ສສຊ ຜົ້ງສາລີ ສະເໜີ ສພຊ ເພີ່ມງົບປະມານ ແລະ ປັບປຸງກົນໄກປະສານງານ

ທ່ານ ສົມຈິດ ຫັບລະກອນ ສສຊ ເຂດເລືອກຕັ້ງທີ 2 ແຂວງຜົ້ງສາລີ ມີຄໍາເຫັນວ່າ: ກ່ອນອື່ນເຫັນດີເປັນເອກະພາບຕໍ່ບົດລາຍງານຂອງສພຊ. ໃນໄລຍະ 10 ເດືອນຜ່ານມາ, ສະພາປະຊາຊົນແຂວງຜົ້ງສາລີໄດ້ສຸມໃສ່ການຈັດຕັ້ງ 3 ວຽກງານຕົ້ນຕໍຄື: ການປັບປຸງໂຄງປະກອບກົງຈັກ ແລະ ບຸກຄະລາກອນ, ການສ້າງຕັ້ງຫ້ອງການປະຈຳເມືອງ ແລະ ການຜັນຂະຫຍາຍຜົນກອງປະຊຸມຂອງສະພາແຫ່ງຊາດ ເພື່ອໃຫ້ການເຄື່ອນໄຫວວຽກງານມີຄວາມຄ່ອງຕົວ ແລະ ມີປະສິດທິຜົນຫຼາຍຂຶ້ນ.ການປັບປຸງໂຄງປະກອບກົງຈັກພາຍໃນ ແລະ ການຈັດສັນບຸກຄະລາກອນໃຫ້ມີຄວາມເໝາະສົມໂດຍໄດ້ຈັດວາງກົງຈັກປະກອບມີ 3 ຄະນະກຳມະການ, 1 ຫ້ອງການ ແລະ 6 ພະແນກການ, ຊຶ່ງຖືວ່າໄດ້ຮັບຜົນສຳເລັດຕາມແຜນການທີ່ວາງໄວ້,ການສ້າງຕັ້ງຄະນະ ແລະ ຫ້ອງການປະຈຳເມືອງໃນ 7 ເມືອງສຳເລັດຕາມແຜນການ, ໂດຍມີການຈັດສັນພະນັກງານເມືອງລວມທັງໝົດ 41 ທ່ານ ເພື່ອຮັບຜິດຊອບວຽກງານຂອງຫ້ອງການຄະນະສະມາຊິກສະພາປະຊາຊົນແຂວງປະຈຳເມືອງ. ພ້ອມນີ້, ຍັງໄດ້ຮັບການສະໜັບສະໜູນຈາກການນຳຂັ້ນເມືອງໃນການຈັດສັນພະນັກງານ ແລະ ຈາກຂັ້ນແຂວງໃນການສະໜອງງົບປະມານເບື້ອງຕົ້ນ ເມືອງລະ 50 ລ້ານກີບ ເພື່ອຮັບປະກັນການເຄື່ອນໄຫວວຽກງານ,ການຜັນຂະຫຍາຍຜົນສຳເລັດຈາກກອງປະຊຸມສະໄໝສາມັນ, ສະໄໝວິສາມັນ ແລະ ກອງປະຊຸມເຄື່ອນທີ່ຂອງສະພາແຫ່ງຊາດ ໃຫ້ລົງສູ່ການຈັດຕັ້ງປະຕິບັດໃນຂັ້ນແຂວງ ແລະ ຂັ້ນເມືອງ.

