້ໄດ້ ຈະຍິ່ງເປັນການເພີ່ມທະວີບົດບາດ, ຄວາມສັກສິດ ແລະ ຄວາມເຊື່ອໝັ້ນຂອງປະຊາຊົນທີ່ມີຕໍ່ສະພາແຫ່ງຊາດໃຫ້ສູງຍິ່ງໆຂຶ້ນໄປ.(ຂ່າວ-ພາບ: ແສງຈັນ+ບຸນຕອມ)
ຄໍາເຫັນ