ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 12 ຕຸລານີ້ ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ປະທານສະພາແຫ່ງຊາດ.
ທ່ານ ນາງ ສູນທອນ ໄຊຍະຈັກ ກ່າວວ່າ: ປີ 2027 ສພຊ ໄດ້ວາງຄາດໝາຍສູ້ຊົນເພື່ອຮັບປະກັນການຈັດຕັ້ງຜັນຂະຫຍາຍແຜນການສ້າງ ແລະ ປັບປຸງກົດໝາຍປະຈຳປີ 2027 ຂອງສະພາແຫ່ງຊາດໃຫ້ບັນລຸຕາມແຜນການ;ຮັບປະກັນການພິຈາລະນາຕົກລົງບັນຫາສໍາຄັນພື້ນຖານຂອງຊາດໃຫ້ສອດຄ່ອງຕາມແນວທາງນະໂຍບາຍ, ລັດຖະທຳມະນູນ, ກົດໝາຍ,ຖືສໍາຄັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ 5 ປີ ຄັ້ງທີ X ໃຫ້ເປັນຮູບປະທຳ, ນໍາຜົນປະໂຫຍດຕົວຈິງມາໃຫ້ປະຊາຊົນບັນດາເຜົ່າໃຫ້ນັບມື້ນັບຫຼາຍຂຶ້ນ;ຍົກສູງຄວາມເປັນເອກະພາບໃນການກໍານົດຫົວຂໍ້ເນື້ອໃນ ແລະ ຄວາມຮັບຜິດຊອບຂອງບັນດາກຳມາທິການ, ຫ້ອງວ່າການສະພາແຫ່ງຊາດ ແລະ ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງໃນການປະຕິບັດສິດ ແລະ ໜ້າທີ່ດ້ານການຕິດຕາມກວດກາຂອງສະພາແຫ່ງຊາດ ໃຫ້ບັນລຸຕາມແຜນການທີ່ວາງໄວ້;ເອົາໃຈໃສ່ໃນການຄົ້ນຄວ້າ ແລະ ກໍານົດຫົວຂໍ້ເນື້ອໃນຍົກສູງຂີດຄວາມສາມາດໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ແລະ ພະນັກງານ-ລັດຖະກອນໃຫ້ເປັນລະບົບ ແລະ ປົກກະຕິ;ເພີ່ມທະວີການພົວພັນຮ່ວມມື ແລະ ປະສານງານຢ່າງກົມກຽວ ລະຫວ່າງສະພາແຫ່ງຊາດ ກັບສະພາປະຊາຊົນຂັ້ນແຂວງ ແລະ ບັນດາອົງການຂອງລັດຂັ້ນສູນກາງ ແລະ ທ້ອງຖິ່ນ;ຮັບປະກັນໃຫ້ການເຄື່ອນໄຫວວຽກງານການຕ່າງປະເທດຂອງສະພາແຫ່ງຊາດປະກອບສ່ວນຍົກສູງບົດບາດຂອງປະເທດເຮົາ ກໍຄືຂອງສະພາແຫ່ງຊາດໃຫ້ນັບມື້ສູງຂຶ້ນໃນເວທີພາກພື້ນ ແລະ ສາກົນ.
ພ້ອມນັ້ນ, ເພື່ອຮັບປະກັນການຈັດຕັ້ງປະຕິບັດວຽກງານຂອງສະພາແຫ່ງຊາດ ປະຈໍາປີ 2027 ໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້, ສະພາແຫ່ງຊາດຈະສຸມໃສ່ວຽກງານຕົ້ນຕໍ ເປັນຕົ້ນດ້ານນິຕິບັນຍັດ: ສພຊ ລາຍງານຄະນະບໍລິຫານງານສູນກາງພັກກ່ຽວກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ ໂດຍສະເພາະການຈັດຕັ້ງປະຕິບັດພາລະບົດບາດດ້ານນິຕິບັນຍັດຂອງສະພາແຫ່ງຊາດ;ຊີ້ນໍາບັນດາກໍາມາທິການສະພາແຫ່ງຊາດປະສານສົມທົບກັບພາກສ່ວນທີ່ກ່ຽວຂ້ອງໃນການສ້າງ ແລະ ປັບປຸງກົດໝາຍໃຫ້ປະຕິບັດຕາມກົດໝາຍວ່າດ້ວຍການສ້າງນິຕິກຳຢ່າງເຂັ້ມງວດ, ເອົາໃຈໃສ່ຄົ້ນຄວ້າກໍານົດບັນດາຮ່າງກົດໝາຍຕາມແຜນການສ້າງ ແລະ ປັບປຸງກົດໝາຍປະຈຳປີ 2027 ຊຶ່ງມີຈໍານວນ 32 ສະບັບ. ໃນນີ້, ກົດໝາຍສ້າງໃໝ່ 2 ສະບັບ ແລະ ກົດໝາຍປັບປຸງ 30 ສະບັບ ໃຫ້ສໍາເລັດຕາມແຜນການ;ດໍາເນີນການປະເມີນກົດໝາຍວ່າດ້ວຍການແກ້ໄຂຄໍາຮ້ອງທຸກ ແລະ ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ພ້ອມທັງການຄົ້ນຄວ້າປັບປຸງຮ່າງກົດໝາຍ 2 ສະບັບດັ່ງກ່າວ ເພື່ອນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ X; ຄົ້ນຄວ້າ, ພິຈາລະນາຮັບຮອງຮ່າງລັດຖະບັນຍັດ, ການຕີຄວາມໝາຍ ຫຼື ອະທິບາຍລັດຖະທຳມະນູນ, ກົດໝາຍ, ການໃຫ້ສັດຕະຍາບັນຕໍ່ສົນທິສັນຍາ ແລະ ສັນຍາສາກົນ ທີ່ສປປ ລາວ ເປັນພາຄີຕາມການສະເໜີຂອງລັດຖະບານ ແລະ ພາກສ່ວນກ່ຽວຂ້ອງ;ເອົາໃຈໃສ່ປະສານສົມທົບກັບພາກສ່ວນທີ່ກ່ຽວຂ້ອງຈັດຕັ້ງໂຄສະນາເຜີຍແຜ່ລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍໃຫ້ໄດ້ຢ່າງກວ້າງຂວາງ, ສອດຄ່ອງກັບແຕ່ລະເປົ້າໝາຍ ແລະ ຕາມເງື່ອນໄຂໃນໄລຍະໃໝ່;ຫັນເອົາບາງມາດຕາຂອງກົດໝາຍມາເປັນນິຕິກໍາໃຕ້ກົດໝາຍເພື່ອຍົກສູງຄຸນນະພາບໃນການປະຕິບັດກົດໝາຍ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