ທ່ານ ລາວປາວຊົ່ງ ນະວົງໄຊ ກຳມະການສູນກາງພັກ, ຮອງປະທານສູນກາງແນວລາວສ້າງຊາດໄດ້ຕາງໜ້າໃຫ້ຄະນະປະຈໍາ ສນຊ, ສະຫະພັນນັກຮົບເກົ່າແຫ່ງຊາດລາວ ແລະ ບັນດາອົງການຈັດຕັ້ງມະຫາຊົນຂັ້ນສູນກາງ ໄດ້ປະກອບຄຳເຫັນ ໂດຍສະເໜີໃຫ້ສະພາແຫ່ງຊາດເອົາໃຈໃສ່ຍົກສູງຄຸນນະພາບການຕິດຕາມ ກວດກາ ແລະ ແກ້ໄຂບາງບັນຫາຕ່າງໆ ດັ່ງນີ້: 1) ເອົາໃຈໃສ່ຕິດຕາມກວດກາແຕ່ຫົວທີ ໃນການລົງເລິກຕິດຕາມ ກວດກາ ວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ ແລະ ນໍາໃຊ້ເຄື່ອງມືທັນສະໄໝໃນການຈັດເກັບລາຍຮັບ-ຄຸ້ມຄອງລາຍຈ່າຍໃຫ້ມີບາດກ້າວຫັນປ່ຽນໃໝ່ດີຂຶ້ນກ່ວາເກົ່າ ໂດຍໃຫ້ຮັດກຸມ-ແບບໂປ່ງໃສ ສາມາດກວດສອບໄດ້; 2) ການສ້າງ ແລະ ປັບປຸງກົດໝາຍແຕ່ລະຄັ້ງ ຕ້ອງໄດ້ມີການເປີດກວ້າງ, ການທາບທາມຄຳຄິດເຫັນ, ການປະເມີນ, ການມີສ່ວນຮ່ວມຂອງອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ,ບັນດາອົງການຈັດຕັ້ງມະຫາຊົນ ນັບທັງຂັ້ນສູນກາງ-ທ້ອງຖິ່ນ ແລະ ປະຊາຊົນບັນດາເຜົ່າໃຫ້ແທດເຖິງທຸກເປົ້າໝາຍໃນສັງຄົມ. ພ້ອມກັນນັ້ນ, ການໂຄສະນາເຜີຍແຜ່ກົດໝາຍ ຕ້ອງລົງເລິກ ແລະ ເຂົ້າເຖິງປະຊາຊົນທຸກກຸ່ມເປົ້າໝາຍໃນສັງຄົມ; 3) ການຮັບຮອງກົດໝາຍ ແລະ ນິຕິກຳໃຕ້ກົດໝາຍ ຕ້ອງມີການຄົ້ນຄວ້າຢ່າງລະອຽດເລິກເຊິ່ງ, ຈະແຈ້ງ, ຊັດເຈນ ກ່ອນທີ່ຈະຮັບຮອງ, ຮັບຮອງແລ້ວສາມາດຈັດຕັ້ງປະຕິບັດໃຫ້ເຂັ້ມງວດ ແລະ ເດັດຂາດ; 4) ຕິດຕາມກວດກາ ແລະ ຊຸກຍູ້ວຽກງານການສຶກສາຂອງພາກລັດ ແລະ ເອກະຊົນ, ການບໍລິການສາທາລະນະສຸກ, ບັນຫາແຮງງານ, ການອະນຸລັກວັດທະນະທຳອັນດີງາມຂອງຊາດ ແລະ ຂອງເຜົ່າ ຕິດພັນກັບການທ່ອງທ່ຽວໄປຕາມທິດຫັນສູ່ດ້ານຄຸນນະພາບການຮຽນ-ການສອນ ແລະ ການຝຶກອົບຮົມຄູທາງດ້ານວິຊາການ ແລະ ດ້ານການເມືອງ, ຍູ້ແຮງວຽກງານຊ່ວຍໜູນ, ນະໂຍບາຍຕໍ່ຖັນແຖວຄູ-ອາຈານໃນເວລາທີ່ຫຍຸ້ງຍາກໃຫ້ດີກວ່າເກົ່າ, ຕິດພັນຈັນຍາບັນ-ຈັນຍາທໍາ ແລະ ນໍ້າໃຈຮັບໃຊ້ປະຊາຊົນຂອງແພດໝໍ, ຮັບປະກັນການປິ່ນປົວບໍ່ພຽງແຕ່ປະຊາຊົນລາວ ຫາກຍັງຕ້ອງຮອງຮັບນັກທ່ອງທ່ຽວຕ່າງປະເທດຕື່ມ; 5) ບັນດາມະຕິທີ່ສະພາແຫ່ງຊາດຮັບຮອງເອົາແລ້ວໃຫ້ເພີ່ມທະວີການຕິດຕາມ ກວດກາແຕ່ຫົວທີໃຫ້ເຂັ້ມງວດເດັດຂາດ ຕໍ່ພາກສ່ວນທີ່ກ່ຽວຂ້ອງໃນການຈັດຕັ້ງປະຕິບັດບັນດາມະຕິດັ່ງກ່າວ ໂດຍສະເພາະ ມະຕິກອງປະຊຸມສະພາແຫ່ງຊາດ ສະບັບເລກທີ 34/ສພຊ, ລົງວັນທີ 10/07/2026 ວ່າດ້ວຍການຮັບຮອງວາລະແຫ່ງຊາດ ວ່າດ້ວຍການພັດທະນາຊົນນະບົດ ແລະ ແກ້ໄຂຄວາມທຸກຍາກ; 6) ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຕ້ອງເພີ່ມທະວີຄວາມຮັບຜິດຊອບ, ເອົາໃຈໃສ່ຫັນລົງພົບປະຜູ້ມີສິດເລືອກຕັ້ງຕາມເຂດເລືອກຕັ້ງໃຫ້ຫຼາຍກວ່າເກົ່າການປະກອບຄໍາຄິດຄໍາເຫັນຂອງສະມາຊິກສະພາແຫ່ງຊາດ ໃນກອງປະຊຸມສະພາແຫ່ງຊາດແຕ່ລະຄັ້ງ ຄວນນໍາເອົາຄໍາຄິດຄໍາເຫັນຂອງປະຊາຊົນຜ່ານໄປຍັງລັດຖະບານໃຫ້ມີຈຸດສຸມ ແລະ ສະເໜີວິທີການແກ້ໄຂບັນຫາທີ່ເກີດຂຶ້ນ ໃຫ້ຖືກຈຸດ ພ້ອມທັງໃຫ້ກະຊວງ-ອົງການກ່ຽວຂ້ອງອອກຊີ້ແຈງຜົນການພິຈາລະນາແກ້ໄຂໃຫ້ທົ່ວສັງຄົມຮັບຮູ້; 7) ສະເໜີຄະນະປະຈຳສະພາແຫ່ງຊາດເຊັນບົດບັນທຶກວ່າດ້ວຍການພົວພັນ ລະຫວ່າງ ຄະນະປະຈຳສະພາແຫ່ງຊາດ ແລະ ຄະນະປະຈໍາ ສນຊ ປ່ຽນແທນຂໍ້ຕົກລົງ ເລກ 01/ຄປຈ, ລົງວັນທີ 25 ພຶດສະພາ 2019 ແນໃສ່ປັບປຸງກົນໄກປະສານງານໃຫ້ສອດຄ່ອງ ແລະ ດີຂຶ້ນກວ່າເກົ່າ ແລະ 8) ກອງປະຊຸມແຕ່ລະຄັ້ງ ຂອງສະພາແຫ່ງຊາດ ຄວນມີມະຕິໃຫ້ ສນຊ ໃນການຕິດຕາມກວດກາແຕ່ຫົວທີ ຕາມມະຕິຂອງສະພາແຫ່ງຊາດ ທີ່ຮັບຮອງໃນກອງປະຊຸມແຕ່ລະຄັ້ງ ແລະ ສະໜອງງົບປະມານໃຫ້ ສນຊ ໄດ້ເຄື່ອນໄຫວຕິດຕາມກວດກາ ຕາມມະຕິທີ່ສະພາແຫ່ງຊາດມອບໝາຍໃຫ້ ເປັນຕົ້ນແມ່ນມະຕິກອງປະຊຸມສະພາແຫ່ງຊາດ ທີ່ຕິດພັນໂດຍກົງກັບຊີວິດ ແລະ ການເປັນຢູ່ຂອງປະຊາຊົນບັນດາເຜົ່າ.ຂ່າວ-ພາບ:ບຸນຕອມ
ສສຊ ຜົ້ງສາລີ ສະເໜີ ສພຊ ເພີ່ມງົບປະມານ ແລະ ປັບປຸງກົນໄກປະສານງານ
ພາຍຫຼັງຮັບຟັງການລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2026 ແລະ ທິດທາງແຜນການເຄື່ອນໄຫວວຽກງານປະຈໍາປີ 2027 ຂອງສະພາແຫ່ງຊາດ (ສພຊ) ຕໍ່ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 12 ຕຸລານີ້ ໂດຍການເປັນປະທານຂອງທ່ານ ສອນໄຊ ສີພັນດອນ ປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດ (ສສຊ) ຈາກເຂດເລືອກຕັ້ງຕ່າງໆໄດ້ສຸມໃສ່ບົດລາຍງານດັ່ງກ່າວ. ໂດຍສະເໜີແກ້ໄຂຫຼາຍບັນຫາສໍາຄັນ. ພ້ອມສະເໜີເພີ່ມງົບປະມານ ແລະ ປັບປຸງກົນໄກປະສານງານ ເພື່ອເສີມສ້າງຄວາມເຂັ້ມແຂງໃຫ້ສະພາປະຊາຊົນແຂວງ (ສພຂ).
ຄໍາເຫັນ