ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 9 ຕຸລາຜ່ານມາທ່ານ ພົນຈັດຕະວາ ນາງ ລີວົງ ລາວລີ ຫົວໜ້າອອປສໄດ້ລາຍງານຕໍ່ກອງປະຊຸມໂດຍຍົກໃຫ້ເຫັນປີ 2027 ຈະສືບຕໍ່ສຸມໃສ່ຫຼາຍວຽກງານສໍາຄັນ ໂດຍສະເພາະຈະສືບຕໍ່ເພີ່ມທະວີການຕິດຕາມກວດກາການປະຕິບັດກົດໝາຍ ໂດຍເອົາໃຈໃສ່ຈັດຕັ້ງປະຕິບັດຄໍາສັ່ງຕ່າງໆ, ການຈັດຕັ້ງປະຕິບັດກົນໄກການປະສານງານ ຮ່ວມກັບພາກສ່ວນກ່ຽວຂ້ອງກ່ຽວກັບການຄົ້ນຄວ້າສ້າງນິຕິກຳ, ປຶ້ມຄູ່ມື, ການຂຽນຄໍາຖະແຫຼງຄະດີປົກຄອງ, ການຕິດຕາມກວດກາ ແລະ ແກ້ໄຂຄໍາຮ້ອງຂອງອົງການຈັດຕັ້ງລັດ, ລວມໝູ່, ສັງຄົມ ແລະ ພົນລະເມືອງ; ສືບຕໍ່ຜັນຂະຫຍາຍກົນໄກປະສານງານ ລະຫວ່າງອົງການໄອຍະການປະຊາຊົນສູງສຸດ ແລະ ກະຊວງປ້ອງກັນຄວາມສະຫງົບ, ກະຊວງກະສິກໍາ ແລະ ສິ່ງແວດລ້ອມ, ກະຊວງການເງິນ, ສານປະຊາຊົນສູງສຸດ, ກະຊວງຍຸຕິທໍາ, ກໍາມາທິການຍຸຕິທໍາສະພາແຫ່ງຊາດ ແລະ ສໍານັກງານຕ້ານການຟອກເງິນທະນາຄານກາງ ເຂົ້າສູ່ວຽກງານຕົວຈິງ;ຍົກສູງຄຸນນະພາບການຕິດຕາມກວດກາການປະຕິບັດກົດໝາຍ ຂອງອົງການສືບສວນ-ສອບສວນ ໂດຍສະເພາະການນໍາໃຊ້ວິທີການສືບສວນ-ສອບສວນ ແລະ ການຈັດຕັ້ງປະຕິບັດ 7 ມາດຕະການສະກັດກັ້ນ;ຍົກສູງຄຸນນະພາບການສັ່ງຟ້ອງຜູ້ຖືກຫາຂຶ້ນສານ ແລະ ການຕິດຕາມກວດກາການປະຕິບັດກົດໝາຍໃນການດໍາເນີນຄະດີຢູ່ສານໃຫ້ເຂັ້ມງວດ, ຍົກສູງຄຸນນະພາບການໂຕ້ຖຽງໃນທີ່ປະຊຸມສານ ເພື່ອຮັບປະກັນຄວາມຍຸຕິທໍາໃນສັງຄົມ;ເອົາໃຈໃສ່ຕິດຕາມກວດກາການປະຕິບັດຄໍາຕັດສິນຂອງສານ ເພື່ອເຮັດໃຫ້ຄໍາຕັດສິນ ຫຼື ຄໍາພິພາກສາຂອງສານທີ່ໃຊ້ໄດ້ເດັດຂາດໄດ້ຮັບການຈັດຕັ້ງປະຕິບັດຢ່າງຖືກຕ້ອງ ແລະ ເຂັ້ມງວດ; ສ້າງກົນໄກຕິດຕາມກວດກາ ແລະ ກົນໄກລາຍງານກ່ຽວກັບການຊໍາລະທາງແພ່ງ, ການເກັບ ແລະ ການມອບຄ່າທໍານຽມສານ, ອາກອນ ແລະ ຄ່າປັບໃໝເຂົ້າງົບປະມານ, ການຮິບຊັບ ແລະ ການຮິບວັດຖຸສິ່ງຂອງເຂົ້າເປັນຂອງລັດ ໃຫ້ຖືກຕ້ອງຕາມກົດໝາຍ; ເອົາໃຈໃສ່ຕິດຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງ ແນໃສ່ຈໍາກັດການລະເມີດກົດໝາຍໃນການດໍາເນີນຄະດີຕາມຂະບວນຍຸຕິທໍາ.
ຄຽງຄູ່ກັນນັ້ນ, ຈະສ້າງກົນໄກໃຫ້ປະຊາຊົນ ໄດ້ເຂົ້າເຖິງການບໍລິການທາງດ້ານກົດໝາຍຢູ່ອົງການໄອຍະການປະຊາຊົນສູງສຸດ ແລະ ອົງການໄອຍະການປະຊາຊົນທ້ອງຖິ່ນ ໂດຍສືບຕໍ່ຜັນຂະຫຍາຍຫ້ອງໃຫ້ຄໍາປຶກສາທາງດ້ານກົດໝາຍຕໍ່ປະຊາຊົນໃຫ້ນັບມື້ກ້າວສູ່ຄຸນນະພາບເທື່ອລະກ້າວ ແລະ ສືບຕໍ່ຫັນເອົາພະນັກງານຂັ້ນຫົວໜ້າຫ້ອງການ, ຫົວໜ້າກົມລົງຕິດຕາມນໍາພາ-ຊີ້ນໍາ ແລະ ຊຸກຍູ້ການປະຕິບັດໜ້າທີ່ວຽກງານຢ່າງຮອບດ້ານຂອງອົງການໄອຍະການປະຊາຊົນທ້ອງຖິ່ນ ເພື່ອຮັບປະກັນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງອົງການໄອຍະການປະຊາຊົນ ໃຫ້ມີຄຸນນະພາບສູງຂຶ້ນກວ່າເກົ່າ.
ຄໍາເຫັນ