ເຖິງວ່າວຽກງານດັ່ງກ່າວຈະມີຜົນສຳເລັດຕາມແຜນການ, ແຕ່ການດຳເນີນງານໃນຕໍ່ໜ້າຍັງມີບັນຫາຈຳເປັນຕ້ອງໄດ້ຮັບການແກ້ໄຂ. ທ່ານ ສົມຈິດ ຫັບລະກອນ ໄດ້ສະເໜີຕໍ່ສະພາແຫ່ງຊາດໃຫ້ຄົ້ນຄວ້າພິຈາລະນາຫຼາຍບັນຫາວຽກງານສຳຄັນຄື:ການພິຈາລະນາຈັດສັນງົບປະມານໃຫ້ພຽງພໍກັບການເຄື່ອນໄຫວວຽກງານ, ເນື່ອງຈາກງົບປະມານທີ່ມີຢູ່ໃນປັດຈຸບັນຍັງຈຳກັດ ແລະ ບໍ່ສາມາດຮອງຮັບພາລະວຽກງານໄດ້ຢ່າງຄົບຖ້ວນ,ການສ້າງຄວາມເປັນເອກະພາບໃນການຈັດສັນງົບປະມານບໍລິຫານ, ເງິນເດືອນ ແລະ ເງິນອຸດໜູນຂອງພະນັກງານ 41 ທ່ານ ທີ່ສັງກັດຢູ່ຫ້ອງການປະຈຳເມືອງໂດຍສະເໜີໃຫ້ມີກົນໄກສາຍຕັ້ງທີ່ຊັດເຈນ ເພື່ອໃຫ້ການບໍລິຫານງົບປະມານ ແລະ ການຄຸ້ມຄອງພະນັກງານມີຄວາມສອດຄ່ອງກັບໜ້າທີ່ວຽກງານ,ການເສີມສ້າງຄວາມຮູ້ ແລະ ຄວາມສາມາດໃຫ້ສະມາຊິກສະພາປະຊາຊົນແຂວງ ແລະ ພະນັກງານປະຈຳເມືອງໂດຍສະເພາະວຽກງານສັງລວມ, ວຽກງານພັກ, ວຽກງານບຸກຄະລາກອນ ແລະ ວຽກງານການເງິນ, ເພາະກົງຈັກທີ່ສ້າງຕັ້ງໃໝ່ຍັງມີພະນັກງານຈຳນວນໜຶ່ງທີ່ຂາດປະສົບການດ້ານວຽກງານສະພາ,ການສຶກສາຄວາມເປັນໄປໄດ້ໃນການກຳນົດສິດໃນການບໍລິຫານງົບປະມານໃຫ້ຫ້ອງການຄະນະສະມາຊິກສະພາປະຊາຊົນແຂວງປະຈຳເມືອງ ເພື່ອໃຫ້ສາມາດດຳເນີນວຽກງານໄດ້ຢ່າງຄ່ອງຕົວ,ການປັບປຸງກົນໄກການປະສານງານລະຫວ່າງສະພາແຫ່ງຊາດກັບຂັ້ນແຂວງ ໃຫ້ມີຄວາມວ່ອງໄວ ແລະ ຊັດເຈນຂຶ້ນໂດຍສະເພາະການສົ່ງເອກະສານ, ການແຈ້ງການ ແລະ ການປະສານວຽກງານທີ່ກ່ຽວຂ້ອງ ເພື່ອຫຼຸດຜ່ອນຄວາມຊັກຊ້າ ແລະ ຫຼີກລ່ຽງບັນຫາຈາກການປ່ຽນແປງຂໍ້ມູນ ຫຼື ແນວທາງປະຕິບັດ,ການປັບປຸງກົນໄກຕິດຕາມ ແລະ ຊຸກຍູ້ການຈັດຕັ້ງປະຕິບັດມະຕິຂອງສະພາແຫ່ງຊາດໂດຍສະເໜີໃຫ້ມີມາດຕະການຕິດຕາມ ແລະ ປະເມີນຜົນທີ່ຊັດເຈນລວມທັງການກຳນົດສິດ ແລະ ກົນໄກໃນການສະເໜີມາດຕະການຕໍ່ຜູ້ທີ່ບໍ່ປະຕິບັດຕາມມະຕິຢ່າງເໝາະສົມ,ການປັບປຸງຂະບວນການສ້າງ ແລະ ປັບປຸງກົດໝາຍ ໂດຍສະເໜີໃຫ້ສົ່ງຮ່າງກົດໝາຍໃຫ້ຂັ້ນແຂວງປຶກສາຫາລື ແລະ ລວບລວມຄຳເຫັນຈາກຜູ້ຕາງໜ້າໃນເຂດເລືອກຕັ້ງຕ່າງໆ ກ່ອນສົ່ງໃຫ້ສະພາແຫ່ງຊາດສັງລວມ ແລະ ພິຈາລະນາ, ເພື່ອຫຼຸດຜ່ອນເວລາ ແລະ ເພີ່ມປະສິດທິຜົນໃນການປະກອບຄຳເຫັນຕໍ່ຮ່າງກົດໝາຍ.(ຂ່າວ: ວັນເພັງ)