ທ່ານນາງ ສຸກຂະເສີມ ສິດທິເດດ ໄດ້ສະແດງຄວາມຊົມເຊີຍ ແລະ ເຫັນດີເປັນເອກະພາບສູງ ຕໍ່ຄະນະຮັບຜິດຊອບຮ່າງກົດໝາຍ ທີ່ໄດ້ເອົາໃຈໃສ່ຄົ້ນຄວ້າ, ປັບປຸງ ແລະ ຮຽບຮຽງກົດໝາຍສະບັບນີ້ຢ່າງມີວິທະຍາສາດ.ຊຶ່ງການປັບປຸງຄັ້ງນີ້ມີຄວາມຈຳເປັນພາວະວິໃສ ແລະ ທັນການເພື່ອແນໃສ່ສ້າງກອງທັບໃຫ້ມີຄວາມເຕີບໃຫຍ່ເຂັ້ມແຂງ, ໜັກແໜ້ນທາງດ້ານການເມືອງ, ແນວຄິດ ແລະ ການຈັດຕັ້ງ, ມີລະບຽບວິໄນເຂັ້ມງວດ ແລະ ກາຍເປັນກຳລັງຫຼັກແຫຼ່ງໃນການປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່ເພື່ອເຮັດໃຫ້ເນື້ອໃນຂອງຮ່າງກົດໝາຍມີຄວາມອຸດົມສົມບູນ ແລະ ຮັດກຸມ ສາມາດນຳໄປຈັດຕັ້ງປະຕິບັດໃຫ້ມີປະໂຫຍດສູງສຸດ.ດັ່ງນັ້ນ, ຈຶ່ງຂໍມີຄຳເຫັນແລກປ່ຽນບາງຈຸດດັ່ງນີ້:1. ມາດຕາ 3 ການອະທິບາຍຄຳສັບຂໍ້7: "ການລ້ຽງດູກອງທັບ" ຄວນກຳນົດໃຫ້ຈະແຈ້ງ ແລະ ກວມລວມຕື່ມ ໂດຍສະເພາະການຮັບປະກັນຊີວິດການເປັນຢູ່ດ້ານສຸຂະພາບ, ໂພຊະນາການ ແລະເງື່ອນໄຂການປະຕິບັດວຽກງານໃນສະພາບຕົວຈິງ; 2. ມາດຕາ 5 ຫຼັກການເຄື່ອນໄຫວວຽກນາຍທະຫານໃນຂໍ້ 4 ຂໍເພີ່ມຄຳສັບໃນວັກທ້າຍຕື່ມ"ຮັບປະກັນການສ້າງ, ບັນຈຸ, ສັບຊ້ອນນາຍທະຫານໃຫ້ຖືກຕ້ອງ ແລະ ສອດຄ່ອງຕາມຄວາມຮູ້, ຄວາມສາມາດ, ສາຍວິຊາສະເພາະ ແລະ ຄວາມຕ້ອງການຕົວຈິງຂອງກົມກອງ" ໃນບາງກໍລະນີມີຄວາມຈຳເປັນຕ້ອງໄດ້ສັບຊ້ອນຕາມຄວາມຮີບດ່ວນ ຫຼື ພາລະກິດສະເພາະໜ້າຂອງຊາດ ຊຶ່ງຈະເຮັດໃຫ້ການບໍລິຫານກຳລັງພົນສະດວກຂຶ້ນ ແລະ ຕອບສະໜອງໄດ້ທັນການ; 3. ມາດຕາ 22 ກຳນົດເວລາການເລື່ອນຊັ້ນ ແລະ ເລື່ອນທຽບຊັ້ນເຫັນດີໃຫ້ພິຈາລະນາເພີ່ມເຕີມ ໃຫ້ມີການເລື່ອນຊັ້ນສຳລັບຜູ້ທີ່ມີຜົນງານດີເດັ່ນໃນການຄົ້ນຄວ້າວິທະຍາສາດ, ນະວັດຕະກຳ ແລະ ເຕັກໂນໂລຊີປ້ອງກັນຊາດ ເພື່ອເປັນເງື່ອນໄຂຊຸກຍູ້, ສົ່ງເສີມນາຍທະຫານຮຸ້ນໃໝ່ໃຫ້ມີຄວາມຫ້າວຫັນໃນການພັດທະນາກອງທັບ ໃຫ້ກ້າວສູ່ຄວາມທັນສະໄໝ; 4. ສຳລັບທະຫານຊາຍແດນ ທີ່ເຮັດໜ້າທີ່ເປັນຄູສອນຊັ້ນປະຖົມໃນເຂດຫ່າງໄກສອກຫຼີກທີ່ຂາດຄູສອນ, ຊຶ່ງໄດ້ຮັບນະໂຍບາຍຊຸກຍູ້ຈາກກະຊວງສຶກສາທິການ ແລະ ກິລາໃນຈຳນວນ 70% ຂອງເງິນເດືອນພື້ນຖານເຫັນວ່ານາຍທະຫານເຮັດໜ້າທີ່ໄດ້ດີພໍສົມຄວນ, ແຕ່ການເລື່ອນຊັ້ນມີລັກສະນະຊັກຊ້າ ຕໍ່ບັນຫານີ້ສະເໜີໃຫ້ພາກສ່ວນຮັບຜິດຊອບຊ່ວຍຕິດຕາມຕື່ມ ເພື່ອເປັນກຳລັງໃຈໃຫ້ນາຍທະຫານທີ່ເຮັດໜ້າທີ່ເປັນຄູສອນ.
ຂ່າວ: ພູວັນ, ພາບ: ວັນເພັງ
ຄໍາເຫັນ